【愛情甜故】我同條女敦倫的日子: 回憶地1

但我並唔甘心，就算一絲希望都無，我都要出去博一博盡量搵佢返黎，

我要證明俾佢睇我係可以改，只奢求佢可以俾多一次機會我。

所以呢日朝早瞓醒就出左街，去一些我地曾經去過嘅地方，

我再次嘗試聯絡佢，但都只係聽到一段死沉沉兼冇語氣嘅語音:

「電話暫時未能接通，請遲啲再打過黎......」



我真係好想再聽到你把聲，點解都唔得。

我落到街過一條馬路經過一個公園，呢個公園曾經係度坐過、談過心、玩過，我見到我地以前嘅影子，真係好懷念。

我地曾經咬住碌雪條係度盪秋千，點知盪至最高點時你太興奮成碌跌左落黎冇得食，

然後我見你呢個境況，同你一齊盪緊秋千嘅我笑左出聲，支雪條同你一齊成碌跌左落地下，

最後大家食都冇得食，然後就到你笑到傻左，而我個樣就表現得極為無奈，呢個回憶真係好深刻。



仲有一次柒人柒事都係呢度發生:

呢日天氣好熱，你買左一杯雀巢雪糕黎公園兩份食，

你諗住餵我幫我抔雪糕之時，我頭已挨近杯雪糕

「啲雪糕雪得好硬好難抔...」

你表現出一個辛苦嘅表情，然後你出力一抔就將舊雪糕彈左去我塊臉黐住左，我迅即感到臉上一股寒冷。



「哈哈哈...」

而你亦即刻笑左出聲。

「啊...頂你個肺，杯雪糕俾我我黎餵你，唔好走。」

你當然拎住杯雪糕即刻走，我笑住咁追住你圍住個公園兜左幾個圈。

就係咁我地係個公園度開開心心玩左半日，呢啲都係我地美好嘅回憶。

然後我繼續行，經過一條我曾經俾班MK仔打嘅後巷，

條後巷好長，但只見到幾條友係度食煙，再都見唔到阿欣嘅身影。
.
.


.
我去左好多地方，直至夜晚我行到我地初約會嘅地方一一海濱。

沿著海傍一路走，我記起呢度係我曾經緊張過亦驚訝過嘅地方，

一方面因為鍾意你唔知點同你相處而感到緊張;  另一方面因為聽到你做過公廁而感到驚訝。

曾經另一次再去海濱約會嗰陣你問過我:

「阿豪，如果俾你揀，愛情重要啲，友情重要啲，抑或...扑野重要啲? 因為之前我聽阿偉講你曾經為左去扑野，阿偉有事你都唔去救佢。」

我嗰刻心諗就當然扑野重要啲，愛情其次，而友情方面佢地又唔係女平時只係吹下水放到咁重要做乜，所以我答佢:

「如果俾我揀，我會劃分一個百分比，扑野佔50%，愛情佔30%，友情佔20%。」



「原來你愛我嘅程度只係佔咁少。」

聽完後你立即由充滿期望轉為有些少失望。

但依家我可以同你講，你係我心目中最重要，我要為我以前所做嘅決定作出改變，

愛情60%，友情40%。

扑野根本唔重要，所以係0%，只要有你嘅存在我生活先會過得開心，我真係好鍾意你。

求下你出現俾我作出多一次選擇，我唔會再令你失望。

最後我行晒成條海濱，並冇發現阿欣，見到嘅就只有我以前同佢係度相處嘅身影。

行到盡頭，我望住漆黑嘅海面，心口有股壓力湧上黎，眼淚慢慢地流出。



張倩欣，我真係好掛住你，你究竟係邊。