荒島日記（新手、後宮甜）（不定期更新）: 抹黑
「學東哥～醒未啊？學東哥～」
秋儀不停推咁仲係睡夢中既我。
「秋儀，你咁樣係叫唔醒佢㗎。」
辣椒妹講完，即刻往我面上刮左一巴。
啪！
「洗唔洗咁樣叫醒我啊！」
我跳落張床，辣椒妹笑住咁拖住秋儀跑出山洞外，我跟埋衝出去，雪兒去完河邊洗完面返黎。
「你個辣椒妹，竟然打我。」
我抓住辣椒妹雙臂，辣椒妹仲繼續笑。
「東哥！早晨啊！」
我轉頭一望，見到達叔攞住D行李走過黎。
「達叔，早晨啊！依家搬過黎啊？你兩個女朋友呢？」
我只見到達叔自己一個，而佢兩個女伴並唔係度。
「我攞住少少嘢過黎先，夜少少就搬過黎，佢地兩個依家煮咁午餐。」
達叔講完便走到附近既山洞，同我住既山洞相隔十米左右。
「東哥！你過黎啊！有D想同你傾幾句，三位阿嫂！我同東哥傾幾句！東哥好快返黎！」
達叔鬼鬼祟祟咁招手。
我回頭望一望三女，三女聽完達叔叫佢地做阿嫂後，雪兒含情脈脈咁望我，辣椒妹亦怕醜起黎，秋儀更加用手遮住塊面，不過都睇到佢面紅曬既樣。
「人地叫你過去啊⋯仲唔快D過去⋯」
雪兒好怕醜咁推左我一下。
於是我便走去達叔個邊，達叔坐左係地下，然後示意叫我坐低。
「乜嘢事咁神神祕祕啊？達叔。」
「喂，成個營地都知你同雪兒辣椒妹佢地既關係啊，你要小心D啊。」
達叔好謹慎咁講。
「知道又點？」
我並唔理會其他人既看法。
「小心D好，因為營地個幾個男仔都睇中你既女朋友啊，連陳總都好似對雪兒有意思，你依家成為營地既公敵。」
達叔望住營地個方向。
「雪兒咁靚女，係會引到個班色狼。」
我都估到會有依家個情況發生。
「營地班女，都唔係好妥你。」
達叔拍一拍我膊頭。
「吓？連班女都唔妥我？唔通佢地係同性戀？佢地對我D女女有意思？」
我真係搞唔明點解得罪班女。
「唔係啊，而係有人話，你係個好鹹濕，以前有非禮案底，又話你係個好食懶做既人，而且仲經常恩將仇報，去害幫助你既人。」
達叔細細聲咁講。
「吓？達叔你認為我會係依D人咩？」
「我信你唔係，但營地個度所有人都覺得你係咁既人呢。」
達叔避開我既目光。
「達叔，你女伴係唔係都覺得我係咁既人，所以無跟你出黎？」
我終於知道點解得達叔自己一個。
「嗯⋯佢地話過多一排先再過黎⋯唉⋯⋯」
達叔講完便得低頭。
「究竟係邊個係營地唱我？」
我真係想知同邊個咁大仇口。
「全部都係文健講㗎，佢仲發毒誓，如果係假既就冚家剷咁話。」
達叔學文健舉三指發誓。
「乜嘢話！文健！！！」
我嬲都企起身，想走過去營地打佢一鑊。
「東哥，冷靜D，你聽我講埋先啦。」
達叔拉返我坐低。
「佢究竟係點樣講㗎？」
我一邊拉筋一邊講，依一刻真係恨不得將佢煎皮拆骨。
「文健話，你地係兩座山後面個沙灘相遇，原本佢未黎之前，佢同雪兒生活過得唔好，佢出現就⋯」
達叔有口難言咁。
「佢出現之後點啊？」
「佢出現後解決曬大家既糧食問題，又話你一開始扮到幾好人咁，又跟住佢打獵，點知你唔識打獵，仲搞亂佢，好幾次害到佢獵物都跑走，食嘢唔做嘢，做嘢打爛嘢。」
我聽完嬲到手握起拳頭。
「之後佢捉到唔少獵物，你就偷襲佢，搶走曬佢D食物，然後攞返去俾雪兒佢地，取得佢地既歡心，離間佢同三位阿嫂既感情，佢話佢咁好人幫你，令你唔好挨餓，但你竟然咁樣害佢，佢大人有大量原諒你啦，到左依度，佢要離隊，你就收曬佢打獵既狼肉，搞到佢得返半隻。」
達叔學住文健既語氣講。
「文健個仆街！顛倒是非！我要打死佢個仆街！」
我嬲到企起身，突然有人從背後攬住我。
「唔洗理佢地，我地知道你清白就得啦。」
雪兒係我背後攬住我講完，便錫左我塊面一啖。
我回頭望過去，雪兒秋儀辣椒妹已經係我背後。
「係囉，我地都唔係住係營地，洗撚睇佢地面色啊！」
辣椒妹橋住手係一邊講，對木瓜奶咁樣夾一夾，顯得更加大。
「文健將自己同學東哥調轉黎講都有,枉我地對佢咁好。」
秋儀講完後有D扁扁嘴。
「達叔，你返去同你女朋友講啊，大陸仔絕對唔係D咁既人，我雪兒可以保證！文健先係恩將仇報既人！」
雪兒誠懇咁望住達叔。
「嗯！我依家返去同佢地講，我一直都好相信東哥唔係D咁既人！」
達叔講完便跑返去營地。
三女一齊安慰我，令我平復返心情，我望一望個天空，突然靈機一觸，係wor，點解我無諗過依個辦法。
「雪兒，秋儀，辣椒妹，你地三個係度煮嘢食先，我出去一陣好快返。」
我講完便把開山刀收係背後。
「唔好打交啊⋯唔洗咁在意佢地既想法啊⋯」
雪兒有D擔心咁攬住我。
雪兒肯定以為我攞開山刀去斬文健個仆街啦。
「唔會打交，我只係去取材，用黎打獵既，放心啦。」
我摸一摸雪兒頭髮，安撫下佢後，便走去河上游個方向。
我記憶中，我要搵既嘢，應該係河上游既樹林係最多同最粗既啦。走左一陣，終於到左上游既樹林。
「係依D啦。」
我讚嘆咁摸住又粗又長既樹藤。
上游既樹木比其他地方都茂盛，因為依個位長期都有太陽曬住，佢地既又有充足既水分。
我思考左一陣，如果要整個又大又堅韌既話，就需要好多樹藤去做，於是我爬上樹，斬左數十條樹藤落黎，然後抱起D樹藤跑返去山洞方向。
沿途見到營地班女係度打獵，班女見到我，即刻停低手腳望住我。
「喂，係佢啦，今日講個仆街係佢啦。」
個女仔邊講邊用手指住我。
「點解雪兒會鐘意依個仆街㗎？」
「佢比起陳總還要壞多了，恩將仇報的混蛋！」
其中一個大陸女人死盯著我。
「佢攞住個D係咩啊？樹藤黎既wor！咁多樹藤，唔會係俾雪兒佢地食啊嘛。」
「真係無講錯佢，佢真係食嘢唔做嘢，做嘢打爛嘢！個日捉雞仔就知佢咩料啦！」
依班女人越講越大聲，好似驚死我聽唔到咁，不過我都費事同你地吵，拿拿聲返去整好D樹藤就去打獵。