上左個肥婆身, 好難移動呀: 第十章: 陰陽眼

「你信唔信都好啦，我老母有陰陽眼。其實風水果啲野都係佢鳩吹下揾錢，佢主要既職責都係去個客間屋開眼睇下有冇麻煩鬼姐。」
有陰陽眼？係真係唔係呀？？
如果係，咁佢老母可能可以幫到我，畢竟我到而家都仲未知點自己點解死過翻生，同埋唔同人既光都未知代表咩，一切一切都重係個謎。
估唔到，佢老母竟然係萬中無人既陰陽眼！
「其實我都有遺傳左老母既陰陽眼，不過我自從小學開過一次之後就嚇到唔敢再開...果陣我一開就見到...
對面鄰居背上面...原來一直揹住隻痴女鬼...可能個女仔生前太愛佢，唔捨得放手。不過真正望見都真係有啲不安。同埋遺傳得好小，開一次用好多能量，第二日我已經虧到病左...」
johnny 話口未完，我已經一野係滑梯另一邊反過去充滿期待咁望住佢:
「johnny!求下你而家開一次比我睇好冇？？」
我真係好想知真定假。
「痴線，好恐怖嫁，唔好啦...重好傷，我已經夠虧嫁啦」




「開一次，5萬」冇辦法，錢有時真係萬能。
「.....唔好啦，我....真係驚，童年陰影」
「驚冇錢定驚鬼多啲呀？加多1萬，你都唔想窮到有中年陰影㗎？」
Johnny聽到錢，諗左陣，最後都係死死地氣話:「唉屌....死就死啦」
講完之後，佢就坐左起身，叫我唔好岀聲。
之後佢合埋左雙眼，dup低左個頭，完全冇反應。
我好緊張咁行左係佢面前，蹲低望實佢，期待緊佢會唔會見到我。
哇...佢身上本來發岀既淺黃外圍光...慢慢咁...變左做白光！不過佢既白光重光過阿dom發岀既光。
過左陣，佢慢慢張開雙眼，望見眼前既我。
.......




........
...........
佢既眼神流露出複雜而難以言喻既感情。
我知道，
呢一刻既眼神交流，
已經穿越左陰陽之隔。

佢深呼吸左一下。相比起阿dom既反應，johnny明顯沉着好多。即時再震驚都保持住一定程度既震定。
佢慢慢伸出手，摸住我塊面，再慢慢將視線移近我。
佢一副難以置信既表情望住我，足足望左成分鍾。我地就係咁樣靜左望住對方成分鐘。




「陳心如...」johnny終於開口嗌我個名。
佢真係冇呃我，佢睇到我。
佢調整一下呼吸，沉默左幾秒，再神情嚴肅咁同我講:
「你..同因如個靈魂，一齊住左係度。你可唔可以話我知幾時開始上左佢身，同之後發生咩事？」
我一五一十將我所有發生既事一字不漏咁講比佢知。
Johnny聽完之後，若有所思咁答我:
「鬼死後附身，基本上係唔可能。我聽阿媽有講過，一個肉身只能由一個靈魂操控，而活着既人既靈魂，意念同力量都較死後既靈魂強大，所以鬼係好難上到普通人身上。
除非...有兩種人。
一種係植物人或者受重傷既人，佢地既靈魂遊離係人間至陰間，呢個時候係好易比鬼侵佔個驅體。
另一種就係，自願讓岀身體既人。通常係尋死者或者有愧疚者，又或者係愛人，佢地想用自己個肉體，什至條命換取某啲對佢地重要既人既復活，所以自願獻身。
我估因如係後者。所以佢而家只係化作一個極小既意念，讓個身體比你。」
「你係話...愧疚者？」
莫非，我既死同因如都有關？