<<坐上前往尖沙咀的天星小輪，迷失在維多利亞港>>: <<迷失十八>>

「點解？」我一臉疑惑地看著阿May。

「咩點解？」

「點解你明知我唔係主謀，又無我無辨法離開呢度，但你都仲要我應承你？咁做對你有咩好處？」

「哈，估唔到你會問啲咁蠢嘅問題。我只係要提高自己生存嘅可能性。」

「生存......可能性？」





「無錯，我問你，你記唔記得自己係點樣上船？」

「廢話，梗係記得啦，我係趕尾班船嘅時候，見到呢架船就嚟離開，我就急急腳跑上船。」

「果然，你同我哋係唔同嘅。」

「我唔明你嘅意思。」

「如果我同你講，我係啱啱先記得返，我原本係喺港島搭緊車返屋企，但當我上咗車之後，我就完全無晒之後嘅記憶，同埋我根本唔知點樣坐上呢架船，你信唔信？」





阿May的說話令我感到十分意外，我一直以為大家是憑著自己的意志坐上這艘小輪的，假設阿May的說話並不是謊言，難道只有我是憑著自己的意志來到船上嗎？

但......不可能，若這是真的，其他人應該也會提到這詭異的情況，難道這又是阿May的把戲？

「我唔信！照你咁講，之前我哋討論過幾次，應該會有人提出呢一點。」

「我講嘅係真，本來直到頭先，我都仲係以為自己係搭船返屋企，但係我本身係住港島，仲駛乜搭船走？」

「咁點解你無啦啦又會記得返自己係無咗記憶？」我把話說出口後也感到不協調，這跟「我記起了自己沒有該記憶」一樣不合理，但......始乎阿May真心這樣認為。





「我唔知！不過......啱啱啲發光體出現嘅時候，我腦入面就突然有種感覺，記返起我根本唔係自己上船......唔信嘅，你可以問其他人，我覺得佢哋應該會同我一樣有咁嘅情況。」

雖然我對阿May的感覺並不良好，而且也知道她是個會耍手段的人，但此刻的我，確信她沒有在說謊。

畢竟，她絕對有能力編另一個理由出來，哄騙我答應她的要求就可以了，根本用不著撒這種疑點重重的謊話。

「我就當你講嘅嘢係真，咁同你要我應承你，帶你離開呢度有咩關係？」

「周博士講過，能夠離開呢度嘅只有你，係呢個咁唔合理嘅情況之下，我選擇相信佢講嘅嘢！所以，只要你應承我帶我離開呢度，我就幫你鬆綁！」

阿May說得十分認真，看到她這樣，我竟不由得產生了「答應她也沒關係」的想法。

我還沒有來得及回答，明叔卻已出現在阿May背後。

「阿森唔好應承佢！」





其他人亦從船邊靠了過來，但他們此刻都用惡狠狠的目光看著阿May。

「點解你哋要阻止我？」阿May回頭看著她們，雖然看不見她的表情，但從她的聲音中，仍聽得出她的憤怒。

「應該係我哋問你，點解要破壞唯一嘅希望？」明叔說的話令我感到一頭霧水。

「希望？乜你哋仲覺得可以離開呢度咩？就算可以，最尾咪又係得佢一個走得甩！」

「至少，只要佢保持希望，我哋都仲有機會。但如果佢都失去希望，我哋就真係死路一條！」

「哼！你哋繼續自欺欺人係你哋嘅事，但係，我唔會畀佢一個離開呢度，我要帶走佢！」

阿May從口袋裡拿出了一把剪刀，刺向我的咽喉。





我該不會就這樣死在這裡吧？