[真人真事][校園][純愛]《總有一天，會再次遇見》: 第二十一章

跟住嗰個禮拜,
我同晞澄真係一句野都冇講過
其實我唔係唔想講對唔住
不過大家知啦
認真咁樣講對唔住其實真係好難
我唔係想俾藉口自己,
但係我諗應該好多人有共鳴啦
明明諗就好易講,
但真係到你要喺個口入面吐出嚟嗰陣,
唔知點解你就講唔出口


特別係今次,
我次次想講嗰陣,
一望到佢個樣咁嬲
我就好自然咁樣縮沙
連平時上堂抄筆記,
有時我抄唔切,
我都係靜靜雞咁樣偷睇佢嗰份野
平時邊使咁折墮
所以話做野嗰陣真係要諗後果
以後真係唔敢亂玩


當然啦,
嗰陣嘅我真係唔知點解佢會咁嬲
明明佢都唔小器丫,
點解今次會嬲咁耐
同埋我嗰日明明見到佢好快就走咗,
冇同嗰隻狗公一齊
照道理佢冇咩損失丫,
點解咁嬲啫
跟住有一日,
晞澄個好姊妹就行咗過嚟同我傾計


喺度介紹先,
呢個好姊妹叫做呀穎
佢同晞澄真係好friend
基本上每一日都係一齊,
當然啦有時我同晞澄一齊走嗰陣,
呀穎就唔喺度嘅
但係平時多數都係一齊
不論食飯好返學都好,
佢兩個總係形影不離
有幾次我都想問晞澄係咪同呀穎識咗好耐
不過成日都唔記得問,
依家就更加冇得問啦
講返嗰個對話先
呀穎:「仲未同charlotte好返呀 」
我:「咁你都知 」


呀穎:「梗係知啦,
仲知你因乜野事激親人 」
我:「我都係玩下啫
不過佢好嬲,
完全唔想同我講野咁樣
我都唔知可以點 」
呀穎:「其實女仔就唔難氹
特別係charlotte 」
我:「係咩 」
呀穎:「假假地我都識咗佢好耐
我梗係知啦 」
我:「咁我可以點做
如果唔係我啲功課冇著落 」
呀穎:「你條友掛住抄功課
唉 」


我:「唔好唉住先
求對策呀靚女 」
呀穎:「你有冇誠意同佢講對唔住呢,
charlotte一定知嘅
更何況佢完全唔係小器嗰啲人 」
我心諗,
我都知呀媽係女人
但有咩方法先得架
我:「好深奧 」
呀穎:「講埋俾你聽喇,
charlotte每逢星期六就會去補習
一點半就會放
點知喺補習嗰度呢,
原來上次嗰個男仔(即係之前講嘅狗公),
佢有friend同charlotte一齊補


所以嗰個男仔就知道咗charlotte星期六個行蹤
嗰日個男仔都講咗,
佢話星期六會去等charlotte
諗住補完習就會去玩,
識做啦
再玩野嘅話冇人幫到你 」
我:「唔該晒 」

跟住嗰幾日我就喺度諗
佢講咗俾我知,
即係間接提議我要去現場啦
如果唔係使乜講俾我知係咪先
但係要做啲乜野真係完全唔識
鬼叫我冇經驗咩
之前都未試過氹人,


一條毒L係咁架啦
唔識我覺得好正常,
其實我好想問呀穎,
究竟晞澄鍾意啲乜
但係每一次喺學校,
呀穎嘅隔離就係晞澄
完全搵唔到空間點樣開口
即係要靠自己啦
當然啦,
如果約出嚟講對唔住,
我諗應該好過喺學校嘅
始終學校咁多識嘅人,
有時真係唔知點樣講
我又唔鍾意俾人知
冇計啦,
禮拜六我去現場等佢補完習啦
打少日機都要
唔係真係冇人俾我抄功課
喺嗰幾日,
晞澄同之前一樣,
完全冇睬過我
呢條友真係一個小器鬼
都唔知點解咁多人話佢唔小器
最慘我又抵唔住頸,
都係認返一次衰仔啦
始終真係坐隔離,
無謂搞到啲關係咁僵.