愛是恆久忍耐: 第二十六章

第二十六章
「你有冇坐過熱狗呀？」

「吓?」 對於呢個問題,我真係除左吓唔知點答好。

「我問你有冇坐過熱狗,即係問你有冇坐過飛冷氣嘅巴士呀！」

「我知熱狗係咩野,我係有坐過呀,但你問呢個問題係做咩事呀。」

「冇嘢呀,只不過眼見宜家街上面好似唔多見到有熱狗,所以先問。」





「你好鐘意坐？」

「係呀,我好鍾意坐㗎。」

「點解?」

「我好鍾意坐喺熱狗頭一行,開住個窗啲風迎面吹過嚟,我覺得好舒服,而家呢啲冷氣巴,坐頭位唔會有風嘅情況,我覺得好有壓迫感。」

「係咩？大熱天時如果要坐熱狗既話,我覺得好熱完全接受唔到。」





「我覺得冇乜所謂,同埋如果有風景想影相嘅話,我可以打開個窗,喺冇玻璃既情況就唔會有反光出現。」

「你好鐘意影相?」

「少少啦,人腦可以記憶既影像有限,影相就可以好輕易記錄你曾經見到既影像。」

「記低呢啲影像有咩作用?」

「好有用㗎,呢啲影像可以用嚟留低,成為你曾經生存過既證據。」Ashley講嘅時候用左手托住頭,然後望住窗外風景。





「你講嘢好似啲老人家。」

「錯啦,係世事都俾我看透了。」Ashley 擰返轉頭對我講。

「你又睇唔睇得透下個站就要落車呀!」

「膚淺!世事並唔係咁簡單,落車係唔係微觀,世事係宏觀。 」

「我冇興趣知你講嘅所謂宏觀同微觀嘅嘢,下個站要落車啦。」呢個時間我順手撳咗座位附近既落車鐘準備落車。