[真人真事][校園][純愛]《總有一天，會再次遇見》: 第四十九章

老實講,

入到去坐低考試

其實都真係冇乜特別

如果有溫書又點會緊張丫

根本冇時間俾你去緊張,



你嗰陣個腦應該係記住啲重點

之後就係咁寫落去,

係溫得唔熟先至會緊張嘅啫

因為左諗右諗丫嘛,

咁我記得考嗰陣都算可以啦



我就唔大期望,

唔需要太高分

合格就可以

考完之後出到學校,

準備返緊屋企嗰陣,



就收到晞澄sms

晞澄:「頭先識唔識呀 」

我:「唔錯啦

你呢 」

晞澄:「大家咁話

希望冇意外啦 」

我:「痴線梗係冇意外啦 」

晞澄:「好快又考第二課嚕 」



我:「係呀 」

晞澄:「繼續俾心機呀 」

我:「唔使你講都會 」

晞澄:「咁串咀架

都係想鼓勵下你啫 」

我:「係係係

大家都俾心機啦下 」



之後我地又繼續馬不停蹄咁溫書

邊有時間可以抖

我仲好記得考英文嗰陣,

嗰晚晞澄打咗俾我係咁講重點我聽

因為小弟咁多科入面,

英文係最唔掂嗰科

晞澄亦都知

所以咁多科嚟講英文佢最緊張,



我記得嗰晚由八點鐘傾到去十一點半

係咁話呢樣嗰樣乜乜乜乜

咁我當然冇偷懶啦

真係喺本筆記嗰度係咁抄低佢講啲乜,

其實有時我都唔好意思

要一個同學咁樣去幫自己,

雖然大家都係好朋友(嗰陣我自己覺得)



但佢聽日都要考試架

我都驚真係阻到佢

點知佢話唔阻喎

言行間仲極其囂張

我:「其實會唔會麻煩到你

講真嘅真係我都唔好意思

你聽日都要考 」

晞澄:「你都傻嘅

你知唔知我咁樣教你其實可以幫埋我自己

你估真係無條件咩傻仔 」

我:「你咁講就得

到時考得差唔好賴我 」

晞澄:「你放心我唔會咁 」

第二日考完之後又即刻打俾我

問我考成點,

平時考完之後都係sms就算數

唯獨呢一科佢真係幾緊張我

證明佢都係好朋友

雖然有時把口衰啲,

不過見到係真心緊張我個成績嘅

有時自己一定分到邊啲人先係真心,

特別係中學階段

因為嗰陣個世界唔係依家出到嚟做野咁功利,

你話純真好天真又好甚至係低能都好啦

總之嗰陣我身邊個世界的確係咁樣.

之前都講過啦

考數學嗰日,

我同晞澄間學校只係喺隔離

所以嗰朝我地一齊食早餐

晞澄:「陣間考完我過嚟搵你丫

你唔好走呀 」

我:「你放心我唔會走數

我都仲記得應承咗 」

晞澄:「真係咁好記性 」

我:「梗係啦呃你做乜 」

之後晞澄又喺度笑

我:「無啦啦又笑乜 」

晞澄:「講你都唔知架啦哈哈 」

我:「你唔講我梗係唔知 」

晞澄:「開心咪笑囉 」

我:「我都知,

咁係因乜野而開心 」

晞澄:「唔話你知 」

我:「你條友真係好自私

連笑乜野都唔同人講 」

晞澄:「係喇係喇係喇

你當我笑你記性好咗囉

你知你條友啦平時都唔記野嘅 」

我:「你就唔記野

自從上年暑假之後不知幾勤力 」

晞澄:「咁我都知嘅

你平時有冇認真溫書我都唔係盲,

真係落咗好多心機落去 」

我:「終於講返句人話 」

晞澄:「得返幾科頂埋落去

唔好話你有時連我都溫到好攰

所以我都知你係辛苦嘅 」

我:「無啦啦咁認真嘅 」

晞澄:「我當自己鼓勵緊寵物咋 」

我:「不過你講得啱嘅

得返幾科頂埋落去啦 」

晞澄:「考完就一身鬆嚕 」

我:「我唔敢咁樣諗呀,

我知自己一鬆懈就玩完 」

晞澄:「笑又唔代表鬆懈嘅

有時放鬆下個腦先至諗到野 」

的而且確,

如果套諸於今日嚟講,

晞澄佢個笑容的確係好治癒(利申呢個詞語我係唔知點解同埋喺邊度出嚟)

或者咁講啦,

對其他人嚟講可能冇乜感覺,

但我諗我個感覺應該係比較深嘅一個

我都係大個咗先諗返起,

原來以前真係成日同佢一齊,

起碼有唔少關鍵時刻,

喺身邊嘅都總係有佢.