愛是恆久忍耐: 第十四章

第十四章
 
星期六去唱k,其實我預計基本上都需要排好耐時間,但阿康原來一早已經book咗間房。
 
仲有樣嘢其實值得一提嘅,阿康其實屋企都叫有啲錢,雖然未至於去到一啲富豪嘅程度, 但係佢點都會請班女仔去唱k食飯。
 
我諗大家都有同女仔去唱k嘅經驗,當女仔一去到k房第一時間就係,有你冇你爭左個遙控,點曬所有歌,點到即最後一頁為止。
 
男生在k房嘅表現就等同於一隻大草原上既雄性嘅獅子, 基本上佢哋係冇落場嘅機會,淨係得個睇字。我哋睇住女生爭奪遙控器,重要冇辦法接觸到個遙控。
 




基於我唔會搶到遙控器既關係,所以我基本上會從旁邊觀察,幾個女仔嘅行動。
 
Kelly一入到間k房,就第一時間拎住個遙控器。Amy 就喺個手袋,拎出一包濕紙巾抹乾淨所有咪,同埋笠返個咪套。Bonnie見冇乜嘢可以做,就問我嘢咩飲同服務員落order 。
 
基本上阿康同我兩個人,預咗冇份唱k嘅關係,所以我哋通常都會叫定幾個骰盅玩大話骰。
 
雖然我哋去唱k,拎骰盅玩大話骰,不過我哋叫唔到酒嘅關係,所以我哋會用另一個方法去代替酒作為懲罰。
 
我哋通常都會唱k前喺就近便利店,同啲女仔講每個人選擇一枝自己鍾意嘅非酒精飲品,但係會限制佢哋唔可以買水。
 




阿康會買奶,我就通常比較好心少少買檸檬茶。
 
其實遊戲嘅玩法好簡單,輸咗嗰位就要飲左杯嘢,而其他人就會提供岩岩買既嘢飲倒落個杯度,分量當然唔會話一個杯只有一種飲品啦,阿康通常會拎埋一個量杯去唱k。(好耐之前佢為咗玩呢個懲罰遊戲,真係去左買一個實驗室專用嘅量杯) 各位贏咗嘅玩家,需要再擲一粒骰,按照擲骰嘅結果,倒有關份量既飲品落量杯。
 
其實普通通溝飲品其實係冇乜咩嘢嘅,但係衰就衰在阿康永遠都會買一支奶,試過有一次女生買左枝蘋果醋,兩樣野溝埋一齊就出事啦。攪勻左之後杯野有一d類似沉澱物既野出現。
(我其實有問過google大神,睇到網上有人教牛奶加醋再加熱之後,可以加工做成芝士,我唔知同我見到一粒粒既沉澱物有冇關係。)