荒島日記（新手、後宮甜）（不定期更新）: 救星

「來⋯唔⋯」
雪兒見到來福被撞飛，忍唔住大嗌，好彩我瞬間反應到，按住佢個嘴唔俾佢出聲。

「噓，唔好嗌啊⋯」

雪兒雙眼通紅一片，淚水係眼眶上搖晃。
「我唔可以⋯唔可以睇住來福死㗎⋯」

「東哥⋯東哥⋯」
達叔不斷輕力拍打我既手臂。



「嗯？」

「你睇下⋯」
達叔指住前方。

來福無因為鬣狗大佬既強攻而受重傷，不過眾多狼都俾鬣狗打到害怕，不斷咁往後退，來福見同伴既情況後，亦都無奈地跟住後退。

鬣狗見狼群此刻猶如喪家犬般，便得戚地發出嘲笑既叫聲，唔少野狼聽到後就得低曬頭，唔敢望鬣狗個方向。



數隻被打倒在地上既野狼，身上既傷口眾多，而且十分嚴重，見到鬣狗群慢慢逼近，於是合埋雙眼，迎接佢地既死亡。

來福見到一隻又一隻同伴死係鬣狗手上，發出低沈既叫聲，好似狗仔哭泣既聲音。

鬣狗們繼續逼近狼群，嘲笑既叫聲都愈嚟愈大，來福望一望周圍既同伴，其他野狼眼中只有恐懼。

來福突然停止退後，反而慢慢咁向前走去，同鬣狗群愈嚟愈近，嘴裡不斷發出聲音，其他野狼聽到後停止腳步，抬頭望住來福既背影。

鬣狗群見到來福上前而感到奇怪，停低腳步望住來福。



「大陸仔⋯發生乜事啊⋯」
雪兒拉扯我手臂問到。

來福繼續慢慢行前，不時回頭對狼群咆哮，唔少狼群得低頭發出低沈既叫聲。

我驚恐咁望住來福⋯我終於知道來福點解會上前走去⋯

「來福⋯來福佢依家似係想犧牲自己⋯佢留低自己一個去拖延鬣狗前進⋯令自己同伴有機會逃跑⋯」

達叔聽到後便沈默不語，而雪兒得低頭緊握拳頭，淚水一滴一滴咁滴落地上。

雪兒一邊用手背抹走臉上既淚水，一邊低聲說。
「唔可以㗎⋯來福唔可以死㗎⋯唔可以㗎⋯來福⋯唔唔⋯⋯」

「雪兒⋯」



我都唔想來福犧牲⋯但我地三個人，根本就唔會係個幾十隻鬣狗既對手⋯我地就咁出去⋯只會送死⋯

鬣狗們又開始慢慢前進，鬣狗既大佬愈嚟愈接近來福，來福完全無畏懼鬣狗群，眼神死盯著鬣狗們，嘴裡持續發出磨牙既聲音。

雪兒突然攞起弓箭拉弓，箭頭瞄準住鬣狗群個邊。

「我係唔會⋯唔會俾來福就咁死㗎⋯」
淚水不斷湧出，令雪兒睇嘢變得模糊不清，而且隻手不斷咁顫抖，無辦法瞄準啲鬣狗。

「唔好喊⋯唔好震啊⋯我要救來福⋯」
雪兒責怪自己身體既反應。

咚咚咚咚咚咚咚咚！



突然背後方向傳來聲音，我即刻回頭望去，雪兒亦都停止拉弓。

斜坡上有個灰色球狀既大物體衝咁落嚟，佢既速度愈嚟愈快。

「乜嘢嚟㗎⋯」
達叔驚訝咁望住衝咁落嚟既物體，雪兒都目不轉睛咁望實。

我理得佢究竟係啲咩，直接推開達叔到一邊，然後攬到雪兒碌去另外一邊，因為個灰色球狀物體衝落嚟個方向係我地三個⋯

如果我地三個無及時避開⋯應該可以直接撞到我地重傷⋯

咚咚咚咚咚！咚咚咚送～

個灰色球狀物體快速衝左落嚟到我地面前，然後以衝力咁衝上到舊大石上面，飛出到半空中，飛去個方向係鬣狗群個邊。



個灰色球狀物體係空中三百六十度碌左一圈後，我突然見到個球狀物體有類似動物既四肢，然後⋯個球狀物體有一邊係個野狼個頭⋯佢個樣十分驚恐⋯⋯

嗚⋯嗚⋯

個野狼一邊叫一邊流眼淚。

原來依個灰色球狀物體，係頭先見到個隻行路慢吞吞既肥狼⋯佢應該係跑到過嚟落斜坡，點知失足衝左落嚟⋯⋯

鬣狗們睇到依一幕都呆曬，無曬反應，而一直前進咁既來福，即刻停低腳步向後跳。

boom！

肥狼用身軀重重壓去鬣狗群個邊，其中有兩隻鬣狗就咁俾佢壓肚破腸流，肛門破裂糞便與鮮血混合，離死不遠，數隻鬣狗都俾整傷，嘴裡發出哀痛既叫聲。

「依個未就係傳說中既肉彈戰車！」


達叔忍唔住想企起身拍手。

突然肥狼旁邊傳來強烈既哀嚎，原來個叫聲係身形較強壯既鬣狗大佬嘴裡發出既。

並且好辛苦咁用力去推肥狼，仔細一看，原來鬣狗大佬個左腿俾肥狼既身軀壓住左。

鬣狗大佬用盡全力終於抽返隻左腿出嚟，然後東倒西歪咁向一邊行，但佢完全企唔穩，最後跌倒係一邊。

之後連續好幾次，都努力咁嘗試企返起身，但堅持唔到數秒便再次倒下。

鬣狗大佬之所以會咁，係因為佢既左小腿俾肥狼壓到折斷變形，如折彎了吊住既樹枝般。

雖然佢腿部肌肉非常發達，但小腿位置依然係好脆弱。

佢努力咁爬返起身，原本既囂張自大係依一刻已經蕩然無存，變得恐慌咁望住狼群，因為佢知道，行動不便既佢，此刻只能迎接死亡既來臨。

嗚嗚！

來福見到鬣狗們依個情況，而且肥狼係佢地個邊，於是呼喚退後既同伴。

來福大叫幾聲便衝上前發狠咬住鬣狗大佬，其他狼亦都跑上嚟攻擊其他鬣狗，場面變得一片混亂。

吖嗚！

見到鬣狗大佬完全無辦法避開自己既攻擊，來福便用力扯走鬣狗大佬身上其中一塊肉，大量鮮血湧出。原本躺係一邊暈眩既肥狼聞到大量既鮮血既味道後，瞬間醒返並發狠咬住鬣狗大佬流血既部位，用嘴不停吸吮鮮血。

鬣狗大佬用僅餘既氣力去踢肥狼，但肥狼咬到實一實唔肯鬆口，來福見鬣狗大佬仲有力反抗，於是咬住佢條頸，用力去咬爆佢既喉嚨。

係來福同肥狼既一連攻勢下，鬣狗大佬失血過多倒在地上奄奄一息。

其他鬣狗因失去鬣狗大佬既指揮而混亂一片，廿幾隻鬣狗見大勢已去，形勢一面倒向狼群，於是四處逃跑，狼群亦都分散緊追住。

幾分鐘後，只有三隻狼拖住鬣狗屍體返嚟，其他鬣狗成功逃跑。狼群以死八隻、傷三十隻既代價，成功獵殺三十隻鬣狗。

嗷～嗚！

來福跳上鬣狗大佬既屍體上，然後舉頭長鳴，而其他野狼見到來福長鳴後，亦都跟住長鳴，為依場大戰畫上記號⋯⋯



待續