「葉子朗,你仲記唔記得,當初你話過你中意我,想同我一生…」我微微耷頭,露出淺淺嘅笑容
「嗯…」佢嗯咗一聲
「你真係好貪心,要洛天恩亦要我。」我話,「我覺得我係犯賤,無論點都好,都仲會喺你身邊,呢個係我…做過最犯賤嘅事…」
呢個男人,喺我嘅人生之中佔咗重要嘅一個席位,好重要…
佢令我知道,原來自己可以犯賤到呢一個地步…
「我成日都會諗番起以前,原來你出現咗咁多,佔咗咁多。」我笑咗一笑
「方芷諾,夠啦…唔好再講啦…」葉子朗開口講
我望一望佢,佢亦望一望我,用嗰個不情願再聽落去嘅眼神…
「講夠啦…講到底,你都係想要我地之間做一個了結啫!」葉子朗話,「我為咗你,咩都做得出…只係想要你同我一齊。你肯同我一齊,咩都冇所謂。我同你之間糾纏咗咁耐,係時候要有一個了結啦係咪?」
佢講完呢句之後,只係放低咗一袋嘢


「呢個就係我最後嘅答案。」佢講完呢句就走咗
對唔住呀各位,要你要睇咗咁多,追咗咁多好似狗血劇情一樣嘅情節
我諗呢袋嘢,我睇晒之後,就可以了結咗我同葉子朗之間嘅事
呢個故事,亦會到此為止
各位再忍耐一下好唔好?
我將呢袋嘢帶走咗…

番到屋企,我坐喺梳化度,然後打開個袋睇
入面只有一本類似日記嘅嘢
係我之前喺佢屋企見到嘅嗰一本嚟


我隨意咗揭咗揭,入面每一頁都係密密麻麻嘅字,幾乎冇空位
上次睇都係呢本,但…咦?
我突然留意到後面有膠紙嘅痕跡,睇嚟佢再「加紙」,呢度總共有6本簿
我由第一頁開始睇,我冇諗過,一切再次有改變…

2013年6月10日
今日係畢業典禮,我同方芷諾之間嘅一切,都劃上句號
喺課室嘅角落仍然留有我同佢嘅回憶,用錢都買唔到番嚟,係同第二個人冇辦法得到嘅嘢
佢要去英國啦…其實我好唔捨得佢…我好想話比佢知我真係好中意佢,我為咗佢同洛天恩分手,一切都係想要同佢一齊,我真係好想同佢講…
但我記得嗰日佢同我講係最後一次嗰陣嗰一個堅定嘅眼神,我就知道,就算我再想講,都唔需要再講啦…答案對佢嚟講並唔重要…


著住畢業袍嘅佢,都特別靚,特別好睇
或者係因為呢次,係我最後一次見佢啦~所以特別想要望多佢兩眼
佢踏出校門嘅時候,我望住佢嘅背影,心入面嗰種難受真係不能言喻
想要追上去挽留佢,捉住佢,用力攬實佢,同佢講一句「我中意你」
不過,佢有佢想要行嘅路,唔會一生人都困喺我身邊,只要佢開心,佢幸福就夠啦

2014年6月15
今日我突然心血來潮,喺電腦度睇番之前高中嗰陣影嘅相
以前真係好青春,宜家都好青春
但係我發現原來喺咁多張相入面只有畢業禮嘅嗰張相係同方芷諾嘅合照
原來呢張相係唯一一張只有我地兩個嘅合照,其他有佢嘅都係合照,有幾個人嗰種
唔知宜家佢喺英國過成點呢…方芷諾最怕熱,又怕凍,英國嗰邊啲溫差咁大,唔知佢適唔適應呢…嗰邊咩都要靠自己,好想知道佢有冇好好食飯,有冇唔舒服,有冇唔開心,有冇識到新朋友,有冇融入到嗰邊
咁樣就過咗一年,唔知佢幾時番嚟呢…

原來喺我畢咗業去咗英國嗰年,佢仲係好掛住我,為我擔心前擔心後


但都已經係幾年前嘅事,縱使呢本日記,係為我而寫嘅都好…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link