[愛情甜故] 因為一次睇到佢打飛機,所以我地變咗做炮友: 141.S326.世上最難打破的,是你築起的牆

「嗰次之後，你就再冇咁樣同我講過嘢啦…」我輕皺眉頭
「呢個結果係你想要，我只係幫你實現啫。」佢嘅一字一句直打入我心
我冇出聲，微微低頭
「我已經等夠啦…」佢稍稍低頭喺我耳邊講，「以前嘅我，身心都比晒你啦…但你係點對我？」
我嘅眼淚已經喺眼眶打轉，但我仍然強忍淚水，裝作堅強
「一直推開我嘅，唔係你咩？一直話我地已經冇可能，將我拒於千里之外嘅人，唔係你咩？」葉子朗繼續講，「到咗宜家呢一刻，你仲想喺我身上挽回啲咩？」
「我想挽回嘅係你呀！」
呢一刻，我腦海中只有呢句我衝口而出嘅說話…
成個月台一片寂靜，我咬緊牙關，握緊拳頭
喺安靜咗3秒之後，佢講咗一句：


「一切，都太遲啦…方芷諾。」
佢講完，然後直接轉身就走，我仍然呆企喺原地
太遲？真係已經太遲啦？
望住葉子朗嘅背影，我嘅心再次痛到窒息似的
點解佢講嘅一字一句都好似利箭一樣插入我心臟？
雙腳不受控就跑起嚟，直撞上佢背上，伸手攬住佢嘅腰
我就好似喺冇意識嘅狀態下做咗件咁嘅事一樣…
「你咁樣算咩意思？」葉子朗問我
我都唔知…我突然就叫住你，突然跑起嚟，突然攬住你…我都唔知咩事…
「你當我係咩？」佢伸手放喺我攬住佢嘅雙手上，想要推開我嘅手，但係我不自覺咁更用力握緊自己嘅手腕


我當你係咩…我已經唔清楚啦…我只係照住我個心去行動咋…
「放手。」佢冷漠咁講，我搖頭，佢再講，「放手。」
我再搖頭，今次佢更用力咁推開我雙手，我鬆咗手…
「挽夠啦，你仲想挽回啲咩？我地結束㗎啦，呢個係你想要嘅結果嚟，所以，夠啦。」葉子朗講完就直接離開
我到底…喺度做緊啲咩呀…？
…
我番到公司，阿Wing行咗過嚟
「你今日又會咁晏番到嚟嘅？」阿Wing行嚟我隔離，同我一齊行去我個位度
「嗯…係呀…」我苦笑起嚟，然後點頭
「你搞咩呀？眼紅紅咁嘅？」阿Wing一臉擔心


「我唔夠瞓啫…」我微笑道
「咁今日放工之後番到去就好好休息下啦…」阿Wing同我講
「嗯…」我點頭，「咁我做嘢先啦…」
「嗯，咁我都番位先啦！」阿Wing笑一笑
我坐低咗之後，就拎手機出嚟，whatsapp靜瑜
「今晚見一見呀…」
靜瑜好快就覆我
「Ok」
「我去你屋企搵你呀…」
「Ok！」
…
今日全日喺公司根本就冇心情做嘢，心不在焉咁樣…
我望住個鐘一踏正6點就起身走
「Wing，我今日有啲事早啲走。」我行到去阿Wing個位
「嗯，你早啲休息啦番到屋企嘅話。」阿Wing點頭示意明白


「嗯，咁我行啦…」我點頭，然後就離開公司
我搭巴士番去，上到巴士，我望住車窗外面，但個腦就諗緊今朝發生嘅事…
葉子朗佢係咪討厭我…如果唔係點會講得咁狠…
但係我咁樣對佢在先…佢討厭我亦不無道理…
我今日點解會咁衝動，二話不說就跑上前攬住佢…
一諗起今日葉子朗講嘅說話，我個心就好難受，難受到窒息，好似比萬枝箭插得辛苦
差唔多到站啦…只要我早一個站落車就可以快啲到靜瑜屋企
等到巴士停咗開車門，我就落咗車
我落咗車行咗兩步，停低咗，點解又會見到佢…？
愈尷尬嘅時候就愈會見到面…我唔想見佢，上天對我都太殘忍啦掛…
葉子朗就喺我面前，佢睇緊手機，但係佢忽然抬頭，望到我
但係今次…佢冇理我…耷低頭繼續睇手機，喺我身邊經過咗…
我回頭望住佢嘅背影，眼淚再次打轉…

IG Link: https://www.instagram.com/nd_cotttoncandy/?hl=zh-tw


回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link