荒島日記（新手、後宮甜）（不定期更新）: 生病

我地一直跟住馬騮仔行，其他馬騮見到我地行過黎，即刻分成兩邊不停咁退後，生怕我地會突然攞火把燒佢地，來福一邊行一邊發出凶狠既聲音。

「隻馬騮仔想帶我地去邊撚度啊？」
辣椒妹問我。

「唔知啊，依家跟住佢行啦，等陣應該就知發生乜嘢事。」

「佢一定係搵左好多大馬騮埋伏我地，然後趁我地唔注意，即刻搶走我地既火把⋯然後強姦曬雪兒秋儀辣椒妹⋯再強姦我地兩個既耳仔⋯死啦死啦⋯點解我會跟你地走入地獄㗎⋯」
文健講完擺出個吶喊樣。



「屌你老母！少出句聲嚇人啦！」
辣椒妹講完打左文健個頭一下。

行左半個鐘左右，我地差唔多到湖個邊，依附近種左好多香蕉樹，唔怪得D馬騮選擇係依度定居啦。

「大陸仔！你睇下！」
雪兒嗌左一聲，指住前方一舊大岩石。

我即刻望雪兒指住個方向，發現有好多馬騮集結係個度，圍住舊接近三米高既大岩石，D馬騮見到我地行過黎，來福個樣實在太凶狠，我自己見到都驚，馬騮們隨即退後幾步，不停發出嗚嗚嗚嗌聲。



「你睇下⋯真係埋伏我地啊⋯死啦死啦⋯」
文健恐慌起黎

突然十幾隻馬騮連埋一齊，禁止我地走近大岩石邊，搞乜鬼啊？我攞住火把走上前，D馬騮即刻好驚恐咁一邊望住我，一邊係咁大叫，但佢地並無離開舊岩石，依然死守住。

「D馬騮唔係怕火咩？點解仲唔跑既？」
雪兒問到。

「可能舊岩石有古怪，所以佢地先會死守住佢。」



隻馬騮仔甩開雪兒隻手，跑到班馬騮面前，發出幾聲嗚嗚嗚，班馬騮聽到後即刻散開曬，形成兩邊望住我地。

（隻馬騮仔咁有號召力？）

馬騮仔直接爬上舊岩石上，我地係旁邊走上去，舊大岩石上面，訓住左一隻係我目前見過最大隻雄性馬騮係度，旁邊有唔少嘔吐物。

有隻大馬騮都走左上黎，攞枝長滿樹葉既樹枝掃走D嘔吐物，馬騮仔抓實雪兒隻手，嘴不停嗚嗚咁叫，好似係度求咁D咩？

「大陸仔，隻大馬騮好似係病左啊，馬騮仔係度求咁我地救佢啊。」
雪兒嘴扁扁同我講。

突然下面嘈吵聲一片，我轉身一望下面，一大班馬騮無一例外，全部都係度流馬尿，有D互相攬住喊，有幾個甚至喊到係地上碌黎碌去。

「大陸仔⋯你救下隻大馬騮啊，佢個樣好辛苦啊⋯」
雪兒走過黎抓住我隻手。



「我都唔係獸醫啊⋯我點識醫佢啊⋯」
我解釋返俾雪兒聽。

「你試下啦⋯我知你一定得㗎⋯你就救下佢啦⋯」
雪兒講完之後，隻大馬騮又再次嘔。

班馬騮聽到嘔吐聲，佢地嗌得更加淒厲，更加悲傷。

「你睇下⋯你再唔救佢⋯佢可能會死⋯」
雪兒講講下，雙眼瞬間出現淚光。

（唉⋯雪兒又出必殺技⋯我最驚見到雪兒喊⋯）

「係啦係啦⋯我睇下啦⋯但我唔保證醫得返佢啊。」


我摸一摸雪兒個頭。

「嗯⋯」
雪兒緊緊攬實我。

我走去大馬騮身邊，係馬騮仔既帶領下，其他馬騮好安靜，無大叫無反抗，俾我接近隻大馬騮，我諗依隻病左既大馬騮，應該係佢地既大佬黎。

我摸一摸隻大馬騮，隻大馬騮身體好凍，而且佢成日摸住個肚，佢可能係凍親，或者係寄生蟲導致咁樣。