[真人真事][校園][純愛]《總有一天，會再次遇見》: 第四十七章

跟住我地就開始溫書啦

同之前一樣,

我同晞澄都係喺星期一三五就會出嚟溫書

有一日幾特別可以講下

話說我同晞澄溫溫下書覺得肚餓



所以我地兩個就落咗去食野,

返到嚟圖書館,

晞澄見到佢個位多咗一張memo紙

memo紙嘅內容如下:

「我覺得你好靚女呀,



唔知道可唔可以做朋友呢,

我個msn:[email protected]」

我喺隔離睇都覺得尷尬

都唔知佢有自信好定係厚面皮好

我:「有人睇中你喎



晞澄:「都唔知邊個嚟 」

之後我地周圍望

好似冇乜邊個特別似會做呢啲野

我:「爽啦有男仔睇啱你 」

晞澄:「咁你就唔啱

呢啲野冇話爽唔爽

至少我唔覺得啦 」

我:「係咩



真係冇暗爽 」

晞澄:「冇呀

溫書啦 」

之後我地準備走嗰陣,

就有條友行咗過嚟

又叫佢做狗公啦

狗公:「你好呀靚女



你睇唔睇到張紙呀 」

晞澄:「睇到呀 」

狗公:「咁你可唔可以俾你msn我

又或者返到去我add你 」

晞澄:「唔可以喎

我唔鍾意同啲唔識嘅人傾計 」

狗公:「傾傾下就識架啦 」

晞澄:「你可以咁唔代表我可以咁喎



直覺上唔啱傾嘅話我就唔會同佢傾計,

亦即係好似同你咁樣 」

狗公:「咁呀

咁算數啦 」

之後嗰隻狗公就走咗

我:「你講啲野咁hurt佢嘅 」

晞澄:「如果我講大話第日仲hurt佢



我不嬲都係堅持唔鍾意嘅話就無謂拖,

俾假希望佢之餘又搞到我煩

倒不如一刀切 」

我:「係喎 」

其實我暗地裏梗係有少少爽啦

見到自己鍾意嘅女仔係自己面前拒絕男仔,

話冇野嗰啲就呃你

當然我都會極力隱藏呢個喜悅

嗰陣我地有時溫夜咗就會一齊食埋飯先返屋企,

其餘大致上都冇乜特別

咁我都唔特別講喇.

當時就梗係死讀難讀啦

辛唔辛苦

你問我就一定話辛苦啦

不過有乜計

以前唔夠勤力,

咁咪搞到依家吃力啲囉

好正常,

如果嗰日唔使同佢出嚟溫書

我都會自己喺屋企閉關

時間只會愈嚟愈逼切,

我已經浪費咗唔少時間

可以做嘅就只有善用嚟緊嘅日子,

有時我自己無聊嗰陣都喺度諗,

萬一我真係唔夠分原校升讀中六

我咪要同依家玩開嘅呢班人分開

雖然我都知學校要求個分數唔高,

不過唔高還唔高啫

我對自己都真係冇乜信心

雖然晞澄幫咗我好多

但係最重要嘅都係自己

其實打從心底我自己都好清楚,

呢一刻自己最著緊嘅,

除咗係自己玩開,傾開班朋友之外,

我諗都係得晞澄一個

有時有啲野唔知點樣當面同佢講,

同時亦都真係好難開口

所以我冇將呢個諗法講俾佢知,

我只會將佢當成一個動力去溫 ,

有時溫到真係唔想溫嗰陣,

我就潛意識去諗如果下年唔夠分會點樣

老實講我將呢樣野視作為一個鞭策,

當然我自己估,

如果我真係咁樣搵佢講,

佢都唔會託我手踭嘅

不過搞到人就唔好啦,

一個衰好過兩個人衰

同埋自己本身都係一個大男人,

其實好少同人傾訴

有啲乜野唔開心,煩惱嗰陣,

都係自己捱過去

咁多年以嚟都係咁,

唔係淨係呢一刻,

或者我曾經以為自己唔完全係一個大男人,

都總有一日會好似電視劇咁樣,

喺一個合適嘅場地同人訴苦

不過後來發生嘅事話俾我聽唔係,

無論程度點樣高都好,

我都仲係一個不折不扣嘅大男人

都係改唔到呢啲死要面嘅性格.