我係一個係畸形家庭長大既畸形人,20年入面都係吵吵鬧鬧之中度過,為左下半生可以似返個人咁生活,一畢業我就搵份係內地既工作。咁唔代表我離開左畸形之家,我就唔係畸形,我依然係一個畸形人,我有幾個知心既朋友,但佢地都係香港,因此唔可以成日見。我亦唔相信婚姻,因此我從來冇諗過要結婚生仔,所以我係公司都過住獨來獨往既生活,唔出席任何社交活動。你問我一個人過會唔會覺得好孤獨?但孤獨又有咩所謂,我同屋企人一齊住既時候咪一樣孤獨。但我而家搬出黎住,我覺得輕鬆好多,至少以後可以為左自己而生活,環境靜啲,個心,都可以靜啲。
正當我以為我會咁樣生活落去直到老死既時候,命運同我黎左個大翻轉,我竟然係23歲個年就死左,俾死神帶左我去投胎,所有野都從新黎過。個日朝早,我收到我呀妹微信sd 左張相比我,係我上個月既銀行月結單。佢就係咁,每件事都做得非常有條理,好怕我會miss 左啲野,所以即使我唔係香港,佢會幫我拆信,整理好啲信件。而我係內地想要啲咩,佢都會幫我搵,幫我處理。我睇左睇張月結單,冇覆返佢,但我平時都係咁,冇咩緊要事的話,就通常等佢同我講過幾次野先覆,我地之間都好有默契,佢唔會追住我去應佢。佢只係叫我一星期至少應佢一次,如果唔係佢會擔心,於是我一星期都會應佢一次既。我睇完之後就繼續向公司出發,正當我等緊馬路之際,我見到有個小朋友衝左出馬路,又咁岩有車高速駛緊過黎。我諗都冇諗就衝左過去推開個細路,而我就走避不及比車撞到,瞓左係地下,本身係衫袋入面既手機跌左係我眼前,我見到呀妹sd左個信息過黎,係營幕預覽個到我見到佢問︰「大佬!你下次幾時返黎?」之後我就暈左。

到我醒左之後,我發現我身處一個全白色既地方,我自己都著住全白色既衫褲,冇著鞋,呢到咩都冇,我只係見到有一個著住白色衫既女仔背對住我坐左係張白色長凳到。我慢慢咁行去佢面前,想睇下佢咩樣同埋問下呢個係咩地方。我見到佢個下我呆左,佢竟然係我個妹,佢都見到我,對我露出從容既微笑,我疑惑咁問佢︰「妹!呢到係邊到?點解我地會係到既?」
「你已經死左!」佢笑住同我講。佢咁講我先醒起我經歷既個單車禍,岩岩明明仲好痛,但我而家竟然一啲感覺都冇,仲行得走得。唔通我真係上左天堂?但我又望望呀妹,唔明點解佢又係到,佢點死架?明明我撞車個陣仲收到佢既信息。我激動咁問︰「咁你…」我都未講完,佢就打斷左我既問題。
佢話︰「我唔係你個妹!我係死神,我係負責帶你去投胎既。我冇固定既形體,每次負責新既亡者,我都會變成佢係死個刻最牽掛既人。」佢停左一陣,又再笑笑講︰「係咪好貼心呢!所以我最怕啲人死既時候最牽掛佢地既寵物。狗呀!貓呀個啲都算啦!我變過做蛇呀,曱甴個啲咁既野!」佢一面自說自話,一面反曬白眼咁,同我細妹調皮既性格真係有幾分相似,我聽到都笑左笑。而佢突然又一改面上既笑顏,「故作」憂愁咁講:「不過,究竟呢個世界對於佢地黎講有幾咁唔值得留戀,先會係死個刻令佢地最掂念既野唔係人,而係動物!」佢嘴角露出淺淺無奈既笑容。佢真係好似我細妹,佢既一舉一動、一顰一笑都好似好似。我呀妹就係咁,傷心既事要笑住黎講,開心既笑就要大笑住黎講。我皺住眉問佢:「你真係唔係我個妹?」
「你覺得我好似?」
我點點頭。
佢又好似我細妹咁露出得戚既笑容,講:「嘻嘻!每次我轉變成另一個人,我都會見到個個人既一生,而我都會係亡者面前模仿個個人!係咪好professional 呢?me is professional! Professional is me!」
「哈!哈!」我聽到笑左出黎,我細妹的確成日講me is物物物, 物物物 is me!




之後我又問佢︰「咁我應該點叫你?」老實講我對死神既服務幾滿意,估唔到佢咁nice。
「你叫我小鏡啦!雖然每個都死神都只有一個編號,但我幫我自己改左個名,因為我既工作就好似鏡咁變成唔同既人!」
「咁小鏡,你要帶我上天堂定落地獄?」我小心翼翼咁問。
佢笑笑咁講︰「兩樣都唔係!你會去投胎。同你講解下先,每個人下世投胎去邊都係隨機既!前世同來世之間係唔會有因果報應呢啲野,前世種既因,唔會係後世有咩果。就算你投胎之後會忘記曬我所講既野,但我都想奉勸你一句,有咩野想做,有咩仇想報都係個世做左佢,唔好諗住佢地會有咩報應,唔會有,每個人既命都掌握係自己手上,唔好去等永遠唔會出現既報應去幫你對付小人,亦唔好去等永遠唔會出現既果去幫你,下世你就靠自己啦!呢到有份文件,你確認一下你既個人資料同死亡時間之後簽個名啦!」小鏡遞左份文件俾我。
老實講,我聽到我要去投胎真係有啲失望,如果我唔係投胎做富二代的話,咁我咪又要去過返疲累既人生,投胎去邊係隨機既,做富二代唔通真係難過中六合彩。我一面諗,一面睇文件上面既資料,但上面根本唔係寫我個名,上面個名係蔡加喂,我個名叫蔡家偉。
「我個名叫蔡家偉,唔係蔡加喂!」
「吓!我明明見到你係自己啲野到寫「加喂」做記號架!」佢O曬咀咁講。
我就笑笑口咁講︰「我係中意用同音字寫自己個名架!」
「我頂你個肺,你唔叫加喂,你就唔好寫加喂啦!點算呀而家?」佢又嬲又慌張咁講。
我無奈咁望住佢好似我呀妹咁發爛咋,明明係因為佢攪錯左令到我死左,仲係到發我脾氣。但其實我知道自己係枉死都冇話好嬲,因為我係一個係畸形家庭長大既畸形人,呢一生都過住勞勞碌碌被人掌控住既生活,我都已經變得好麻目,而家覺得自己死左都唔可惜!人生可以重新黎過對我黎講仲好!





「咁冇計啦!你唔死都死左,唯有將你地兩個既死期調轉啦!為左補償你,我可以滿足你一個願望,你講!你有咩想要?」小鏡又突然冷靜落黎同我講。
我直接了當咁講︰「下世我想做富二代!」
「除左呢個之外!」但佢亦直接了當咁拒絕左我。但佢又繼續解釋︰「投胎隨機係無人可以打破既法規,呢個要求我真係冇辦法!你再諗過啦!」
於是我沉思左一陣,然後再問︰「咁俾我保留今世既記憶去投胎得唔得?」
「呢個唔係唔得,但我唔覺咁樣對你有咩好處!以前既記憶只會成為你重生既牽絆,咁又可苦呢!」
「但係我想記住你岩岩對我既忠告,恩恩怨怨只會留一世,要早早了斷!而且我覺得自己有前世既經驗,就可以好好咁經營下一世,我相信我下世一定會生活更好!」
「咁好!拭目以待!我對你唯一既警告就係唔可以同任何人講你有前世記憶呢件事!而我會間中黎探下你,如果你到時想忘記前世記憶,可以隨時同我講,我會幫你刪除返前世既記憶!」小鏡指一指我手上份文件,示意我簽名。
我點點,隨即簽左手上份文件。
之後小鏡笑住咁收走左我手上既文件,再輕輕點一點我既膊頭,我就變到成個人輕飄飄咁左上飛,天上有一度白光吸住我,我俾白光燦到我開唔到眼。




而當我再次張開眼既時候,我已經係......

黑柴:

「久」違既長篇故仔,會陸續連載。

#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/