我自己一個人行番屋企
行到半路嘅時候撞到周樂恆,我停咗喺路上同佢講兩句
「你又會咁夜先番屋企嘅?」
「係呀...漏咗嘢咪番去拎囉~」我微微一笑
「咁夜,又得你一個,我陪你番去啦!」
阿恆果然無論幾時都咁有風度
「好呀!」我點頭
「啱啱我見到葉子朗。」周樂恆講
「所以呢...」我有D心虛就耷低咗頭
「你...見完佢嚟呀?」周樂恆一句就講咗出嚟


點解佢成日都好似睇穿我個心咁樣
我靜咗落嚟,我諗唔到答佢咩好
周樂恆一手捉住我,我行咗兩小步面向住佢
「我唔係叫過你唔好同佢行得咁埋㗎咩?你點解唔聽我講呀?」佢皺起眉頭
「唔係,我只係...咁啱撞到佢。」
「葉子朗唔係好人嚟,佢份人花心又貪挽,你明唔明呀?佢平時又唔上進,換女仲快過你挽衫呀!我擔心你痴得佢太埋會比佢影響咋!」佢一直喺度數落葉子朗
明明葉子朗根本就唔係咁嘅人,至少我心入面係咁諗
「佢成日借意嚟搵你,佢下個目標係你點算呀?佢成日同女仔亂搞關係。你地喺課室一齊坐啫,但係...」
我愈聽就愈嬲,葉子朗唔係咁嘅人嚟,我一手甩開咗周樂恆隻手
「夠啦!葉子朗都唔係咁嘅人嚟!你唔好再咁樣講嘢嚟抵毀佢啦!」我忍唔住開口講


「你有幾熟佢呀?你又知佢咩人?」周樂恆反問我
「熟過你呀!我知你唔中意佢,但佢真係唔係D咁嘅人嚟,你咁講,你又有幾熟佢呀?我同佢熟又如何?我知你關心我,但佢真係唔係壞人。」
我幫葉子朗平反,純粹因為我覺得佢真係唔係好似周樂恆講嘅咁衰
「你做咩下下都幫住佢啫?你同佢有親咩?你又唔係佢條女。」周樂恆不忿咁講
「我都只係講事實啫!」
「佢當時咁樣對你,你仲要幫住佢?」周樂恆嘅語氣明顯係質問緊我
「我知你想講咩,你想話係佢唔要我咋嘛!但明明你自己都係咁呀!你有咩資格話佢呀?你做嘅嘢唔係仲離譜咩?」我真心嬲啦,佢有口話人冇口話自己