荒島日記（新手、後宮甜）（不定期更新）: 關係
啪！
神秘人一掌拍在檯上。
「大衛劉個計劃唔係好周全既咩！點解會有生還者出現㗎！仲要發出求救訊號！」
西裝男聽到神秘人咁大火氣後，嚇到瑟瑟發抖，繼續得低頭無望神秘人。
神秘人起身走到西裝男面前，然後用手捉起西裝男既衣領，揪起西裝男望住自己，西裝男近距離望到神秘人充滿血絲既眼睛，嚇到腳軟。
神秘人微笑咁問。
「啲炸藥，好似係你負責既何？」
原本西裝男已經俾神秘人既笑容嚇到心寒，突然聽到神秘人咁講，身體就震得比頭先犀利，汗水仲不停從頭上流落嚟。
「bo⋯boss⋯」
神秘人一嘢用力推西裝男到牆邊，令西裝男撞到流鼻血，神秘人憤怒咁講。
「你唔好以為我唔知你食夾棍！」
西裝男聽到神秘人既說話後感到恐懼，以為自己做得天衣無縫，點知都係比佢發現到⋯
神秘人看到西裝男既表情，就知道食夾棍單嘢係真既。
西裝男跪係神秘人面前。
「boss⋯對⋯對唔住⋯boss⋯」
「你個仆街！如果個炸藥份量足夠，依家就唔洗出現依單麻煩嘢！」
神秘人講完後，便一腳踢去西裝男個心口，令西裝男倒地。
西裝男用手按住心口，忍住痛楚，連滾帶爬咁爬返到神秘人面前，然後把頭壓到地上。
「boss⋯好對唔住⋯我知錯⋯對唔住⋯我會嘔返筆錢出嚟⋯boss⋯」
神秘人憤怒地指住西裝男。
「如果唔係睇在你同我打江山咁多年既份上，我一早就掉你落公海喂鯊魚！」
西裝男繼續瑟瑟發抖。
「bo⋯boss⋯俾次機會⋯我一定會努力完成⋯boss⋯俾多次機會⋯」
「好！我就俾次機會你！你同我搵人整多幾十個依啲錄音，然後係世界唔同地方發出嚟，務求以假亂真！知道未！」
「知⋯知道！」
「咁仲唔快啲去！」
神秘人對住佢咆哮。
「係！」
西裝男立刻起身，然後快速走出門外。
神秘人見西裝男出去後，然後拉開開櫃檯，攞起電話撥打。
「喂？幫我搵班人返嚟，最好熟悉航海，價錢方面唔係問題⋯⋯」
——將軍澳華人永遠墳場——
一名男人攞住扎鮮花，慢慢走入墳場裡面，然後停留係其中一個墓前。
男人放低鮮花，然後講。
「老婆，你最近幾好嗎？」
「仲有無好似以前捱夜唔訓啊？」
「記得每次洗完頭都搖吹頭髮啊。」
「以前你唔係好鐘意阿強啲歌既？我最近終於搵到佢既黑膠唱片，不過有啲貴。」
「你話成日飲咖啡對身體唔好，咁多年嚟，我終於戒到啦。」
「你睇下你，仲係好似細路咁咁鐘意玩，塊面污糟曬都唔抹。」
男人從袋裡掏出手巾仔，然後慢慢咁抹墓上既照片，抹下抹下，眼睛朦朧一片，個鼻感到酸酸地，淚水開始從眼角湧出嚟。
男人忍住淚水講。
「老婆⋯對唔住⋯」
男人望一望張相，眼淚就忍唔住不斷咁流，鼻涕亦開始流出嚟。
「老婆⋯對唔住⋯係我唔好⋯係我衰⋯我無好好睇住雪兒⋯」
「雪兒⋯去旅行⋯發生左啲事⋯依家人又搵唔到⋯屍又搵唔到⋯唔知佢生定死⋯老婆⋯好對唔住⋯」
「你唔係我身邊⋯依家連雪兒都唔係我身邊⋯我⋯我都唔知以後點算⋯」
「你以前成日同我講⋯我係一家之主⋯唔可以咁容易流馬尿⋯要堅強啲⋯但係⋯但係今次⋯我真係好難⋯」
突然墓碑上既相中既女人亦開始流淚，男人用手背抹走眼淚，然後抬起頭望一望天空，原來係天空突然下起微微細雨，滴到張相上。
「老婆⋯究竟我可以點做⋯」
///數日前///
秘書係門口講。
「雅典娜女神號其中一個遇難者既家屬，林雪兒既爸爸，林業因博士。」
神秘人沈默左一陣。
「林業因⋯⋯叫佢上嚟。」
「係。」
秘書即刻通知大堂保安，將林業因博士帶上五十樓。
一分鐘後，房門打開，走進一位俾人感覺和藹可親文質彬彬既中年男人，佢就係林雪兒既父親，林業因博士。
佢十分喜愛科研研究，人未到半百，就已經研發出唔少新時代科技出嚟，有唔少新技術都有佢既專利權。
秘書好禮貌咁引領林博士入去。
「boss，依位就係林業因博士。」
神秘人點點頭。
「好，你可以返出去，順便通知所有人，今日我咩人都唔見。」
「係。」
說罷，秘書便快速走出房間。
「好耐無見。」
神秘人好冷淡咁講。
見到神秘人肯見佢，林博士如見到希望。
「大佬，好耐無見。」
神秘人嘴角上揚，不屑咁望左林博士一眼。
「乜你，你仲認得我係大佬既咩？」
「大佬，我⋯」
林博士想走過去捉住神秘人隻手，神秘人即刻舉手拒絕。
神秘人示意林博士坐對面既梳化。
「林博士，你都係叫我做林總好啦。」
林博士愕然左一下。
「大⋯林總，我今次嚟搵你，係有件事想你幫下我⋯」
「哈！林博士！我耳仔無問題啊嘛？你竟然會搵我幫手！哈哈！」
林總大笑到肚痛，挨係梳化上。
「雪兒坐既郵輪出左事，依家生死未卜⋯雪兒係你親姪女嚟，以你既人脈，一定可以搵人搵得返個郵輪！」
「哦～原來你想我利用我廣闊既人脈，係出事海域擴大個搜索範圍。」
「係，所以⋯」
林博士仲未講完，林總便企起身，走到落地玻璃，背對住林博士。
林總望住維港既船隻、對岸既高樓。
「你，仲記唔記得兩年前既事？」
「記得⋯」
林總突然轉個身，
「兩年前，我就已經講得好清楚，我地脫離兄弟關係，互不干涉對方，你仲答應會遵守，今日突然走嚟要我幫，你仲憑咩要我幫你！」
待續