[真人真事][校園][純愛]《總有一天，會再次遇見》: 第三十章

跟住好快就散學禮

正式完結中四

你問我有冇感覺

老老實實真係冇乜

反而好期待暑假嘅來臨



咁樣喺最後一日嘅上課日,

成班話不如舉行完散學禮之後留低喺度玩

有人會訂pizza壽司嗰啲野

咁樣成班都冇異議

雖然嗰日我地只係放暑假而唔係真正嘅last day,



但係唔知點解好多人都有帶相機返嚟影相

我呢啲毒L就冇啦

都唔鍾意影相嘅

又點會隨波逐流呢

晞澄,呀邦有帶



呀邦嗰條蛋散仲話幫我同晞澄影一張相

佢條友成日都話我同晞澄係有野

我都講咗好多次只係晞澄搵我嚟過蹺

佢條友仔死都唔信

跟住我都冇解釋喇,

話知佢啦

呀邦:「過去同charlotte影相啦 」

希望大家都仲記得晞澄係叫做charlotte



當時啲人係叫佢charlotte多

我:「同個個都影架啦

冇話特別唔同邊個又或者特別想同邊個 」

呀邦:「信唔信你呀 」

我:「屎忽鬼咁你又問 」

之後我同呀邦真係搵咗佢影,

我:「影相啦契弟 」



晞澄:「同呀邦影就冇問題

同你就諗下先啦 」

我:「賤格

就唔同你影 」

佢條友真係衰

之前咁幫佢,

依家話影張相都唔制,

屎就有得食



我呢啲咁有志氣梗係唔會喺度乞求佢影啦

咁樣仲有尊嚴嘅

之後晞澄同呀邦影完之後真係走咗

拿拿臨搵第二個,

真係睇穿佢個人

打完齋唔要和尚就係呢啲

唔影咪算囉,



以為自己好乸巴閉.

舉行完散學禮之後就返返嚟班房

跟住就成班開party啦

大家都知有邊啲party食物架啦

跟住我發現原來晞澄係唔食菠蘿

因為菠蘿腸嗰啲菠蘿全部都係歸我

晞澄:「幫我食丫唔該

唔鍾意食菠蘿但係又唔想嘥 」

唔知大家有冇印象啦,

我嗰陣食嗰啲菠蘿腸係用一條牙籤拮住嘅

一嚿菠蘿一嚿腸仔梅花間竹咁樣,

跟住我就咁食咗佢個菠蘿

即係拎住一支籤擺喺個口嗰度扯

當時嗰支牙籤仲有一條腸仔

晞澄:「邊有人咁樣擺落口

咁樣我仲點食 」

我:「我就唔會用手攞嘅

費事整污糟隻手

唔知點食唔緊要,

俾我食埋咪得 」
晞澄:「估到你條友出埋啲蠱惑野


你就想 」

之後佢就咁食咗條腸仔(各位唔好諗錯隔離)

我:「唔使咁下話,

我諗住你唔會食架嘛 」

晞澄:「傻仔你以為啦

咁易俾你估到. 」

跟住嗰日嗰啲菠蘿腸全部都係咁樣食,

如果菠蘿係上面嗰嚿

咁就我食先

之後先俾晞澄

但如果腸仔係上面嗰嚿,

咁就調返轉係佢食先

之後先到我,

大家都冇用手攞

淨係用口扯出嚟

證明佢條友仔都好姿整

食野都驚整污糟隻手

其實我都係

依家諗返起嗰陣個舉動真係幾鬼曖昧

但係當時我地都好自然

完全唔覺尷尬

好彩班上面冇人睇到啫

如果唔係真係水洗都唔清

食食下跟住晞澄話叫我陪佢落去拎野,

仲話因為件野好重所以要幫手

原本我梗係話唔去啦

點知佢條友又係用功課嚟撻我

真係可恥

呢啲就係朋友喇

咁樣最後我梗係認命啦

點知落到去原來冇野要拎

嗰陣我真係想講粗口

咁辛苦行落嚟跟住話冇野拎,

搞到食少咗野

晞澄:「唔好意思呀真係記錯咗

唔好嬲啦搵咗你笨 」

我:「千辛萬苦跟你落嚟原來記錯

你係得嘅 」

晞澄:「今次我錯

既然落到嚟不如影張相啦 」

我:「唔係好q巴閉話要諗下先咩 」

晞澄:「講下笑啫唔好咁小器啦

梗係特登去返呢度影啦 」

我:「呢度有咩特別

點解要喺度影 」

晞澄:「話咗你要帶個腦出街

我第一次同你傾計嗰陣係喺度丫嘛 」

我:「係咪你喺我隔離教我做閱讀報告嗰一鑊 」

晞澄:「總算你冇唔記得啦.」

我:「嗰次真係唔該晒

如果唔係真係冇六點半都唔走得 」

晞澄:「有恩在先丫嘛

唔好講咁多喇影啦 」

跟住就求其搵條友幫我地揸機

呢張係我同佢第一張合照

我搭住佢膊頭影

佢個頭都挨咗落我個膊頭度,

跟住一下拤擦聲,

就記錄咗呢一刻,

其實嗰陣我完全唔知點解要喺度影

影相咋嘛又唔係啲乜,

仲覺得啲女仔麻鬼煩

要諗咁多野去影一張相

但估唔到過咗好耐之後,

我正正係做咗我口中所講嘅麻煩女人,

乜都諗一餐,

一講起時間,地點,食物等等,

我個腦就不其然會諗好多野.