[愛情甜故] 因為一次睇到佢打飛機,所以我地變咗做炮友: 154.S339.名為「思念」嘅感情

(人稱:方芷諾視覺)
「唔…」
我一個翻身，外面嘅陽光直接照喺我面上，我忍唔住眉頭一皺，用力睜開雙眼
我喺屋企張床度…琴晚…呀…飲醉咗…靜愉送咗我番嚟…
「葉子朗…」喺我口中輕輕吐出
我琴晚好似出現幻覺，見到葉子朗扶住我
但又點會有可能，琴晚同我一齊飲酒嘅人係靜愉嘛，咁送我番嚟嘅人理應都係靜愉
我行落床之後嘅第一件事，唔係去洗面刷牙，而係拎起電話打比靜愉
「咔…」電話響咗幾秒，然後靜愉就接聽咗，「喂？」
「靜愉，係芷諾呀～」我拎住電話行去廁所


「我知，做咩呀？」靜愉問
「琴晚係咪你送我番嚟㗎？」我縮去左邊博頭夾住個電話，騰出雙手嚟開水沖條洗面巾
對面靜咗三秒
「係呀～」靜愉回答，「做咩咁問嘅？」
「冇呀～」我將面巾扭乾，然後抹一抹面，「琴晚我飲醉咗之後，我出現咗幻想，見到葉子朗呀～」
「你開心啦～一定發夢都笑醒啦～」靜愉笑起嚟
「如果嗰個唔係幻覺就好啦…」我伸手去拎牙刷同埋放喺水龍頭隔離嗰個膠杯
我將水龍頭開關向上推，水即刻就流出嚟
等到將膠杯裝滿咗三分之二我就閂咗水，然後擠牙膏
「如果係真係葉子朗就好啦～」我將牙刷放入口


「一大清早打電話比我就係咁講住葉子朗葉子朗…」靜愉嘅聲線夾雜住不滿同無奈
「Sorry囉～咕咕咕咕咕咕…」我呷咗啖水嚟漱口，然後低頭對住洗手盆吐咗啖水，「唔知同邊個講嘛，咪搵你開心share下囉～」
「你睇你呀，幻覺都開心成咁…」靜愉無奈咁答，「仲話真係佢喎…」
「嘻嘻～得你聽我講，咁梗係同你講啦～」我用面巾抹一抹嘴
「你嚟緊打算點呀？」靜愉靜咗一下之後再問我
「打算點？咩意思？」我行出廁所，輕輕閂上廁所門
「就係字面上嘅意思呀～」靜愉笑咗一笑
「唔知呀…」我拎住手機行番入房，一步一步咁行去書櫃前，好自然咁就伸手將佢嗰本日記擺落嚟
我拎住本日記行到床上，趴喺床上打開咗本日記
「咩叫唔知呀…」靜愉沒好氣咁講，「你嚟緊打算點做呀？」


「追番佢囉…」我拎咗疊memo紙出嚟睇
「見步行步呀？」靜愉問
「嗯。」我答
「唉…咁你加油啦…」隔住個電話，都可以感覺到靜愉係有幾無奈，「我仲係好眼瞓呀…」
「咁我收線先啦～你再瞓下啦～」我笑一笑道
「拜拜～」「拜拜…」
我收咗線，將電話放喺枕頭邊
一頁一頁咁掀着日記，一字一句細心咁睇
喺文字間將一點一點嘅思念滲透出嚟，喺名為「思念」嘅感情之中，夾雜咗無數個不捨同依戀
感覺就好似每當抬起頭望向夜空中嘅星河時，星星都變得不再耀眼，因為眼中只出現咗嗰個人一樣
「如果我早啲收到呢本日記就好啦…」我伏喺日記上，側住頭望住日記
如果一早就收到呢本日記…或者我同佢可以直接啲講出心聲
但如果唔係因為最近先收到，我或者唔會咁堅決咁要番轉頭
一切都係命中注定嘅存在，事先就已經被安排好…
「世事難料呢…」我無奈一笑，坐好起嚟，拎起日記，「日記呀日記…你話我知…我嚟緊應該點做好唔好呀…」


我將額頭輕輕貼喺日記嘅角上，合起雙眼祈求
「葉子朗…我唯一嘅思念…就只有你啦…」我嘅眉頭輕輕一皺
我相信，我同你會係彼此嘅最後，可能要花上一啲時間，但係…只要可以長相廝守，其實咩都唔算係困難
我緩緩睜開眼，然後用力咁攬咗本日記一下
我離開咗張床，行到去書櫃前面，將日記放番入原本嘅位置
我行到去窗前，打開窗簾，將兩邊嘅窗簾都開到最盡，用窗簾扣扣起，好等陽光照入嚟
但好景不常，今日天陰陰，天空上仲有灰色嘅烏雲
「睇嚟今日會落雨…」
我嘅心情，都因為外面嘅烏雲而沉咗落嚟…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link