【愛情甜故】我同條女敦倫的日子: 失蹤

出門後，我第一個地方就係去gym房，因為我知呢個地方係佢經常去嘅地方，

當我入到去，我環視一周，係就係好多人，但我就完全見唔到茹姐嘅身影，

平時佢跑開步嘅跑步機今日換左個肥佬係上面跑，既然佢唔係度我唯有去其他地方搵。

然後我就去海濱搵佢，路途中我不斷睇佢wts有冇上線，但個最後上線始終不變，

而我wts問佢係邊就發現係有兩個灰tick，即係佢係收到我嘅訊息，咁佢做乜唔應我機，



沿路我單止wts佢，仲不停打電話俾佢，次次都通左但佢就始終唔聽電話。
.
.
.
當我到達海濱，夜幕已降臨，今晚都幾多人，有人玩cosplay，有人跑步，有人唱歌表演，仲有唔少情侶坐係張凳度唔知偷情定sweet，

雖然條海濱好長有排行，但我都決定由海濱開頭嗰邊慢慢行到盡頭，希望可以俾我見到茹姐，

我沿住海濱向前慢慢行，而我就不斷環顧四周，見到嘅大多數都係情侶，而每對情侶中每一條女都冇一個係茹姐。



最後我行左大約15分鐘終於到達盡頭，盡頭呢度少左好多人，但我始終見唔到茹姐，佢究竟去左邊!?

正當我冇晒希望之時，我突然諗起一個人，可能佢會知道佢係邊，

呢個人就係阿欣...

然後我拎出手機打開通訊錄準備打俾佢，但呢個時候我就淆左淆，心諗究竟打唔打俾佢好呢，

打俾佢我點樣開口好呢?畢竟佢之前先拒絕左我，我咁樣突然搵返佢真係好尷尬，



另一方面我又驚煩到佢，總之就驚呢樣驚嗰樣，

但我知唔可以，呢個時候唯一可能知茹姐去向嘅只得阿欣，始終阿欣係茹姐嘅fd，我一定要打俾佢先得!

然後我就咬緊牙關地打俾佢，心跳慢慢加速。

「電話暫時未能接通，請遲啲再打過黎...」

聽到打唔通我就鬆左口氣，但另一方面我就更加焦急，打俾阿欣仲衰過打俾茹姐，連通都唔通，連阿欣都打唔通我仲點可以搵到佢，咪即係連一絲線索都冇左!
.
.
.
之後我去左好多地方尋找茹姐嘅下落，apm、megabox、各個街邊，什至去到茹姐屋企附近都唔見佢嘅身影，

最後我去到某個公園將凳，我終於攰到坐低左，



究竟你去左邊，你可唔可以出現俾我見到你，我真係唔想再見到有多一個女仔係我身邊消失，

然後我低下頭雙手黯住雙眼眼淚慢慢流出，我覺得自己好大罪惡感，竟然連一個女仔都睇唔住，佢唔搵我我竟然仲覺得乜事都冇，

我再次覺得自己好冇用，我真係仆街黎，次次等失去左先黎珍惜，上次又係咁今次又係咁，究竟仲要幾多個女仔係我身邊消失我先會開心?

我呢份人真係唔配同女仔做friend，人地有咩事我都唔會即刻發現，仲話要幫佢、要珍惜佢，我根本改唔到自私嘅性格，我真係對佢唔住...

正當我傷心失意、渺無希望之時，突然我腦海閃過阿偉嘅畫面，好似記起啲野，

我記得佢之前同我講過阿彤唔見左嗰陣係靠snapchat個gps功能幫手搵到佢，我記得茹姐係有用snapchat，而我就down左但好耐都冇掂過佢，

我都可以試下用snapchat搵下佢係邊，如今茹姐佢冇關機應該有機會搵到佢位置，



諗到呢度我終於覺得有返少少希望，然後我就快手打開久違嘅snapchat，再禁實茹姐個頭像，就顯示出一堆資訊，

而資訊嘅最頂端就有一幅地圖，冇錯，就正是茹姐個位置!!仲寫住係剛剛，即係佢依家就係呢度。

「Yeahs!!」

我見到茹姐個位置後我即刻開心到叫左出黎，我終於知道你係邊。

之後我禁入幅地圖細心睇睇佢個位置，然而佢個位置令我愕然左一下。

「咦，呢度咪係阿欣屋企附近?點解佢會係呢度?」

知道佢個位置後我就唔諗咁多迅速起行，去到我就知茹姐發做咩事，

沿路我嗰股強烈嘅不祥預感仍然持續，覺得佢硬係發生左啲咩事。


.
.
.
10多分鐘後我到達左阿欣屋企附近，我一直開住snapchat望住向佢個位置走近，越黎越近，

可能係今日手機冇差電，依家手機已經冇乜電，不過都好彩我已經搵到茹姐個位置，

而當我走到佢個位置時，我向前望一望，發現前面50米有個位可以轉入後巷，而呢度都係一個人少嘅地方，所以夜晚特別陰深，

我慢慢向後巷步近，當到達後巷10米左右，我突然聽到後巷裡面有人講野。

「我警告你唔好再走近，快啲走，走開啊!」

呢把聲咁似茹姐嘅!?我急急腳走到條後巷嘅轉彎位望向裡面，眼前境像令我大驚，



我見到有個老女人背向我拎住把豬肉刀向阿欣同茹姐佢地兩個步步迫近...