[真人真事][校園][純愛]《總有一天，會再次遇見》: 第五十四章

去到中六,

我同晞澄都繼續喺星期一三五

會落去學校圖書館溫書

因為大家都知,

A Level難度更加大



所以就話不如繼續溫書啦,

我亦都搵唔到拒絕嘅理由

就係咁,

基本上每一個禮拜生活模式都係咁樣

好彩嘅係我同佢都冇乜課外活動



除非真係唔得閒,

如果唔係個個禮拜嘅生活係完全冇改變

一去到考試嗰陣,

我地同之前一樣,

會去圖書館溫書



溫夜咗咪食埋夜晚,

又或者有時佢屋企冇人,

而嗰日又要溫書嘅話,

咁都會一齊食埋先返屋企嘅

我有時都問佢,

咁樣日日讀會唔會頂唔順

晞澄:「冇計架啦

第時張成績表唔好睇就乜都冇,



自己又唔係叻過人

係要將勤補拙架啦 」

我:「你咁樣都唔叫叻過人

咁樣會考低你幾分嘅我咪垃圾 」

晞澄:「你平時懶啫

其實我以前成績都唔係好

係去到有一日醒覺,



覺得唔可以再係咁懶

跟住先係咁讀書 」

我:「中間發生咩事

一定有啲野令到你改變 」

晞澄:「其實真係冇乜特別

可能慢慢大個,

知道呢個世界係點樣玩

咁咪開始勤力啲,



再加上呀穎佢地亦都一齊勤力讀書

你知啦我地呢啲中學生,

隔離嗰個話做嘅話,

自己就肯做架啦 」

我:「係喎你呀妹依家點丫 」

晞澄:「個衰妹好乖

完全唔使屋企人擔心



點呀你想對我個妹打咩主意 」

我:「傾開問下啫

唔使起晒槓 」

晞澄:「你知每個家姐都好緊張細妹架啦

如果關係好嘅話 」

我:「我係要打主意呀,

係都對住你打啦 」

晞澄:「你

講咩呀 」

我:「唔係咩

我要溝你個妹不如溝你

熟又熟啲亦都方便落手 」

晞澄:「咁你又唔咁做 」

我:「我都係講下笑啫 」

晞澄:「對住女仔講呢啲笑都有嘅

好彩我同你熟如果唔係真係以為你講真 」

我:「我梗係知你唔會誤會先同你咁講啦

容乜易你會避我 」

晞澄:「到時我就當你係變態佬

係咁走呀哈哈 」

其實我真係講真,

要溝女嘅話只會溝你

我就唔識大海撈針,

如果要識女仔,

淨係會識自己鍾意嘅

不過自己知咩事,

所以先至可以咁輕鬆講出口

我當我自己講咗喇

唔係認真講,

起碼冇代價丫嘛.

時間過得真係快,

轉眼又嚟到今年聖誕

唔使問都知啦,

晞澄又搵我影相

佢話前年喺地下

上年就係圖書館

不如今年喺班房啦

咁我當然冇意見啦,

影相嘅野我從來交俾女仔

我呢啲毒男邊度識影相

影完之後夜晚佢就俾返張相我

跟住我再拎呢三年影嘅相嚟睇,

原來大家個樣好似真係有少少分別

晞澄好似真係愈嚟愈靚

我就

唉唔好提喇

唔知佢有冇save低呢啲相呢

我估有掛

不過可能只係因為有自己喺度,

所以先留低,

而唔係關我事

我都係間唔中先ff下啫

唔係好過分呱

跟住有一日佢問我平安夜出唔出嚟玩

晞澄:「平安夜你唔準走 」

我:「做咩事呀

無啦啦點解唔俾人走 」

晞澄:「你唔記得我約咗你咩

你嗰陣仲話冇人早過我,

唔好走數呀 」

我:「又好似真係有咁講 」


晞澄:「聖誕喺屋企打機咁慘,

下年我約你囉.」

我:「好,

如果我冇死又或者冇反面咪得囉.」

晞澄:「啋過你把口,

我同你約實咗架喇,

我就唔信有人早得過我.」

我:「冇,

記得先算啦.」

晞澄:「睇下點.」


晞澄:「嗰晚我地成班會出嚟,

你睇下呀邦佢地出唔出

多啲人一齊玩啦 」

我:「佢地成班人梗係冇所謂啦

佢地都冇意見嘅 」

晞澄:「咁好啦,

知唔知呢個聖誕係今年我地第一次一齊過 」

我:「係咩真係唔知喎 」

晞澄:「你個腦有冇裝野

乜都唔知架 」

我:「你記得咪得囉哈哈 」

晞澄:「咁好啦到時再約時間啦 」

我:「嗯 」

其實,

我都係嗰句,

佢以前真係俾咗好多提示我,

只係我個腦真係一路都冇裝野,

全部都覺得係理所當然,

我一路諗呢單野嗰陣,

一路都好怨恨以前呢個咁蠢咁鈍嘅自己,

其實我好少會怨恨一樣野,

因為我覺得凡事都有補救嘅餘地,

下下去鬧我覺得對件事幫助唔大

不過對於以前嘅自己就唔係咁,

喺度好簡單講一句做總結,

時間過咗又點可以補鑊呢.