<<坐上前往尖沙咀的天星小輪，迷失在維多利亞港>>: <<迷失十一>>
「又係你！啱啱害完我都唔夠，依家仲害另一個，點解你咁狠毒㗎！」阿萍激動地說。
「痴線，我都唔知你哋講乜。」
「你仲想扮嘢？啱啱呢位妹妹先話你偷偷地同李樂彤講嘢，之後佢就死咗啦！仲唔係你搞鬼！」
阿萍的質疑十分合理，眾人都看著周博士，等待著她的回應。
「我係有同佢講嘢，但唔係我主動同佢講，係佢過嚟問我嘢，我先答佢咋。唔信你咪問佢囉。」
「我......我見到你同李樂彤嘅時候，你哋已經傾緊計，所以我都唔知係你搵佢定佢搵你。」鄭樂欣不太肯定地說。
「唔駛審啦，肯定係你去搵李樂彤講嘢，反正你都唔當我哋係人，你當我哋係咩樣本咋嘛！」
「痴線，我有做我會認，但我的確無主動同李樂彤講嘢，你哋信就信，唔信就算！」
「你扮咩嘢呀，你根本就淨係顧住自己！你呢啲人，為咗自己，肯定連親人都會當成樣本，你根本就無感情！」
「你講咩呀！你呢啲咁嘅潑婦有咩資格話我呀？你話我知你除咗嘈生晒仲幫到啲咩手呀？」阿萍的說話好像刺激到周博士，一直保持冷靜的她竟也激動起來。
「咩呀？被我講中呀？你真係拎親人嚟做你嗰啲咩實驗呀？做你親人真係慘囉，被你當死物咁玩。」阿萍看到受刺激的周博士，馬上追擊她。
「你知啲咩呀，八婆！你估你好好呀潑婦，你老公心入面肯定覺得你麻鬼煩，先下下落指示畀你，等你唔駛煩佢咋！」
「好啦，唔好嘈啦！再係咁落去都無意思！」我實在不想再添任何亂子，遂出手阻止他們。
「咩呀？你係咪想幫佢呀？你唔係唔記得佢點對我哋呀？佢當我哋實驗樣本咋！」阿萍激動地說。
「我唔係要幫邊個，但係咁嘈落去對我哋依家嘅情況會有咩幫助？」我知道單靠我一個人絕對無法平息這事態，只好用眼神尋找其他人的幫忙。
「無錯，唔好再嘈啦，我哋都係諗下之後點做仲好啦。」想不到幫助我的，竟是阿May，但我瞬間明白，她只是不希望爭吵會妨礙到阿康下去駕駛倉吧。
「係囉，唔好嘈啦，大家冷靜啲。」阿康附和。
「唓，唔嘈咪唔嘈囉，陣間你哋呢個女人當成實驗品嘅話，唔好話我無提你哋。」阿萍眼看沒有人支持她，她也暫停了對周博士惡言相向，看來她還不算太蠢。
「哼！」周博士冷哼了一聲，也沒有繼續爭辯下去。
「大家都冷靜啦嘛？相信大家都見到，我哋已經有三個人原因不明咁消失咗......」
「係風化咗。」周博士提醒，本以為她在爭吵過後不會再主動發言甚麼的，看來她已從剛才的情緒中恢復過來。
「嗯，係風化咗。風化嘅原因暫時未明，而我哋點解會集體出現喺度嘅原因都係未明。我哋依家有嘅線索，就係船柱上嘅呢啲圖畫，同埋李樂彤風化之前嘅說話。」我姑且為現況作了一個簡單的總結，但好像還是遺漏了甚麼似的。
「你覺得李樂彤嘅說話有參考價值咩？我聽起上嚟只係一個精神病人嘅瘋言瘋語咋喎。」久未說話的張強，對此表示疑惑。
「你講得啱，佢可能只係一個痴線婆都未定，但依家嘅情況，我相信每一件小事，對我哋嚟講都係重要嘅線索。而且，佢係三個人入面，老化速度最慢嘅人，感覺......就好似為咗留佢條命，將啲訊息帶畀我哋一樣。」我把自己的感受如實說出來。
「唔係啩，照你咁講，咪啫係佢口中嘅神要畀訊息我哋？真係嘅話，點解又要整死我哋？」張強搖了搖頭。
「如果照李樂彤嘅說法，其實佢哋並唔係死亡，而只係回歸去應該去嘅地方。」我回憶起李樂彤說話時的模樣，她那平靜的樣子，一點也不像是面臨死亡的人。
「痴線，痴線，有無咁離奇呀？人都化成灰都唔叫做死？」張強看來無法接受這假設。
「呢層我無辨法答你，但係李樂彤講嘅嘢，有啲地方令我好在意！第一，佢話我哋只所以會出現喺呢度，係因為無方向，咁掉返轉頭講，係咪我哋只要搵到自己嘅方向，就可以離開呢度呢？」我大膽地提出假設。
「就當呢個假設成立，咁究竟我哋要搵啲咩方向先得㗎？」張強提出疑問。
「呢個就係我想講嘅第二點，要知道搵啲咩方向，就要知道我哋有啲咩共通點。雖然之前我用年齡同職業去搵共通點失敗咗，但我始終都認為，我哋之所以聚集喺呢度，並唔會係一個偶然。」
「唔係偶然會係咩？我真係諗唔到我哋會有咩共通點。」
「迷途嘅人......」阿華小聲地說，好像領悟到甚麼似的。
「無錯，迷途嘅人，我都認為呢個係關鍵。」我好像抓到了重點，但又無法確切地說出個所以然來。
「就算係關鍵又點？我一啲都唔覺得自己係迷途嘅人囉。」張強無法接受這觀點，而阿康和阿May亦點頭附和，從這裡可大概看到各人性格迴異。
「雖然你哋口頭上係咁講，但實際上內心......應該係潛意識，係咪都咁確定自己嘅諗法呢？」周博士突然插話，看來是有甚麼想法。
「周博士，你咁講係咩意思？你係咪已經有啲咩諗法？」我追問。
「呢個係我嘅假設啫，無論係鄧美玉、蕭sir定係李樂彤都好，應該都係內心受到某種嘅刺激，先會出現風化。」周博士的解釋明顯未能夠滿足我們。
「不如直接啲啦，李樂彤風化之前，你已經講咗你想進行觀察，亦啫係你內心已經有某種假設。我相信就算你唔係特登刺激李樂彤，但喺佢風化之後，你應該已經注意到一啲規律先啱。」明叔對著周博士說。
「係咪真㗎？」隨著明叔的說話完結，所有人都把目光放到周博士身上。
「你講得無錯，我的確係有某種推論。」沉默良久的周博士，總算吐出了這一句話。
「賤人！毒婦！原來你已經知道咗點樣會令人風化，但係你都唔出聲，係咪想借啲意拎我嚟做實驗呀！」阿萍緊張地說。
周博士並沒有理會阿萍，她只是緩緩地走到船邊，抬頭看了一眼後，便徐徐歎了一口氣。
「你哋覺得，迷途嘅人，指嘅究竟係咩呀？」周博士以問題代替了回答。
「吓？」眾人沒有預計周博士會進行提問，全都呆在當場。
「我諗......係指失去目標嘅人？」我思考了一會，把我內心所想到的話說出來，畢竟，我也曾是失去目標之人，很明白那種感覺，就像是迷途的人一樣，感到慌亂、感到徬徨。
「唔係，根據李樂彤最後問我嘅問題，我終於明白，到底咩係迷途嘅人。我亦都明白，點解李樂彤喺我答完佢之後，佢會慢慢開始風化。」
到底，李樂彤在最後，問了甚麼問題？
而周博士，又給了一個甚麼樣的答案呢？