荒島日記（新手、後宮甜）（不定期更新）: 捕獵

同四眼妹講完再見後，我同秋儀便行左十幾分鐘，一直都無遇到營地既人，因為⋯⋯

秋儀忍唔住問。
「學東哥⋯點解我地行入樹林裡面既⋯而且前面就係山⋯」

無錯，我地一直遇唔到營地既人，係因為我地行入左樹林裡面，營地既人見過三男五女既事情後，佢地係絕對唔敢太過深入樹林裡面打獵。

「依度無咁嘈，最適合打獵。」
無營地個班人既嘈吵聲，真係好舒服。



秋儀左右望一下。
「但係⋯但係依度無河無海⋯都無魚可以捉⋯」

「我都無話過個網係用黎捉魚既。」
我得確無講過個網係用黎捕魚。

「咁個網用黎捉咩㗎？」
秋儀疑惑咁望我。

「捉依D囉！」


我指住個天，秋儀跟住望上天空，見到數十隻海鷗係山頂既天空飛翔。

「捉雀仔！！」
秋儀好興奮咁。

「行啦，我地上山去捉啦，依度唔夠高啊。」

「嗯～」
秋儀走過黎拖住我隻手。




其實依個方法捉海鷗我都係聽人講既，希望依個方法真係掂啦。


我同秋儀走到山腰既位置，見到有棵幾高既人樹。
「秋儀，我地就係依度捉海鷗啦。」

於是我爬上樹上，將個網吊掛上高一D又粗既樹枝上面，然後攞其中一隻被繩吊住既老鼠仔掛係下面既樹枝。

我爬返落樹，捉住係樹上吊掛既藤網另一邊，然後拖住秋儀躲係其中一個草叢裡面，偷偷觀察有無海鷗飛過黎。
「學東哥⋯」

「噓⋯唔好講嘢，會嚇走D獵物㗎，靜靜咁係度等就得啦。」

「嗯。」


秋儀望返吊住係樹上既方向。

樹上被吊掛既老鼠仔不停咁發出嘰嘰既聲音，而且又係咁掙扎，搞到佢係樹上不停咁左右擺動，前後左右咁搖晃。

被吊係樹上既老鼠仔，可能知道自己就快要死，佢既嘰嘰聲叫得更加淒厲。

我就係想隻老鼠仔不停咁叫，不停咁掙扎，因為咁樣先可以吸引到天上既海鷗注意，佢地先會飛落黎抓隻老鼠仔。

等左成十分鐘，天上仍然有好多海鷗係度飛黎飛去，但無一隻發現到樹下面有隻老鼠仔晚餐。

「學東哥⋯點解⋯」
秋儀有D失落咁望住我。

個方法唔會係漏嘢啊嘛⋯如果捉唔到⋯點樣返去同雪兒辣椒妹交代啊⋯聽日後日點樣解決糧食危機⋯正當我想放棄既時候。



吖！
一隻海鷗係天上發現吊係樹上既老鼠仔，於是俯衝飛去老鼠仔個方向，睇黎隻海鷗發現到老鼠仔啦，佢伸出利爪，準備抓住掙扎中既老鼠仔。

「機會黎啦！飛雲！」
我即刻鬆手，高處既藤網即刻跌落黎，海鷗抬頭望到，加快速度拍翼想飛走逃離，但好可惜，已經太遲，佢已經被網包住跌左落黎。

「學東哥！捉到啦！捉到啦！」
秋儀好興奮咁跑出去。

吖！吖！
網裡面既海鷗不停咁大叫，不停咁拍動對翅膀，但個樹藤做成既網都有D重量，而且又咁堅韌，所以佢係絕對走唔甩。

我係附近執起一條粗身實淨既樹枝，然後走過去，對住係網裡面瘋狂掙扎既海歐個頭部，一棍毆落去。

啪！


我隱約聽到骨頭碎裂既聲音。

海鷗俾我依一下打到吐血，掙扎左兩三秒後就死左。我將隻海鷗從網裡面拉出黎，ok，都幾重手，睇黎夠食兩餐！

「好嘢！今晚有雀仔食！學東哥！你好叻啊！」
秋儀走過黎錫左我一啖，然後好開心咁係度跳舞。

「我地仲要捉多兩隻㗎，依度我地去另外一邊再捉過啊。」
說罷，我攞住隻海鷗同個網走去另一邊，秋儀亦都停止跳舞跟過黎。

於是係另一邊行左五分鐘，我又再搵左棵較高既樹，又好似頭先咁樣重新佈署，同秋儀係草叢裡面等待海鷗既飛過。

兩分鐘後，又有隻貪婪既海鷗俾老鼠仔既叫聲吸引左過黎，我再次撒網，隻海鷗跟住個網跌落黎。

吖！吖！吖！


隻海鷗係個網裡面垂死掙扎。

「兩隻雀仔啦！」
秋儀蹦蹦跳跳咁去到個網面前。

隻海鷗俾我毆左幾下就死去，我拖佢出黎，佢巨大既翅膀出現係我地面前，同頭先個隻海鷗形成鮮明既對比。

嘩！頭先個隻海鷗應該得三斤左右，但依家依隻就大隻好多，應該有成五斤，發達啦！依幾日唔洗驚餓親啦。

「好！再捉多一隻！」
因為應承左分三分一俾四眼妹，D老鼠仔又係四眼妹既。

我同秋儀再向前走五分鐘，然後搵到棵大樹後面又重新佈署。

但今次我地係草叢躲左十幾分鐘，一直都無海鷗飛過黎，唔通D海鷗精左？知道同伴中左陷阱無返黎？

「學東哥⋯係唔係俾D海鷗知道左啊？」
秋儀係我旁邊擰個頭問。

「無奶油啊⋯我印象中海鷗應該係好貪心唔怕死㗎，佢地見漁船有人都照搶魚。」
係我仲思考咁既時候，天空中出現了一把叫聲。

咕！咕！咕！
我抬頭望去，數十隻海鷗到處亂飛，亂到好似有大難臨頭咁，而佢地身後有隻大佢地成倍既黑影急速追住。

個黑影係⋯係獵鷹！！

隻獵鷹三兩下就追到一隻飛得慢既海鷗，然後用佢堅韌鋒利既利爪，將隻海歐爪傷，受傷既海鷗隨即墮下。

bom！隻海鷗跌左係我地面前五米。

wow！運氣有無咁好啊！竟然跌係我地面前，慳返D力氣唔洗捉！

但係隻獵鷹爪跌佢，獵鷹應該會飛落黎，都係唔好去執雞啦⋯太危險⋯

我望一望身旁既秋儀？秋儀呢？

我望返跌落黎既海鷗方向，秋儀已經跑到係旁邊，好開心咁跳舞，而隻獵鷹係上空見到秋儀後，即刻俯衝落黎，我望到佢尖尖既鷹嘴⋯大禍⋯

「秋儀！小心啊！」

「嗯？學東哥？」
秋儀完全唔知有危險，企左係海鷗旁邊。

我全速跑過去秋儀個方向，望住隻獵鷹仲係上空俯衝落黎，如果秋儀俾佢個嘴拮到，唔死都會重傷⋯

「秋儀！」
我飛撲攬住秋儀訓低係地上，然後攬住佢，手臂保護佢個頭，碌左幾下洩返我飛撲個度力。

咕！咕！咕！
我地望去叫聲既方向，獵鷹俾我個網壓住左，應該係我啱啱鬆手去救秋儀既時候，佢俯衝落黎咁啱俾個網壓到。

我望住懷抱中既秋儀。
「秋儀，你無事啊嘛？」

秋儀指住個藤網。
「我無事啊，學東哥⋯個網好似受唔住啦⋯」

獵鷹不停咁拍打佢巨大既翼，嘗試擺脫個網，個網俾獵鷹托起左少少，睇黎個網對於依隻獵鷹黎講，真係細左少少。

「秋儀躲係樹後面先，依度好危險。」

我握起粗樹枝走過去尾刀，隻獵鷹係網度見到我行過黎，叫得更加大聲，加速拍打翅膀。

啪啪！啪啪！
我對住個網連續毆左十幾秒，隻獵鷹先奄奄一息，無再掙扎。