愈嚟愈接近圍觀嘅人群,我終於知道佢地睇啲咩睇到嘩嘩聲。


佢地眼前嘅一個竹籃裡面,裝了一堆海鮮,而個竹籃嘅主人係⋯⋯


獅子狗從海裡游返上嚟,雙手緊握著從海裡捉起嘅兩隻大龍蝦,而身上嘅海水沿住肌肉線條不斷滑落。


獅子狗完全無視圍觀嘅人群,把兩隻大龍蝦直接掉入竹籃裡面。




大媽和阿伯們瞪大雙眼望住獅子狗嘅操作,特別係啲大媽們,望住獅子狗嘅時候,眼神好似發光咁。
「你睇佢個一身肌肉。」


「好大隻啊⋯」


「搵佢做老公都唔錯。」


幾個大媽細聲講大聲笑。


「唔好發夢喇,人地條女靚女過你地,後生過你地啊。」
個阿伯講完,其餘阿伯立即猥瑣地望向企係竹籃不遠處嘅嘉雯,然後雙眼不斷掃視著嘉雯全身,搞到嘉雯有些不自在。


大媽們亦望向嘉雯,然後毫不示弱地對住嘉雯挺胸收腹。




其中一個阿伯見到我地行緊過嚟,然後目光完全投放係我旁邊嘅辣椒妹身上。
「喂喂⋯又嚟一件啊,依條女都唔錯啊。」


其餘阿伯瞬間望向辣椒妹,雙眼色迷迷咁望到實一實,並且不斷吞口水。
「依個發育的仲好。」


辣椒妹不爽地舉起拳頭。
「望咩望!信唔信打撚柒你地啊嗱?」


「嘩⋯條女咁惡㗎⋯」
阿伯們見辣椒妹凶神惡煞嘅模樣嚇到立即散去,只餘下大媽們在原地。




「我就係咁惡嘅喇!點啊!下次再咁樣望!實打撚爆你地啲牙!」
辣椒妹對著逐漸散去嘅阿伯們大罵著,阿伯們便加快腳步地離開。


大媽們一直注視著獅子狗,唔知係唔係想得到獅子狗嘅歡心,但獅子狗完全無望過佢地一眼。


「已經達標。」
獅子狗點算完竹籃裡面嘅海鮮,便抱起竹籃帶同嘉雯離開,然後見到我地兩個。


我同獅子狗互相不屑地望住對方,而辣椒妹躲在我身後,並且緊握著我隻手。




嘉雯尷尬地向我笑一笑便離開,而獅子狗亦緊隨其後離開郵輪嘅入口處。


「你靜靜咁係到等我。」
我邊除衫邊交待著辣椒妹,然後一躍跳入海裡。


獅子狗個粉腸將靠近郵輪嘅龍蝦貝殼生蠔捉得七七八八,搞到我一定要游遠少少去搵,好在我細細個就已經識游水。



一個小時之後,便帶住今日嘅收穫去五樓搵郵輪話事人子傑。


主管子傑初步估計竹籃裡嘅海鮮。


「其實以數量嚟睇,距離目標仲有好大段距離。」


我聽完依句說話便有些失落。


主管子傑拍一拍我膊頭。
「不過唔洗灰心,後生仔,我幫你申請一個星期嘅水電先,剩低嘅你之後再補交。」


「好,多謝你。」
我開心到有些激動地握著主管子傑嘅手。


主管子傑邊握著我手邊講。


「我最鐘意勤力嘅人,不過我提提你,依家郵輪嘅電力全係由太陽能發電,而淡水係雨水儲備嘅,所以十分有限,如果你用過量就會停⋯⋯」


「我會慳啲用嘅喇。」


於是我聽著主管子傑嘅指示,帶著食物前往二樓飯堂旁邊嘅食物儲藏室。


二樓個食物儲藏室擺放著不同種類嘅食物,而佢裡面有個冷藏室,係郵輪最大嘅冷凍設備,亦係郵輪依家用電最多嘅地方,所有食材都可以擺放係裡面急凍冷藏起嚟。


因此,郵輪嘅食物兌換糧票嘅地方亦係個到。


攬住竹籃落到三樓嘅時候,有個身穿素色唐裝嘅阿伯突然之間彈咗出嚟,企係我同辣椒妹面前阻擋去路。


佢用非常銳利嘅目光望住我,中氣十足以普通話講。
「小兄弟!你可知道我是誰嗎?」


我愣一愣,依條友⋯難道係尋晚凌晨俾我踢咗幾腳嘅肥佬?依家嚟尋仇?


我掃地唐裝阿伯全身,佢無肥肚腩,臉上亦無瘀傷痕跡,而且佢係講普通話,似乎唔係俾我連踢數腳嘅肥佬。
「er⋯唔知你係邊個。」


唐裝阿伯好似功夫片咁對我抱拳。
「在下渾元極意太極門掌門人馬師傅。」


「哦⋯乜乜門嘅馬師傅⋯唔知搵我有何貴幹呢?」


馬師傅圍住我走了一圈。
「是渾元極意太極門!小兄弟,我看你骨骼精奇,是百年一遇的練武奇才!你想學武功嗎?」


屌你老味⋯以前係MK成日俾啲做健身室嘅MK仔女問要唔要join會員⋯依家就係荒島俾個自稱功夫大師嘅阿伯問學唔學功夫⋯


「無興趣⋯」
說罷,我攬住竹籃繼續行。


馬師傅快速跑到我面前,再次阻擋我嘅去路。
「小兄弟,練武能強身健體,還能保家衛國,對你可有好處哦!」


佢同MK個班健身MK仔MK妹嘅煩人程度有得揮。


「我好忙,唔得閒練。」
我繞過佢繼續行。


馬師傅又再阻擋我嘅去路。
「我馬師傅可很少收徒弟,今天收你為徒可是你的榮幸。」


我都懶得搭理馬師傅,直接繞過佢而行,馬師傅毫無放棄,又想阻擋我地嘅去路,佢仲未開口,辣椒妹便推開佢。
「咪撚煩住曬!」


幾經波折終於到達二樓嘅食物儲藏室,而將今日嘅收穫換咗二十張糧票。


「woohoo~係錢啊~」
辣椒妹開心地高舉著佢手上嘅糧票,把佢嘅貪財個性表露無遺。


行出食物儲藏室便見到掃地阿伯,此刻佢正在用拖把不斷咁拖地。


掃地阿伯見到我提著嘅竹籃後便說。
「哦,原來從五樓到這裡的水跡都是你弄的,弄濕樓梯可是會摔死人。」


我看了一眼手上正在滴水嘅竹籃。
「對唔住⋯」


我道歉後,掃地阿伯無再講我,靜靜咁繼續拖地。


咦?辣椒妹呢?


攞住啲糧票嘅辣椒妹突然唔見蹤影⋯



待續
已有 0 人追稿