日本食人魔《十六歲透明感少女黑夜狩獵事件》: 第七節B

這時候電話忽然響起，看一下來電顯示是肥寶打來的。

張恩東心裡暗罵一句，趕緊把電話接了。

肥寶不愉快的聲音立時在耳邊響起。


「點呀大佬？半個鐘又半個鐘…由今朝開始一路等到你而家！飯都就嚟食完喇！仲要等到你幾時呀？」

「返緊嚟…返緊嚟嫁喇……」





「返緊嚟？大佬！今朝打畀你又話返緊嚟…兩個鐘之前打畀你又話返緊嚟…你而家又話返緊嚟…你係邊呀？印度呀？就算係印度成個上晝乜都返到啦下話……唔好同我講又話等多你半個鐘呀！我已經連上晝都冇返，下晝又唔返啲錢你畀返我呀……」

「唔係呀…你聽我講…我而家即刻返嚟…」

「而家先返！？唉！咁你返印度食蕉啦！」

「喂！喂！寶！你聽我講先啦……」

「仲聽你講？」






張恩東轉了一下腦筋，實在再想不到借口再拖延下去，無奈之下只好翻出姑媽來當擋箭牌。


「唔係呀…我姑媽唔見咗……」

「……咩話？」肥寶在電話另一頭緊張地問。

「點會咁嫁？你唔係吹水呀？」






張恩東的姑媽以前時不時都會帶著湯壺來到保安室，肥寶就最鍾意喝她的老火湯。

一個人長期困在保安室，三餐都食飯盒，間中有啖湯水落肚對他來說簡直暖到入心。

而且他一直覺得姑媽的人很好，年紀雖然有點大，不過人長得漂亮，言笑間有幾分夏文汐的影子。

所以聽到這消息的時候，反應有點大。



張恩東沒說話，見肥寶這種反應，心裡面忽然有點內疚。

不過轉念一想，自己所說的也不算完全是謊話。於是接下去繼續道︰






「我成朝咪周圍揾佢囉…我都唔知佢去咗邊…又冇講低……」

「點會咁嫁？有冇打過畀佢呀？」

「梗係有啦！電話有人聽先得嫁……」

「咁點呀……唔會出咗咩事呀……唔好嘞…你唔好返嚟喇…橫掂我上晝都冇返，唔爭在請埋下晝……你唔好返嚟喇，我幫你頂埋佢啦！」肥寶的語氣慢慢軟化下來。

「吓？咁……」

「得啦！係咁話啦！」說著便把電話掛斷。







張恩東把電話收好，心情變得暗淡下來。

一來為著說了謊欺騙肥寶，聽著他緊張的聲線，心裡有點不好受。

二來想到姑媽仍舊不知去了那裡，然後又想到前晚發生的事。

那時侯姑媽躺在地上，血一直從身後滲出來。那究竟是男人身上所流的血，還是來自她身上？

到現在為止，到底那一些記憶是真？那一些是假？

自己是真的把那個男人殺了？還是這一切只是夢？

那屍體又去了那裡？難道是姑媽把屍體收起來，然後出走了？





那金仔的屍體呢？金仔的屍體又去了那裡？

張恩東想著就覺得頭痛。


回頭望向Barcode頭那邊，只見一群女生圍著他，他表情滑稽的說了幾句話，然後大家就笑了。

其中一個女生忽然跑掉，走到鄰桌說了一番話，然後又帶著幾個女生過來。桌邊熱鬧的圍滿了人。

Barcode頭受歡迎得像個明星一樣。



張恩東覺得再看下去也不會有甚麼發現，於是從座位上站起來離去。