Checkmate: 第一次幹事會議

日期︰9/11/2017
時間︰下午4時
地點︰4A班房 (即係我同阿心嗰班)

阿心︰好~今日既會，主要係傾下黎緊學會promo day既安排。今年promo day喺禮拜五，所以應該有唔少人落黎玩。你地覺得我地用咩活動去吸引佢地，同埋邊個當咩時段好？(其實得食飯時間同放學兩段，都係三個人一更架啦)
裴凱︰不如阿心同韓穎軒一人當一更，然後同落黎既人捉棋？
丁丁︰我怕佢地太勁，嚇走哂啲人喎~不如揾阿君個Delta出黎同佢地玩？反正Delta可以較到無咁勁。
個個都望住我。
你問咩係Delta？呢個係我整既app，可以比唔同程度既人用，由我呢啲初哥到阿心之類既高手都啱用。其實我被阿心拉入象棋學會，仲要上埋莊既原因，除左因為我係佢best friend，更加係因為佢知我電腦好，想我幫手整apps。呢隻Delta就係我既傑作(仲順便攞黎交校本評核)。
我︰我無所謂，不過我唔會當足兩更架，另外一更要揾個人跟我學操作方法。




阿心︰OK，咁就用Delta啦。咁當值方面…
杜雨欣︰我想同阿凱一齊當食飯時間嗰更呀，我地放學有活動。
睇佢地兩個情深款款咁對望，都估到佢地係想一齊食飯兼當值，放學再去行商場啦。算，我就當賣個人情比佢地。
我︰希特拉話食飯要開班會，所以我諗我同阿心要當放學。
丁丁︰咁我都當放學啦。
韓穎軒︰我當食飯時間。
不愧係冰山型男，cool到爆。
我︰咁食飯更邊個跟我學用Delta？我得星期四放學得閒。
裴凱︰我禮拜四放學要上圖書館當值。
杜雨欣︰我要籃球隊練習。




韓穎軒︰我得閒。我跟你學。
噢噢噢噢！竟然係韓穎軒跟我學！？我已經feel到自己狂冒心心眼啦~
阿心︰咁…仲有無其他野？
裴凱︰呃…其實我屋企有副國際象棋，我想捐比學會…
阿心︰你聽日攞返黎比我地睇下先決定收唔收。(呵欠)散會。