「喂!專心做功課啦!望住我做乜!」我見葉子朗定咗形咁望住我,我用筆敲咗佢個頭一下
佢好似聽唔到我講嘢咁,只係一直向我靠嚟
我向後i,直到撞到牆,冇得再退
佢慢慢咁靠近我,我知道佢想錫落嚟
我好自然就合埋眼
正當快要錫到之際...我手機突然響起
我望咗一眼顯示嘅聯絡人
我就推開咗葉子朗,走咗去廚房聽電話
「喂?」
「諾諾...」我聽到電話裏頭傳嚟哭聲


「做咩事呀?發生咩事啦?」我問
「你可唔可以出一出嚟呀?我喺嗰個公園...」
「唔...咁好啦...我宜家出嚟搵你啦!」我收咗線之後就換件衫,著番波鞋
「葉子朗我出一出去呀!」我喺閂門嘅同時同佢講
我跑到去嗰個公園,見到佢坐咗喺秋千上面
「恆!」我朝佢跑去
「諾諾...」佢抬起頭望到企佢前面嘅我,就即刻企咗起身攬住我
「發生咩事啦?」我問佢
「我唔知可以搵邊個...我第一時間諗起嘅人就只有你...」佢一路喊一喊講
「你仲係同以前一樣...成日都咁易喊嘅...」我笑咗一笑,然後伸手攬住佢


佢,係周樂恆,係我嘅初戀男朋友,暫時嚟講亦係最後一個男朋友,但我同佢早喺2年前就分咗手
「你洗唔洗食D咩?我去買比你食呀!」
「你喺我身邊就得啦…」佢搖搖頭
「好啦好啦...」我企喺佢面前,冇講任何嘅說話
過咗一陣之後,佢突然推開我
我一臉不解咁望住佢
「方芷諾…」佢捉住我嘅雙肩
「怎…怎麼了?」我有D比佢突然嘅動作嚇親
「我地一齊呀!」佢突然咁樣講,搞到我唔知點應佢好
「呃…你...」我一時間唔知可以比D咩反應佢


「我地一齊番都係好事嚟㗎!唔係咩?你係最了解我嘅人,我有事嘅時候你都會喺我身邊...」佢一直捉住我搖嚟搖去
「即...即係我同你分咗手之後講過再見亦是朋友㗎嘛!你知㗎…我對個個朋友都係咁㗎!」我心入面有D慌張
佢冇出聲,只係用一個可憐嘅眼神望住我
「你唔好咁望住我啦...但我地都會係好朋友嚟㗎嘛!」我最怕嘅,就係佢呢個眼神,總係冇辦法抵擋得住
我拎咗張tissue幫佢抹一抹面上嘅淚水
「我知道呢個只係任性嘅說話,唔好用自己嘅幸福嚟做自己任性嘅賭注好唔好?」我將tissue放喺佢手上面
識咗佢5年,對佢嘅性格,我都好了解
我心入面認為佢只係一時衝動咁開玩笑...至少我係咁諗...