愛是恆久忍耐: 第五十九章

第五十九章

幾經辛苦最終都算織好咗條頸巾，我將條頸巾小心翼翼咁摺好，然後放咗喺一個無印良物嘅紙袋入面。

臨瞓之前，為咗安全起見，我將條頸巾由紙袋入面拎出嚟，再一次檢查，確認冇織錯同甩針嘅情況之後，先安心咁去瞓覺。

屋企通常嘅習慣喺初一同我老豆嗰邊親戚拜年，而每年到咗呢個時候，除咗逗利是個一刻喺開心之後，基本上全程都要聽呢個親戚個女或者個仔考到好成績，邊個搵到份好工，呢種曬命嘅大會真係每一年都好怕去。

今年破例老媽子唔洗我去拜年，我知道之後即時鬆咗口氣。





因為到時一定會提起我意外受傷嘅事，之後親戚們會講一堆鼓勵說話。我唔想煩同埋唔想成為親戚眼中嘅焦點，唔洗拜年對我嚟講係好事。

接近12：00的時候，我WhatsApp俾Ashley。

「你拜年逗左幾多封利是呀！」情人節呢個日子，雖然我好想約佢出街，交條頸巾俾佢，但無理由劈頭第一句就直接問佢出唔出嚟。我晚上諗咗成晚，先決定到用呢句做開場白。

「我宜家去緊第三個親戚屋企拜年，利是有十幾封都叫有大收獲嘅。你呢，收到幾封利是？」Ashley個訊息隔左幾分先回覆返我。

「我冇去拜年，老媽子應該會代我去逗利是。不過我親戚比較少，通常加埋都係得過十幾封左右，你宜家一日逗嘅利是隨時多過我嘅總和了。」





「得十幾咁少？我通常都會有四十封左右。」

「你就好啦！我想知你拜年唔覺得會好悶咩。同埋你拜年係唔係會拜全日，夜晚會唔會在親戚屋企食埋飯㗎？」如果佢唔需要拜成日日的話，我應該會約佢出嚟。

「唔會悶呀！大部份親戚屋企，都有好多差唔多年紀嘅表兄妹一齊玩，一年先見一次我唔覺得會悶呀！我拜年通常都唔洗拜全日，同埋我唔會在親戚屋企食飯。」

睇個樣我應該有機會可以約到佢出街，送條頸巾俾佢。

「我在屋企悶到傻，我想去之前個間有得睇漫畫嘅cafe，你有冇興趣？」問完之後，我好緊張咁等佢嘅回覆。





「應該都冇咩問題嘅，反正呢個親戚係最後一個要去拜年嘅地方，本身我都諗住返屋企溫書。不過你開到聲話悶，咁大年初一我就當俾自己放一日假，溫少一日書對成績影響都唔會話太大。我就勉為其難陪下你啦！不過今日年初一，間cafe會唔會冇開門㗎？」

其實我本身都打定輸數，如果佢唔出嚟我都有個plant B交條頸巾俾佢，但冇諗過竟然可以約到佢出嚟。

「我本身諗住就算你唔出嚟，我都會去個間Cafe睇漫畫，所以我打咗電話問咗間Cafe，佢哋話下晝會開工。」

「咁好啦！我一陣走得打電話俾你，我諗3：00左右就走得，咁約定在咩地方等？」

「大年初一旺角一定好多人，我會直接上間Cafe，順便拎咗位先，到時Cafe見啦！」其實我係驚在街上俾條頸巾俾佢，會俾街上嘅其他人用奇異嘅目光睇我。

「你一個人出去真係冇問題？」

「冇問題啦！我出院之後日日都有好似老人家一樣，一個人在樓下公園行當復康訓練，所以唔洗擔心我。」

「你既然咁講，你自己小心，一陣見啦！」





「ByeBye」

臨出門之前，我檢查咗銀包睇下有冇足夠嘅錢，同埋最重要嘅頸巾就出門，希望一陣所有嘢都順順利利。