「鹹魚?!!」
達叔聽到嚇到退後幾步,其他人亦嚇到不敢前進。

四眼妹見慣大場面,完全無俾條「鹹魚」嚇到跑出嚟,果然係大酒店嘅太子女,未來嘅接班人,小弟佩服佩服!


我走上前去,希望從機長屍體上可以搵出佢嘅資料,瞭解架飛機咩情況。

「點解⋯」
我望去座位,駕駛室座位上放置咗條鹹魚⋯



你無睇錯⋯真係鹹魚嚟⋯並唔係死屍⋯

「咁真係鹹魚啊嘛。」
四眼妹講完便轉身觀察駕駛室其他位置。

但你一開始驚嚇嘅程度唔似係見到鹹魚⋯


話時話⋯點解會有條鹹魚係到⋯



達叔同四眼妹嘅女伴們聽到唔係屍體後便走入嚟。


走上前幾步,望住駕駛室內儀器上密密麻麻嘅開關,可以咁近距離望到飛機上嘅儀器,感到非常新奇。
「唔知架飛機係唔係完全壞曬呢。」

「試吓未知囉東哥。」
說罷,達叔便多手地不斷按儀器上密密麻麻嘅開關。



啪!啪!啪!啪!


望住達叔按著密密麻麻嘅儀器開關,我嘲笑地說。
「都跌成咁,點會仲用到。」

啪!啪!啪!啪!啪!

啪!啪!啪!


啪嗡!!!


我驚訝咁望住達叔,大叔亦驚訝咁望我。



達叔唔知按咗邊個開關,飛機上嘅儀器迅速亮燈,兩邊座位前嘅屏幕亦亮起,發出儀器啟動嘅聲音,嚇到四眼妹眾人震咗一吓。

WTF⋯竟然無壞到⋯


「嘩⋯搞咩鬼⋯架飛機無撞壞到?」
四眼妹伸手撫摸屏幕,看著屏幕上彈出一連串嘅畫面,然後便變成雷達嘅回波圖。

駕駛室內某個儀器亦係依個時候響起,說著一段我完全聽唔明嘅英文,把大家都嚇咗一跳。

「俾佢嚇到個心都離一離⋯」
蓬頭散髮嘅女仔用手輕微地拍打心口。




正當大家沉思咁嘅時候,四眼妹個樣突然變得好愕然。
「咪住!依個好似係通訊設備嚟!」


通訊設備?咁即係可以用嚟聯絡到島外面嘅世界?


「有無人英文叻?」
四眼妹問完,駕駛室眾人都搖搖頭。

四眼妹望向我,我便撒手擰頭,因為我係英文白癡嚟。

究竟有邊個嘅英文特別叻呢?




我閉上眼思考著,然後想起某個人。
「哦!我知,有個人可以幫到我地!」

四眼妹疑惑咁望住我。
「邊個?」

「你等我一陣。」
說罷,我便走出駕駛室,走出飛機,然後拉住雪兒隻手,帶住佢入嚟。

雪兒望一望儀器上嘅開關,每個開關下面都有英文字,幾秒後,雪兒按下其中一個開關,然後對住儀器講英文。

大家全神貫注地望住駕駛室內嘅儀器,等待對方嘅回覆。


十幾秒後,駕駛室儀器傳嚟一把女聲講英文,原本憂心嘅眾人瞬間露出笑顏。




而雪兒聽完個女人講嘅英文後,好興奮咁捉住我隻手。
「大陸仔,個女人問我地位置係邊啊,佢聽到我嘅求救聲啊。」

「真係嘅?」

雪兒點點頭。
「嗯!佢話收到我嘅求救訊息,但雷達上見唔到我地嘅位置。」

駕駛室內眾人聽到雪兒嘅說話後歡呼雀躍,達叔興奮地搭住四眼妹膊頭跳舞,有人更激動到落淚。

「終於有辦法離開啦!」

「我可以見返屋企人啦!」

「媽咪啊⋯媽咪⋯」


雪兒對住興奮嘅眾人做出噓嘅手勢,等到大家都安靜後,便按下開關,再次說著一堆完全唔明嘅英文。

咦?最尾個幾句英文,我好似隱約聽到「雅典娜」。

無幾耐,儀器再次傳嚟對方嘅聲音,語氣變得震驚,雪兒聽著聽著,然後轉身微笑咁同我地講。
「我同佢講我地係雅典娜女神嘅乘客,對方聽到後好驚訝,話全世界都係到搵咗我地好耐,佢依家準備通報上去。」

「咁就好。」

過咗陣,儀器再次發出聲音,但聲音不再是女聲,而是發出沙沙沙嘅聲音,大家嘅神情變得凝重,我亦感到不安⋯

啪啦⋯啪啦⋯

沙沙沙嘅聲音中,夾雜著細微啪啦嘅聲音,我心知不秒,我快速走到雪兒面前,伸手攬實雪兒個頭,令佢塊面對住我嘅身軀。

噼哩啪啦!!!


儀器發出巨響,然後密密麻麻嘅開關伴隨著爆出火花,對住駕駛室內嘅我地火花四濺,再釋出一絲黑煙⋯⋯



待續
已有 0 人追稿