<<坐上前往尖沙咀的天星小輪，迷失在維多利亞港>>: <<迷失九>>
「呢啲係......文字？定係符咒？」
小輪在晃動過後，船柱的部份因為震動的關係，表面油漆的部份剝落了，顯現出了一些古怪的圖畫與符號。
船柱上刻了六幅不同的圖畫，每幅圖畫下，都排列著一些符號，大概是在對那些圖畫進行註解吧。
「呢啲......會唔會係馬雅文字？」阿華小心翼翼地撫摸著船柱，像是怕這些圖案遭到破壞似的。
「我早幾年都有研究過馬雅文明，呢啲字雖然似，但......感覺有啲唔同。」周博士仔細地看著船柱，言語間充滿了不確定性。
「我都覺得有啲唔同，但係......呢啲符號嘅規律，同馬雅文字的確好相似。感覺，就好似......」阿華好像想到了甚麼似的。
「就好似進化咗嘅馬雅文字一樣。」周博士把阿華心中所想說了出來。
「你哋講咩呀？咩馬雅文字咩進化，可唔可以講返人話呀？」其他人聽到他們的對話，都一頭霧水。
「我諗你哋都有聽過馬雅文明係咩嚟，呢個古文明點解消失一直都係一個謎，我曾經有一段時間研究過呢個文明同埋佢嘅文字，牆上呢度有部份嘅文字，同馬雅文字係一模一樣嘅。」周博士看著眼前的船柱，歎為觀止地說。
「好似呢幅圖咁，圖下面嘅文字就全部都係馬雅文字。之後呢幅都係，呢幅都係。但係......嚟到呢一幅，文字開始出現咗變化......」周博士繞著船柱邊走邊說，然後來到第四幅圖才停下了腳步。
「出現變化？」我問。
「無錯，每個文明其實都經歷過文字嘅演變。好似我哋以前用象形文字，同依家嘅文字基本上係完全唔同嘅系統，但係中間亦都會保留咗以前文字嘅一啲基礎。」
我們聽到周博士的解釋，只感到更加一頭霧水。
「簡單講，我估計，呢六幅圖畫下面嘅文字，係由馬雅文字一路進化演變而成嘅！」阿華簡單地做了一個結論。
「痴線，無可能，馬雅文明一早已經滅亡咗。人都死晒，仲點會出現咩文字進化。」我搖了搖頭，表示不能相信。
「嚴格嚟講唔係滅亡，而係消失。雖然一直有學者認為，馬雅人係被西班牙人攻陷並消滅。但問題嚟啦，當時嘅馬雅人，文明程度，科學嘅發展程度一啲都唔差，點解西班牙人無好好利用佢哋，而係毁滅咗佢哋。仲有，如果真係滅族，點解又會留返依家馬雅嘅遺址。一切其實都未完全解得通。」周博士向我解釋，但我還是不能認同。
「就算馬雅人真係無滅亡，但佢哋係喺墨西哥，而呢度係香港，佢哋嘅文字又點會出現喺呢度。」
「呢層我都唔知，但係我哋依家嘅情況已經夠古怪，就算再多一件古怪事都無咩大不了啫。」想不到周博士的思想跟大部份學者都不太一樣，她不但沒有被知識所束縛，反而輕易接受了眼前種種不可思議之事。
「好啦，就算呢啲真係馬雅文字，咁同我哋發生嘅事有咩關係？上面有無任何資料係關於我哋嘅情況㗎？」阿康忍不住問。
阿華和周博士仔細地看了看船柱的部份，然後都搖了搖頭。
「我能夠解讀嘅，只有前面呢三幅圖，去到第四幅圖，由於文字都係全新嘅，我無辨法知道佢講咩。」周博士和阿華同樣表示對新文字無能為力。
「咁前面三幅圖講啲咩？話唔定入面有留畀我哋嘅訊息呢。」阿康不死心地問。
「前面三幅圖，係類似神話一樣嘅嘢，我唔認為會有咩幫助，不過你哋想知嘅，我都可以講下。」周博士雖然不認為這些畫像對現況有任何幫助，但她仍然對我們詳述了上面的訊息。
首先，第一幅圖畫上空劃著一個黑色的圓形，圓形的下方刻畫著一群人，那群人各自做著不同的動作，有的在跳舞，有的在奔跑，有的在收拾東西......
總括來說，畫象看上去十分混亂，完全找不到任何主旨。
「呢幅圖講梗當時嘅馬雅人面對梗一啲危機，每個人都處於混亂嘅狀態，完全迷失方向。」周博士解釋。
「咁上面個黑色圓形係咩嚟？」我指著圖畫的上方。
「文字無提到呢個圓形，估計應該係太陽嚟。」周博士和阿華也表示不知道那個圓形是甚麼，但我認為，那不是太陽，因為要是太陽，也離那些人群太近了些。
但我並沒有把這想法告訴大家，畢竟我這只是純綷的猜測，沒有必要影響其他人吧。
來到第二幅圖，上方仍是那個黑色圓形，但感覺好像比之前大了點。
黑色圓形下方，能看到一群人向同一個方向奔跑，那群人的後方，有一些人伏在地上，伏在地上的那些人，身上都散發出一些小黑點，那些黑點都飄向上方那個黑色圓形。
「呢幅圖大概係講，當時嘅馬雅人遇到一啲無法解釋嘅災害，佢哋決定全部逃離居住嘅地方。但逃走嘅途中都死咗好多人，呢啲伏喺地嘅人，就係走唔切而死亡嘅人。」周博士對第二幅圖進行解釋。
「咪住，嗰啲死人身上面，有一啲小黑點，而嗰啲小黑點飛向嗰個圓形，呢個又係點解？」
「我諗係類似宗教嘅諗法，人死後靈魂會飛向太陽啩，始終文字並無交代得咁詳細，我只能夠想像到咁多。」周博士聳了聳肩，表示無法進行詳細的分析。
而最後一幅圖，那黑色的圓形愈來愈大，圓形下方有兩群人。
其中一群是十四人的團體，那十四人身上都有一些黑色粒子，略有不同的是，那些黑色粒子只是纏繞在他們身旁，並未有飄向那黑色的圓形。
而另一群人數量則比較多，當中有一個人的打扮跟其他人不同，看來扮演著甚麼角色。
「呢幅圖講嘅係，馬雅人發現無論點樣都無辨法從災難中逃走，佢哋決定要進行獻祭，呢十四個人就係祭品。另一邊嘅就係剩低嘅族群，當中呢個就係祭司，負責呢場獻祭。」
「獻祭......十四人......但係我哋只有十三個人。唔通真係唔關事......」我內心不斷嘗試把現況跟船柱上的圖畫連繫起來，但看來確實沒有任何共通點。
「頭三幅圖就係講呢啲嘢啦，而第四幅圖下面嘅文字，我真係無辨法解讀啦。」周博士一臉失望的神情，看來是真的解讀不了。
「我哋無辨法解讀文字啫，上面嘅圖畫我哋應該可以知道某啲訊息先啱㗎？」
我提出疑問並開始觀察船柱上的圖畫。
「無錯，好似第四幅圖咁，應該係講頭先嗰十四個祭品。其中呢幾個人嘅黑色粒子飛向天上嘅黑色圓球體，會唔會代表佢哋已經死咗？」阿康亦跟隨我開始分析起來。
「咁第五幅圖就係講佢哋撐船去到某個地方，但上岸之後又有幾個人死咗啦。」阿康繼續說。
「至於第六幅圖......」阿康停了一下，無法分析下去。
只因第六幅圖跟第五幅圖看似沒有太大關聯，原因就是，第六幅圖的人數又變回十四人了。
當中兩個人手牽著手，對著天上的黑色圓形膜拜著，像是在祈禱甚麼似的。
「你依家明白，點解無文字嘅情況之下無辨法解讀啦嘛？因為去到呢幅畫，無論點樣解釋，都無辨法將佢同前幾幅圖連埋一齊。而且最大問題係，呢幅圖之後，只有一大堆嘅文字。喺唔知啲文字講咩嘅情況下，根本唔會知船柱上面想帶出啲咩訊息。」周博士說。
「唔通真係無辨......咦？呢個係？」正當我感到事情再次遇到瓶頸時，我卻發現了一樣十分特別的事情。
「大家嚟睇下，我唔知有無睇錯......」
其他人在我的呼喚下聚集起來，並一起看著我指向的那地方。
「竟然......」
大家看到後，也不禁驚訝起來。
到底，大家看到甚麼了。