日本食人魔《十六歲透明感少女黑夜狩獵事件》: 第三十九節
39.
七人VAN沿著山路轉彎，向著林光正埋屍的地點出發。四周黑漆漆一片，只有車燈隱約引領出前面的路。
市川、白狐、摩通連同被黑布蒙頭的兩人通通坐在後座，各人都默不作聲，只聽見車身輾過路肩發出轟隆轟隆聲響。
這時侯，坐在前面助手席的比比緊張得滿手都是汗，在他心中此刻一直想著一件事，但礙於白狐和摩通的注視底下，一直不敢發問。問題在腦中轉了又轉，最後趁著跟阿曼獨處的片刻，戰戰兢兢的用家鄉話小聲問︰「大哥，我地而家去緊邊呀？」
阿曼聽見一怔，在倒後鏡瞥了比比一眼，然後又盯著前面的路，手握住軚盤轉了一個彎。然後小聲說︰「而家上去埋咗果兩條友吖嘛……」阿曼一面說一面留心著後頭摩通的反應。
比比聽見咕嚕一聲吞了口口水，然後再沒作聲。過了一陣子，又再緊張地搓著手喃喃自語地說︰
「……以前……係我鄉下村入面曾經發生過一件事……其實成件事都係我阿娘講俾我聽……」
比比說著，面青口唇白的望了阿曼一眼，接著說︰
「我阿娘話果時因為環境唔好，村入面發生饑荒，好多人都因為咁而餓死……有啲小朋友甚至一出世冇耐就死咗……原因係佢阿媽奶水不足……」
「成條村入面當時就只有一個人食得飽……佢係一個惡人，用偷、用搶、用打人的方法去填飽自己個肚……村入面嘅人因為肚餓，都冇能力反抗，於是只好將食剩嘅嘢包幾層布，收埋係後園。但是無論點，都會俾惡人搵到，之後通常仲會畀人打一身……於是肚餓嘅人，就只有更加肚餓……」
聽到這裡，阿曼板著臉望了比比一眼，不知道這傢伙怎麼無厘頭的說起這種事。然後只見比比顫著嘴唇接續說下去︰
「有一晚，個天行住雷，落住好大嘅雨……惡人照舊摸黑偷入一家人屋企，諗住偷佢哋嘢……點知撞啱哩間屋嘅男人，個仔啱啱出世，佢為咗保護剩低落嚟嘅食物，就駁晒命咁反抗……結果惡人錯手打死咗佢，仲一不做二不休殺埋佢老婆同啱啱出世嘅仔，由得佢地三個伏屍係屋裡面……
第二日村入面嘅人發現咗哩件事，全部人都好嬲，嬲到一齊攞住斧頭去惡人屋企尋仇……結果惡人畀人五花大綁，監生就活埋咗係村口嘅大樹下面……」
「咳！」
這時侯，聽只後座的摩通提高聲線咳了一聲，在暗示二人的話實在太多了。阿曼醒目，立即向比比打眼色示意他別再說下去。可惜比比卻彷如身在夢中，繼續喃喃說著︰
「正當大家以後終於有好日子過嘅時候，有份生葬惡人嘅個幾個男丁突然就變得古古怪怪……變得疑神疑鬼，成日話見到惡人著住一身白衫，半夜企係佢床邊……最恐怖嘅係……佢地咁多個人都一齊甩指甲，一塊一塊咁甩落嚟……之後就有人癲咗咁係村入面狂跑，大叫話自己手指入面有蟲……
再過多幾日，哩幾個人就直頭失蹤埋……到搵返佢地嘅時候，幾個人已經發脹浸死咗係河邊……每個人十隻手指都畀人咬晒落嚟……我阿娘話，係個個惡人化成厲鬼，返嚟搵佢地報仇……」
比比說到這裡就全身打個冷震，彷彿就看見那河邊卡住腐屍的光景。
「咚！咚！咚！」
摩通這時候再也按捺不住，敲了車邊幾下，再用鄉下話說︰「好喇吓……講夠喇……」阿曼和比比聽見對望一眼，就不敢再作聲，專心盯著前面的路看。
「佢地講緊咩呀?」這時白狐瞥了摩通一眼問。
「冇...冇野……」摩通堆著笑說，然後偷望坐在對面的市川一眼，就再沒說話。
這時侯張恩東豎起耳朵聽著眾人對話，耳中聽見自己粗重呼叫吸聲。身旁肥寶一直在咽嗚，每次車身搖晃，他的身子壓上來都感覺得到他在發抖。兩人吃過拳腳上的苦頭以後，都不敢再亂發聲，就怕那鐵通又再一次往自己頭上招呼。
市川整個車程都在閉目養神，沒有作過一句聲。白狐則集中精神在兩個被綁的人身上，提防有任何意外發生。
突然，聽見前座兩人一聲驚叫！
「嘩！！！！！！！！！！！！！！！！！！！！！！！！！！！！！！！！！！！！」
「睇住呀！！！！！！！！！！！！！！！！！！！！！！！！！！！！」
阿曼叫著急急扭轉軚盤。摩通被拋得一頭撞向玻璃，市川滾到地上，白狐則撐著身子大叫︰「屌！」同時車急劇擺尾，車胎磨在地上刮出一條胎痕。
「砰！」
只見車外突然傳來悶響，擋風玻璃一下碎裂，一個人影瞬間被撞飛，繼而消失在眼底。
「睇撚住呀！！！！！！！！！！！！！！！！！！！！！！！！！！！！」
眾人再一次大叫！
然後當車正要直撼山邊，多得阿曼及時把車煞住。
「嗄…………嗄…………嗄…………嗄…………嗄…………嗄…………嗄…………嗄…………」
阿曼握著軚盤瞪眼恍著，白狐未等眾人回神，就已經急拉開車門，往車外跳出。
「摩通！你睇住兩件貨！」白狐叫著，一手按著腰間的開山刀，同時撲向車頭察看究竟。
剛才一瞬間，確實見到有人或甚麼被撞飛。白狐躡著腳步來到車前，只見擋風玻璃碎成蜘蛛網狀，卻不見帶血，四周靜悄悄的就只有車上眾人抱怨聲響。
彎下腰去檢查車底，不見有人。回頭望向身旁山坡，但四周實在太黑，只見長草隨風搖擺。難道說被撞飛的人，已經跌入草叢直接向山坡下滾去？這一來麻煩便大了。
想著，就快步過去拉開車門。阿曼仍未回過神來，於是白狐就一巴熱辣辣打在他面上，同時喝問︰「搞乜撚嘢？」一把拉著他的頭頸拉出車外。
「撞到人喇……」只見阿曼跌跌撞撞的顫著聲線說。白狐聽見心下一沉，已作了最壞打算。
「有鬼……」同一時間，比比抱著頭目光呆望前方喃喃自語的說。
白狐一怒，正要撲過去教訓比比的同時，卻聽見阿曼說︰「…係喇……一定唔係人……係鬼……」
「講乜撚嘢呀！！！」
「……頭先條女企咗係路中心……成身白衫……把頭髮遮住塊面……好恐怖……一定唔係人……」
白狐揮起手又一巴打在阿曼面上，這時他心裡面的不安正在升溫，聽見倆人在胡說八道一番，實在再也按不住怒氣。
正當阿曼吃痛，一下倒坐地上的同時，市川已經撐著從車內步出，壓著聲線冷冷的問︰「發生咩事？」
白狐也不隱瞞，快步上去跟他說︰「撞到人喇……散水先喇好嘛？」
市川盯了他一眼，探頭望望四周，然後說︰「人呢？」
只見風吹過樹叢沙沙作響，這問題白狐一時知間不懂得應對。但無論如何，計劃發生了波折，這時候理應及早退場，待危機過去才再作打算。
「既然冇人就一切照舊，唔好再嘥時間……」市川說。
「咁樣好大鑊個喎……一係避一避先……或者搵過第二個地方……」
「唔得！一定係今晚！一定係哩到！」市川震怒著說。
「大唔大鑊係你問題，你收得我錢，哩啲嘢就你去解決，唔好同我講唔得！」市川說著就自顧爬上駕駛席，重新七人Van引擎打著。