幾日後,我終於出院,而出院後我都冇乜點再同茹姐聯絡,

我只覺得我個心好痛,我邊個都唔想見,好多時候我都匿入間房喊,因為我真係唔捨得阿欣,

腦入面不斷浮現我同阿欣以前嘅回憶,我每次諗起都會覺得好痛心,就好似有隻手緊緊握緊我個心臟,

雖然我知喊都係無補於事,但我真係控制唔到,阿欣就好似寄生左係我腦入面經常都會跳出佢嘅影子,令我日日都過著消沉嘅日子,

而茹姐呢幾日就不停地炸我機WTS我,佢安慰我、約我、氹我、主動開話題同我傾計,但我都冇理會佢,我已經對周邊嘅任何事、任何人失去樂趣,我邊個都唔想理。



而呢晚我就獨自地出左去海濱,因為始終呢度係我同阿欣第一次約會嘅地方,所以我想黎多次呢度感受一下戀愛的味道,我會好重視呢個地方,

去海濱前我去7仔買定一pat藍妹,我決定今晚不醉冇歸,我要係海濱陪住「阿欣」。

買完一pat藍妹後,我拎住頹住咁行去海濱,今晚海濱並唔多人,顯得好冷清,正好係一個適合借燒愁嘅地方,

點解?因為我總覺得一個又靜又舒服嘅地方可以令我好好思考,我可以享受一個人獨獨的自由,拋開一切煩惱,

望住漆黑嘅海面,十分寂靜,只有陣陣寒風吹過,而望住一條無窮無盡嘅海濱長廊,我亦只見到我地以往虛無嘅影子,



我依家真係好想阿欣再次出現我面前,我好掛住佢,但我依家再掛住佢仲有咩用,已經太遲。

諗到呢度,我就拎起一罐500mL嘅藍妹不停地罐,真係好奇怪,平時飲酒我會覺得好苦好難飲,但我依家再飲我竟然會覺我呢陣苦味好好飲,

我個心真係好痛,眼淚再次不自覺地流出,我真係恨我自己咁冇用,明明我已經入左去阿欣間病房可以救到佢,但最後我都救唔到,乜都做唔到,

我話過要保護佢,但最後點?最後佢死左係我面前,親眼睇住一個人殺佢但我卻無能為力......

責怪期間,我好快已經將一罐藍妹飲晒,身體開始有啲不受控制、搖搖欲墜,而視線亦慚慚變得模糊且搖晃,然後我坐低左係木板造嘅地下挨住塊玻璃,



但我並冇理會,我拎出第二支出黎罐,今晚嘅酒真係特別好飲,我唔想停,

飲係好飲,但我個心依然仲係咁痛,我更痛恨個天點解唔可以俾我回報,

以前我對阿欣做左咁多衰野係我虧待左佢,點解就唔可以俾我回報返佢?點解唔可以俾我將功補過?而係推佢去死,真係好唔公平,最應該要死嘅就唔死,反而要一個受盡苦難嘅去死。

我望住坐係度望住漆黑嘅上空,嘴邊喃喃自語,

「阿欣,你係上面過得好唔好?我真係好想黎陪你。」

說罷我開始拎起第三罐酒開始劈,頭腦十分搖晃,我見到漆黑嘅上空竟然識旋轉,

唔單止上空,周遭嘅事物亦開始旋轉,睇野已經睇唔清。

不過呢個時候我忽然見到有個身影行緊過黎,我睇唔清佢個樣、睇唔清佢著咩衫,只略略見到佢一步...兩步...三步咁行緊過黎,越黎越接近我,



直至佢行到我身邊同我講野我先知佢係邊個,

「阿豪,唔好再飲啦,你已經醉晒。」

原來佢係茹姐,佢拎走支酒唔俾我。

「你俾返我,我未醉...我未醉。」

我伸手想搶返支酒,但我根本搶唔到,周圍都係度旋轉緊,我搶到嘅只有空氣。

「唐富豪你醒下,阿欣已經死左,呢個係不變嘅事實,你成晚係度飲酒又有咩用,唔通你係度喊苦喊忽佢就會復活返?唔會嫁啦。」

我聽到茹姐正係度大聲罵緊我。



「我真係好掛住阿欣...我想去陪佢。」

「阿欣生前最大嘅遺願就係要你振作,唔好為左佢放棄自己,你睇下你依家點嘅樣,你估下如果阿欣見到你依家咁嘅樣會唔會開心?」

「你唔好理我...我想點就點。」

「你日日咁消沉都冇意思,唔通你成世都想為左個死左嘅女仔而愁?你咁樣做就即係唔聽阿欣嘅話,你當佢嘅遺願係耳邊風!!」

「你知唔知?佢俾伯母殺唔只係覺得罪孽深重,仲係想救你,佢情願自己死都唔想再連累到你,因為伯母由始至終最大嘅目的都係要阿欣條命。」

「你諗下,佢寧願自己死都唔想你有事,睇得出你條命係好重要,莫非你就咁唔珍惜佢對你嘅死?」

茹姐講完後,我終於頂唔住瞓低左,眼晴慚慚合上,瞓左係茹姐肩膀上,冇再回應佢,

呢一晚睇黎就此隨著夜幕結束吧......