「好啦,樂樂交返俾你,我都要返屋企啦。」
說罷,Angel便從BB車後攞出個膠袋。

小月望向Angel手上嘅膠袋,全部都係公仔麵等等唔健康嘅食品。

Angel見到小月眼神後,便尷尬咁R後腦。
「哈!阿爸阿媽返咗大陸幾日,所以買定啲嘢返去食。」

「不如,去我屋企食啊?我今晚煮豐富大餐啊!」
小月舉起手上嘅環保袋。



「唔係幾好意思嘅⋯」

「去啦,太多我食唔曬,而且有你最鐘意嘅番茄炒蛋哦。」
小月打開環保袋俾Angel睇裡面嘅食物。

Angel想起番茄炒蛋後便不斷吞口水,小月見Angel嘅表情後便知道說話起了作用。

小月攞出個番茄高舉到Angel眼前,加把勁繼續講。
「而且係用有機番茄,味道更加好㗎。」



「嗯⋯⋯咁好啦!我就勉為其難咁幫你湊住樂樂啦!你安心咁煮飯!」
Angel最後都係受唔住美食嘅引誘。

「好!」
於是兩人推住架BB車走去搭巴士。

「喂,小月,去深水埗架巴士係依邊喎。」
Angel指住對面馬路。



「哦⋯唔記得同你講,我搬咗去九龍塘已經兩個月。」

「九龍塘?」

「係啊,叔叔嘅屋企。」

「叔⋯個條粉腸返咗嚟?佢唔係失蹤咗成年嘅咩?」
Angel嬲霸霸咁講,但一望到BB車上嘅劉樂眼甘甘咁望住佢,語氣快速變得溫柔。
「對唔住樂樂,唔應該咁鬧你爸爸。」

「叔叔無返嚟,不過佢走之前搵咗律師,係適當嘅時候聯絡我,所以我就咁搬咗嚟九龍塘。」
小月一邊解釋,一邊帶住Angel走向返九龍塘嘅巴士站到。


「小月⋯你⋯⋯住依到?」


Angel驚訝咁望住眼前四面都俾牆包圍嘅三層獨立屋。

「係啊。」
說罷,小月便用八達通擺放係門外嘅感應器,再按埋手指模,大門隨即打開。

小月推著BB車進入,Angel隨後跟住,望到獨立屋前一左一右嘅小花園同泳池仔便驚嘆不已。

小月見到Angel嘅目光焦點便十分尷尬,因為此刻嘅泳池污糟邋遢,泳池上漂浮著雜草和花瓣,而小花園嘅植物除了棵大樹之外,通通都連根拔起。

「哈⋯之前個颱風搞到亂七八糟⋯」
小月尷尬地笑。

Angel便跟住小月進入大屋裡面,Angel個嘴立即嚇到合唔埋,間屋比佢想像中嘅仲要大,梳化後面通往二樓嘅樓梯,二樓吊落嚟大廳嘅玻璃吊飾。

小月拉住Angel到梳化到,然後抱樂樂到Angel手中。」


「你幫我睇住樂樂一陣。」

小月講完便拎住其中一袋嘢急急腳走上樓梯衝上二樓,Angel溫柔咁抱住樂樂,雙眼不斷望大廳四周嘅擺設,坐下坐下,感到有些唔自在。

Angel視線向上移去,便見到大衛劉正在望住佢。

「粉腸⋯差啲嚇死⋯」
原來牆上掛著大衛劉嘅相。

「呸⋯呸⋯」
手中嘅樂樂吐了幾啖口水,有少許吐到Angel身上,Angel隨即放低樂樂到梳化上,係大廳內搵紙巾。

Angel搵到紙巾抹乾淨身上嘅口水,回頭望去梳化,見樂樂好安靜咁自己一個玩手指,便放心咁參觀小月嘅新屋。

「喎!係點樣擺入去?」


Angel望住櫃上嘅玻璃瓶擺設,玻璃瓶裡面有個帆船模型。

參觀完一輪後,Angel便坐返係梳化上,梳化上嘅樂樂已經訓著咗,Angel好溫柔咁摸一摸樂樂稀少嘅頭髮。

「咦?依把刀⋯一定係小月大頭蝦唔記得擺返入廚房啦。」
Angel從檯上攞起把細小嘅水果刀,然後走向廚房方向。

咔嚓!

「月姐姐⋯我返嚟啦⋯」
大門打開,小明拖著疲倦嘅身軀返到嚟。

Angel見到小明突然嘅出現嚇到瞪大雙眼,而小明見到Angel係佢屋企出現而感到奇怪,再望到Angel手上把刀後,立即嚇到後退。
「你係邊個啊⋯做咩係我屋企⋯」



Angel立即對小明做出噓嘅動作,希望令小明唔好太大聲嘈醒樂樂,但小明見Angel攞住把刀不斷靠近,而且以噓嘅動作對住佢,以為Angel要殺佢滅口,嚇到眼淚都飆埋出嚟。
「唔好過嚟⋯唔好過嚟⋯唔好過嚟⋯」

「明仔,發生乜嘢事?」
聽到樓下嘈吵嘅聲音,小月在二樓上探個頭出嚟望。

小明見到小月在二樓後。
「月姐姐!快啲走啊!依個人入屋打劫啊!」

樂樂俾眾人嘅聲音嘈醒,然後放聲大哭⋯



「哈哈哈~」
小月哄著樂樂,但聽完小明嘅說話後,仍忍唔住大笑。

小明怕醜地繼續解釋。
「咁係啊嘛⋯無啦啦出現係屋企⋯而且又拎住把刀喎⋯」

「點睇我都唔似賊嘛⋯」
Angel面紅紅咁從廚房裡走出。

小月笑到眼淚水都就出嚟,然後冷靜咗一陣,令自己平復返心情。
「仲未介紹,依個係叔叔個仔,叫劉小明,依個係我師姐,叫Angel,佢份人幾好㗎,明仔,叫Angel姐姐啦。」

小明此刻才好好地看清楚Angel,Angel嘅身高比佢仲要矮,但個樣卻十分成熟,俾人嘅感覺好似大家姐般。

如果佢唔係著住套中學校服,你可能會以為佢已經係大學生嚟。

「Angel姐姐⋯」

「hi,小明弟弟。」
Angel伸出手到小明面前。

「你好⋯」
小明伸出手同Angel握咗一下⋯



待續
已有 0 人追稿