(人稱:葉子朗視覺)
「唔…」我皺起眉頭
柔和嘅陽光穿過咗薄薄嘅窗簾照入嚟
我睜開雙眼,見到一個人伏咗喺我床邊瞓着咗
我伸出手,輕輕撫摸佢嘅秀髮,佢應該好攰啦…琴日放咗工之後,一直照顧住我
我用手撐起成個人,我感覺到的確比琴日好好多,但係仍然有啲發熱頭暈
方芷諾就好似感覺到我起咗身一樣,慢慢抬起頭,揉揉眼,佢望到醒過嚟嘅我瞬間就企起身
「你有冇好啲呀?仲有冇唔舒服?」佢企起身,伸手將我個枕頭斜放,扶我坐起身
「嗯…仲有啲頭暈…」我話
「睇下先…」佢伸手放喺我額頭上面,然後微微笑,「好過琴日啦睇嚟,你餓唔餓呀?」


「嗯…」我微微點頭,琴晚到宜家我都冇食過嘢
「煮個粥比你食好唔好呀?」髮絲喺佢博頭滑下,佢伸手將髮絲撩到耳背後面
「嗯…」我再點頭
「咁你再瞓多陣啦,煮好我再叫你好唔好?」佢露出溫柔嘅笑容,我嘅心就因為佢一個笑容而心動起嚟
「嗯…」我點頭,然後佢扶住我瞓番低
佢行到去我房門前,打開房門嗰陣又點頭望我
「你會唔會凍或者熱呀?風扇洗唔洗較大較細」佢柔聲道
「唔洗,咁樣已經okay…」我搖搖頭
「好啦~陣間煮好就叫你起身啦~」佢笑一笑,然後就閂上房門出咗去煮粥比我食
佢呢份溫柔,挑起咗我嘅霸道心…我想將佢嘅笑容、佢嘅溫柔,仲有佢嘅細心都一同收歸我所有…


我想要只有我一人擁有佢…
曾幾何時,我…都完全擁有過佢…一切都係只屬於我嘅存在…
唔知道嚟緊我可以幾時再完全擁有呢…
我偷偷落咗床,然後輕輕打開房門,盡量唔發出任何聲音,行到去廚房門口,我偷偷摸摸咁向前俯身望入去
方芷諾好忙碌咁樣煮緊粥,手上拎住一個裝鹽嘅膠盒,然後落咗小小鹽,然後又試一試味
下一個瞬間佢好自然咁就擰轉頭
「葉子朗!?」佢見到我之後嚇咗一跳,瞬間就皺起眉頭,放低手上嘅餐具行出嚟,「未煮好啦!你瞓多陣啦~仲有邊度唔舒服呀?」
佢企喺我面前,微微踮起腳尖,伸手放喺我額頭上
「呀!」佢突然間好似諗到啲咩咁嗌咗出嚟,「食完粥就食藥啦~」
「嗯…」我捉住佢放喺我額頭上嘅手,然後向下拉


「快啲番入去瞓多陣啦~」芷諾愕一愕然,然後又微笑道
「我喺廳度瞓…」我細聲咁講
「嗯,你瞓喺梳化度先啦,我入去拎被比你~」芷諾將我扶到去梳化
我灘咗喺梳化上面,佢行咗入房拎被出嚟比我
「咁你喺度瞓多陣,煮好叫你~」佢幫我蓋好被,然後行番入去廚房
呢個似曾相識嘅場景,一事一物都同過去掛勾…
我灘喺梳化上面,頭靠着抱枕再次合埋眼…

「葉子朗…葉子朗!」
我睜開眼,方芷諾就跪咗喺梳化邊,伸手拍緊我
「食得啦~」佢微微笑道,然後扶起我坐起身
我坐好之後,佢遞咗一碗粥比我
「你拎唔拎到呀?」佢問我
我冇出聲,只係望住碗粥
佢好似明白我嘅意思一樣笑一笑,然後用匙羹裝咗小小,然後吹一吹放到我嘴前


「小心熱,睇下夠唔夠味。」佢話
我食咗一啖,點點頭,芷諾即刻露出笑容
「會唔會太熱呀?」佢又體貼咁問道
「唔會…」我搖搖頭,細聲道
好快就食晒一碗,佢企起身,轉身拎咗張紙巾遞比我
「仲食唔食多碗呀?」佢問
「唔啦…」我搖搖頭
「咁你餓就自己食啦~」佢笑一笑,拎住空碗行入廚房洗
洗完之後佢拎住杯水行出嚟,又要食藥啦…
「食咗藥先。」佢將藥同水都遞比我
「咕嚕…咕嚕…」我飲咗兩啖水將藥丸沖落去
「你再休息下啦,有咩就打比我知道嗎?」芷諾企起身,行入廚房再酙咗杯水出嚟放喺枱面
「你走啦…?」我衝口而出問道
佢愕然咁擰轉頭望我,應該冇估到我會突然咁問
「我見你都好番好多啦…」佢微微一笑,「你接住落嚟應該都okay㗎啦~記得準時食藥知唔知呀?」


我靜咗五秒,然後先答咗一句
「嗯…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link