影月良憶(走甜): 唔見左呀媽嘅ｂｂ

「我好辛苦，我完全唔知佢諗緊乜，到底我係佢心目中算啲乜，我唔想成日都控制唔到自己亂咁諗，我好辛苦啊。」我揸住部手機，同我個網友於竹講。
「你平時唔係一直都無心無肺嘅咩？」佢略有笑意咁問我。
我靜咗，喺度諗，明明我識蕃薯蟲之前我唔係咁......
「既然你咁辛苦，咁咪唔好同佢聯絡囉。」佢繼續講。
「我...我唔捨得佢。」我好肯定嘅就係，我唔想無左佢。
「哈，呢啲嘢竟然會喺你口中講出。」佢帶有戲謔意味咁講。
唉......佢講得就輕鬆，佢又唔係我，根本就唔明我係有幾咁煩惱呢件事。
「咁你咪過幾日，睇下會點囉。」
唉，唯有係咁。
正想關咗LOL，瞥到好友列表嘅蕃薯蟲。


唉......又係到同阿月打機。
當初我地三個fd，一齊用同蟹蟹既icon，用同蟹蟹守衛造型，起既軍團都係叫蟹蟹。
唉......明明，明明講好咗要三個一齊玩架嘛......
「其實我怕我會當那電燈膽，黏著你們來來回，委曲中受難。一個我被撇低卻又很不慣，要走的一剎又折返。」 我口中喃喃自語。
－－－－－－－－－－－－－－－
「你鍾意左佢呀？」肥仔問我，好似陳述句又似疑問句咁。
我係Skype度同左朋友肥仔講左我對蕃薯蟲既諗法。
「算啦，你一定係鍾意左佢。」佢好肯定咁講。
其實我都唔知我係咪鍾意左佢，可能我成日諗佢係愛既表現，但係我知道我唔應該去鍾意佢。
因為佢已經有佢鍾意既人，就算我等落去都未必有結果。


「屌，廢撚事同你講。」我一心虛就會爆粗，然後唔理三七廿一cut左佢線先。
我緊緊咁攬住張被，個腦好亂。
「你心虛呀:)？」佢send message 比我。
我無覆到佢，然後慢慢咁訓著左。
－－－－－－－－－－－－－－－
然而，過左三日，蕃薯蟲搵番我。
雖然只係過左三日，但係我就好似個唔見左呀媽既ｂｂ，不能自理。
佢同我講，佢一直等緊我搵佢。
原本既我緊緊咁執著呢件事，打算即使佢搵我，我都唔要理佢。
但係我控制唔到自己既思念，想要通通講比佢知。


「你知唔知道，我好掛住你。」我略帶哭意咁講，我真係，好掛住佢。
佢唔出聲，我繼續講：「點解你連睇都唔睇我messages？你知唔知我有幾傷心。」
「對唔住，我諗住唔搵你，你都會搵番我架嘛，我諗住你再搵多一次，我就覆你架。」蕃薯蟲把聲透過電話傳過黎。
「唔...嗯....」聽到佢把聲，我個心好似有個地方溶左。嘴巴緊緊咁捂住，唔想比佢聽到我喊既聲。
其實喺佢講對唔住嗰一刻，我已經原諒咗佢，我唔知點解自己遇到佢之後就變到咁懦弱，好似主導權無晒，而反抗嘅能力亦隨之失去。
嗰刻，我就好似個唔見左呀媽嘅ｂｂ，因為無咗佢陪伴而感覺特別孤單、無助，淨係識喺度喊，又唔知到底有乜好喊。
可能真係得過來人先會明，遇到佢之前，一個人都可以好開心，但係遇到佢，就成日覺得佢好重要，無咗佢就唔得而搞到自己成日都唔開心。
到底係d咩令我變到咁懦弱...？