荒島日記（新手、後宮甜）（不定期更新）: 再襲

隻黑熊跑咁過嚟，嚇到文健連啲魚都唔記得攞，全部擺曬係地上，隻黑熊見到便停下腳步，趴係地上聞一聞文健遺留係地上嘅數條魚。

肥豬劉眾人躲係樹木後面，等待黑熊叼走啲魚離開。

隻黑熊聞咗一陣啲魚，然後便企直個身體，佢個樣變得比剛才更憤怒，然後對住肥豬劉眾人發出強烈嘅咆哮聲。

嗚吖！！！

周圍樹木棲息嘅鳥獸快速飛走，肥豬劉俾黑熊嘅叫聲嚇到腳有啲軟。



「大家！！只要扮死就無事嘅啦！！」
肥豬劉後面嘅文健拋下依句說話後就拼命逃跑，而隻黑熊聽到聲音後，立即向肥豬劉方向跑過嚟。

肥豬劉見黑熊衝過嚟自己方向，立即跟在文健身後逃跑，文健好似食咗禁藥般，跑得愈嚟愈快，差啲連佢車尾燈都見唔到。

就係大家都拼命逃亡嘅時候，肥豬劉嘅女伴小喬俾石頭絆倒，成個人趴咗係地上，當佢想起身繼續跑嘅時候，隻黑熊已經跑到佢身邊。

小喬想起文健嘅說話，於是咪埋雙眼壓低呼吸聲扮死，隻黑熊於是得低頭圍住小喬聞，停低腳步嘅大家見小喬無事，立刻鬆了一口氣。

突然黑熊咬住扮死嘅小喬手臂，原本扮死嘅小喬忍唔住疼痛，發出強烈嘅慘叫，眾人紛紛俾畫面嚇到大叫。



小喬用拳頭不斷錘打黑熊，但黑熊完全無鬆開嘴，反而咬得更加緊，痛到小喬都無力還擊。
「救我⋯救我⋯」

肥豬劉想上前救小喬，但隻黑熊實在太大隻，肥豬劉去到只會送死。

隻黑熊用雙掌壓住小喬，慢慢鬆開小喬嘅手臂，見小喬發出求救聲，於是佢從後咬住小喬條頸，小喬立即抽搐起嚟，口吐鮮血，慘死在眾人面前。







「我都唔想㗎⋯我行去個邊見咁多條魚係河邊⋯咁無臭無味⋯就執返嚟啦⋯我點知啲魚會係隻熊⋯⋯」
文健躲係秘書Lily背後說到。

「你個仆街！我一開始問你點樣得返嚟，你大大聲話自己捉嘅！」
肥豬劉舉起右拳想打文健，但Lily一直企係佢面前擋住，所以無辦法落手。

「對唔住啊⋯對唔住啊⋯」
文健依然躲係秘書Lily身後。

「對唔住有撚用啊！係男人嘅就走出嚟！唔好匿埋係女人後面！」
肥豬劉見Lily唔肯讓開，於是繞過Lily去捉文健，所以造成依兩個男人以秘書Lily為中心，開始著你追我跑。

「停下來！停下來！」


兩人完全唔聽Lily嘅說話，Lily唯有無奈地望住二人追嚟追去。

「隻⋯隻熊又嚟啦⋯」
聽到有人大嗌，文健同肥豬劉先肯停低追趕，望向叢林個方向。

叢林漆黑一片，月光曬在企係叢林前嘅黑熊，顯得隻黑熊陰森恐怖，佢手掌胸口無再著火冒煙，佢應該係想到方法整熄。

突然隻黑熊趴低係地上，佢個姿勢應該係要跑過嚟，我立刻大嗌。
「跑！快啲跑！隻熊要衝過嚟啊！」

眾人聽到我嘅說話後驚慌失措，向住唔同嘅方向四散，令我感到不解嘅係，隻黑熊依個時候唔係衝向人群，反而係衝向火堆個方向。

隻黑熊衝到火堆邊，無懼火堆嘅火焰，伸出熊掌一嘢掃向堆火，所有炭火被打到四散變成餘燼，然後佢企返起身，以大字型站著仰望向天怒吼。

嗚吖！！！！！



周圍樹木棲息嘅鳥獸再次被嚇到飛走，眾人俾黑熊嘅咆哮聲嚇到紛紛退後，我伸手摸摸背後，先發現把開山刀唔係我身到⋯

大鑊⋯把開山刀係邊？

「大陸仔⋯依家點算？」
雪兒係我背後問到。

「我都唔知⋯我把刀⋯⋯咦！」
望向雪兒嘅時候，見到雪兒手上拎住把弓箭，我攞走把弓箭，然後示意雪兒係原地等我，我便走入樹林。

我用樹木掩蓋我嘅蹤影，慢慢咁繞道到黑熊左手邊，然後舉起拉弓，瞄準住黑熊個頭，雖然同黑熊嘅距離有啲遠，但好在黑熊一直在原地仰望怒吼，方便我瞄準。

我壓低呼吸單眼一直瞄住黑熊頭，然後放手射去，支箭嗖一聲飛過去，望住隻黑熊仍然在原地吼叫，支箭一定令佢造成嚴重嘅傷害，可以嚇到佢離開。



「咪撚過嚟啊你⋯」
有舊石頭係依個時候飛過嚟打中黑熊，令黑熊個頭向後少少，而我枝箭係依個時候飛過，只係擦傷黑熊個鼻。

「文健⋯你個仆⋯」

「er⋯唔關我事㗎⋯」
文健知道自己闖禍，立即撒腿跑人。

嗚吖吖！！！！！
黑熊對住我憤怒咆哮。

大鑊⋯俾佢發現咗我⋯⋯





待續





香港人 反抗！！！