荒島日記（新手、後宮甜）（不定期更新）: 勸告

「我勸你快啲離開施孝南啦，佢唔係一個好人嚟。」
辣椒妹開門見山講出佢想講嘅嘢。

嘉雯聽辣椒妹嘅說話後呆了數秒，然後忍唔住抱腹大笑，係床褥上翻滾著，原本已經梳直嘅秀髮再次凌亂不堪。

辣椒妹見嘉雯如此反應，嬲到握著拳頭。
「你笑咩啊！我認真㗎！」

嘉雯努力忍住笑意。
「哈哈哈⋯我⋯我仲以為你要同我講啲咩⋯原來係講佢⋯哈哈⋯⋯」



辣椒妹再次平靜咁講。
「真㗎，佢認真唔係個好人嚟。」

嘉雯不屑咁望住辣椒妹。
「我就係鐘意同佢一齊，我同佢嘅感情唔洗你理，你唔好以為我同你會和好！我係絕對唔會原諒你！」

辣椒妹沈默咗一陣，然後講。
「以前發生嘅事，我同你講聲對唔住，希望你唔好意氣用事，施孝南唔係個好人嚟，你都係早啲離開佢。」



「意氣用事？辣椒妹！你一句對唔住就大曬啊？如果唔係你！我會咁？」
嘉雯激動企起身推咗一下辣椒妹，然後伸手拉起額頭前嘅頭髮，露出額頭最上左嘅位置，有條好明顯嘅疤痕。

「依條疤痕！係你以前打我兩巴！令我撞到儲物櫃整到㗎！就係因為你！我先會有依條疤痕！我先要攞頭髮遮蓋佢！你唔好以為你一句對唔住可以完！」
嘉雯愈講愈激動，怒氣令雙眼發紅，感覺好似想殺咗辣椒妹。

辣椒妹見嘉雯咁激動，並無因此退後離開，反而大步走到嘉雯嘅面前，嘉雯慢慢向下望，發現辣椒妹隻手突然握著一把軍刀，嚇到不斷退後。
「你⋯你想點啊？」

「如果咁樣可以令你原諒我嘅話。」


辣椒妹舉起把軍刀，然後對準自己嘅額頭刺去。

啪！突然嘉雯快速上前一嘢拍走辣椒妹手上嘅軍刀，軍刀跌到旁邊嘅地上。

「唔好做埋啲無謂嘢！我係唔會原諒你嘅啦！你快啲同我躝出去！」
嘉雯指向山洞口，兇狠咁望住一旁嘅辣椒妹。

辣椒妹蹲下執起把軍刀，然後起身慢慢咁走到山洞出口前，佢又再次回頭望住裡面嘅嘉雯。
「嘉雯，我係以同學嘅身份提你，你真係要快啲離開施孝南。」

「躝啊！我唔想聽你講嘢！唔想見到你！你快啲躝啊！」
嘉雯激動地大嗌，淚水從眼角湧出。

辣椒妹無奈地嘆了口氣，便得低頭離開嘉雯住嘅山洞，然後默默地走返去河個邊，返去自己嘅山洞到。



「點解個癲婆會出現係依到？」
辣椒妹從嘉雯嘅山洞走出嚟嘆氣嘅依一幕，俾啱啱跑返到嚟嘅文健望到。

「哎呀⋯好痛⋯藍醫生⋯藍醫生⋯⋯」
文健嚟到藍醫生山洞前，企咗一分鐘，努力咁谷眼淚吊掛係眼眶上，然後就帶著哭腔走入去搵藍醫生⋯⋯



泥地，蟹群棲息地。


「啊⋯」
三人方向傳嚟淒厲嘅慘叫聲，令所有正在埋頭苦幹嘅女仔都望過去。

「血⋯血啊⋯」


肥豬劉吃驚地望住高佬佳，因為高佬佳此刻個頭流曬血。

高佬佳一邊叫痛，一邊好痛苦咁用手按住自己嘅頭殼頂，少量嘅鮮血慢慢咁沿途流到下巴，然後再滴落泥地上。

獅子狗走到高佬佳旁邊，檢查完佢頭殼頂上嘅傷口。
「皮外傷，好快就止血。」

見到高佬佳頭破血流，啲女仔又開始議論紛紛，而係我地最左邊嘅幾個女性討論得最激烈。
「嘩⋯流咁多血嘅⋯」

其中一個三十歲嘅女人，睇完高佬佳嘅情況後，塊面逐漸變青，如受了咩刺激般。
「大家⋯我聽老人家說過⋯一個地方突然有幾個人流血⋯一定是有怪事發生⋯難道這裡的螃蟹成精了？」

依位女士講依啲鬼故好似真有其事，語氣抑揚頓挫用得十分恰當，完全營造到恐怖嘅氣氛，我望住佢尖尖嘅下巴，又高又尖嘅鼻，佢同童話裡面嘅巫婆十分相似，只差在少了把掃把。



其他女性聽完個巫婆嘅說話後，嚇到攬埋一齊。
「你⋯你唔好嚇我地吖⋯」

「就是⋯不要亂說⋯」

巫婆吞咗啖口水，然後瞪大雙眼繼續講。
「大家想一想⋯今天為什麼突然兩個男的受傷，肯定是螃蟹成精⋯它們現在是來報復我們，因為我們把它的子孫捉回去吃了⋯壞了壞了⋯我們惹了個大麻煩了⋯」

聽曬個巫婆嘅鬼話連篇，我真係忍唔住暗笑一聲。

獅子狗一直觀察著高佬佳個頭頂。
「點解會整損個頭殼頂？」

「啱啱有嘢砸到佢。」
肥豬劉講完，便蹲係高佬佳旁邊嘅泥地，然後握起其中一舊爛泥。



握起舊爛泥後，肥豬劉嘅表情立刻有些變化，佢用手不斷抹舊爛泥球，抹下抹下，舊爛泥突然露出灰白嘅表面，肥豬劉憤怒地指住我咆哮。
「大陸仔！洗唔洗咁陰毒！阿佳用泥掟你地，你地竟然用泥包住舊石頭掟阿佳！」

「哦！原來係高佬佳條粉腸攞嘢掟我地嘅！終於真相大白啦！」
達叔指住高佬佳講。



待續