[真人真事][校園][純愛]《總有一天，會再次遇見》: 第五章

第二日返到學校
行緊上開班房嗰陣,
我就喺度諗,
一陣係咁易say個sorry啦
應該冇野嘅
你知啦,
萬一我唔講,
激嬲佢唔係最麻煩,
佢班兵仔先係重點
喺度代女神出頭


不過講開又講,
又唔係好見佢有好多兵
啲人都係同佢玩多,
冇話捧佢上天
咁就真係唔清楚
你知我啦,
完全唔係一個班上活躍份子
點會知佢地嗰啲人脈關係
多一事不如少一事啦,
同埋男人老狗,


say個sorry唔係好難啫
嗰陣我係咁樣諗,
之後上到去班房,
一坐低嗰陣,
就見到晞澄喺後面
可能佢見到我望住佢,
所以佢望返住我,
嚴格嚟講唔係望,
而係啤
同尋日一模一樣


即係話仲未嬲完啦,
以前好少見佢呢個樣,
唉,
以咩前丫,
其實都唔係識左佢好耐
唔知點解嗰一刻,
我竟然會淆底唔敢講
頭先我先話,
say個sorry唔係難事,
我諗我講錯左,
依家我覺得好難
我本來諗住佢冇野架嘛,
點會估到佢真係咁嬲
我又驚我講嗰陣,
前後左右會八卦咩事,


咁樣我就大鑊啦
啱啱先升上嚟中四,
就得罪人
仲要得罪一個人緣好嘅人,
但係另一方面就諗,
唔使咁小器下話
都係一個包啫
咁我真係冇其他包揀,
先至唔俾你
仲見你平時咁玩得,
咪同你玩下囉,
點知你竟然嬲埋啲咁小嘅事
我就係內心不斷掙扎,
久而久之,
嗰句sorry我就一路冇講出口.



跟住嗰排我同佢個關係完全冇改善
佢真係好記仇,
永遠大家對望嗰陣,
佢都係啤住我,
我真係知衰架
但真係唔識講對唔住
由細到大都係咁,
平時講就好易,
但係一去到真係要講嗰陣,
唔知點解個口就唔識郁
中間唔係冇機會架,
大家都知我同佢係坐隔一行嘅隔離
有時佢傳野俾我嗰陣,
我係有足夠時間同佢講,


只係我把握唔住
另一方面,
自己又唔衰得
覺得冇理由要同佢道歉,
我同佢嘅關係就係咁,
處於膠著狀態,
但係大家都知啦,
如果我地嘅關係一直都係咁,
我又點會喺度打呢段往事出嚟
中間梗係有轉捩點
好喇都係唔好講咁多廢話
去返當時先,
話說我地嗰個學校,
每兩個禮拜就要做一次閱讀報告,
會計平時分


就係咁所以好多人都幾緊張,
特別係要拎A嗰啲
閱讀報告呢啲分唔少得,
通常呢一個環節都係喺禮拜五嘅朝頭早做,
佢會俾兩個半鐘你做
所以有好多人都係即時睇即時做,
當然有啲就係抄
有啲就係作,
唔使問,
我就梗係作啦
本身唔係好鍾意睇書,
淨係鍾意睇偵探小說
其他類型嘅書就唔好搵我
好悶,
或者我真係冇文學氣息啦
我好記得嗰一日,
當老師派閱讀報告嗰張紙之後,
我就見到隔離嘅晞澄係咁搵自己個書包
檯面又冇書,
我當日估佢係想搵自己本書
跟住見佢舉手問老師可唔可以去locker,
咁樣我就更加肯定啦
我見佢起勢咁樣搵,
皺晒眉頭,
跟住唔知點解,
我就做左一樣好戇居嘅野
我竟然將我個本書,
靜靜雞擺落去個櫃桶度
點解要靜靜雞
因為唔想俾人發現
嗰陣個個已經埋頭苦幹咁樣做,
你依家問返我,
我都唔知點解當時會咁樣做
可能我自己當咁樣係同佢道歉呱,
之後我就舉手同老師講冇書
老師聽完之後梗係鬧,
同埋罰我小息要去借本書,
放學留低做
做晒先走得,
自己真係抵死
根本就係乸屎上身,
無啦啦扮乜野好人啫
跟住我見到晞澄係咁望過嚟我呢邊,
我就冇理到佢,
扮見唔到佢,
自己一個對住張閱讀報告紙發夢,
我知你地會諗,
點解咁似那些年
大佬真係唔係作
嗰陣真係咁樣
有時我都喺度諗,
嗰啲作家,編劇諗到嘅情節,
好有可能係用現實嚟做藍本
或者就係因為咁樣,
所以讀者先至會咁有共鳴