<<坐上前往尖沙咀的天星小輪，迷失在維多利亞港>>: <<迷失四十八>>
眼看這怪物準備向我攻擊之際，一下槍聲突然響起，準確定命中了那怪物的頭部。
頭部受創的那怪物向後倒下，但看來並未死去。
「阿華，阿康，點解你哋會喺度？其他人呢？」撿回一命的我，也沒有時間好好道謝，只想盡快了解現況。
「唔好問，快啲走！」阿華把我拉起來後，便馬上引領著我們向廚房方向跑去。
「呢邊有怪物......」我還沒有來得及把話說完，背後便已傳來「的嗒，的嗒」的聲音，只見一群半腐爛掉的觸手怪物，正從我們後方襲來。
看到這情況，我也顧不上那麼多，跟著阿華跑向廚房。
「點解你哋會落咗嚟！你哋呢班失敗嘅廢物仲唔死返上去！」剛剛被阿華打中的怪物，看到一群怪物正要襲擊她，不慌不忙地拿出了一個不知名的裝置，那群半腐爛的怪物竟真的停止了騷動。
「阿華你睇！」阿康注意到這情況後，馬上呼喊阿華。
「唔可以畀佢控制班怪物，如果唔係我哋死硬！」阿華看到後心感不妙，想也不想把手槍裡剩下的子彈全都打出。
其中一顆子彈正好命中那怪物的右臂，那裝置從她手上掉到地上。
「弊！」那怪物意識到裝置掉了時，已經太遲了。
那些原本平靜下來的怪物，再次燥動起來，一下子瘋湧而上。
「你班殘缺品！去死！」
那女人徹底變成怪物，觸手俐落地把那些半腐爛的怪物打開。
單看力量，那些半腐爛的怪物並不是敵手，只是他們的數量實在太多，漸漸地開始佔據了優勢。
「可惡，你班殘缺品，可惡！」
那怪物發出了最後的咆哮後，便被那群半腐爛的怪物給淹沒掉。
「嗰啲係咩嚟？」我看到這情況後，身體不禁打了個寒顫。
「唔知，唯一知道嘅係，呢班怪物同陳德昌佢哋唔同，佢哋唔係諗住捉住我哋，而係打算殺咗我哋！」
阿華邊說邊把廚房門關上。
「唔好閂呀，呢度都唔安全！」我大喊。
「我知道，但呢一刻出面太危險啦。而且，啱啱先過咗佢哋嘅食飯時間，應該唔會咁快有人嚟。」阿華邊說邊把餐桌移到廚房裡的暗門前面，以作障礙之用。
「吓？點解你會知？」我露出了懷疑的目光。
然後，阿華便交代了他的身份，並且把找到的筆記簿拿出來。
「呢本筆記簿入面，有講我哋呢度，其實係用嚟培養嗰啲怪物。」
我和阿輝驚訝地看著阿華。
「根據佢哋留低嘅資料，被發光體分解之後，會喺一個我哋稱為巢穴嘅地方養殖出嚟，由於要保留人形嘅外表去入侵地球，佢哋會以人形嘅姿態成長。喺呢段期間，佢哋會嚟呢度進食，並且會開始注入怪物嘅因子，但並唔係所有人都會成功變成怪物，失敗嘅怪物，就會被戴上一種裝置，然後驅趕到上層。」
「所以頭先嗰啲甩皮甩骨嘅怪物，就係失敗品？」
「無錯。」
「但你唔係話佢哋都被驅趕到上層嘅咩？點解無啦啦會出現喺度？」我感到疑惑。
「我估計，係因為我同阿康喺上層殺咗一隻怪物，唔知係出於同伴意識定係對抗外敵嘅本能，佢哋就追住我哋嚟到呢層。」
「咁點解得返你哋兩個？其他人呢？」
「係啦，阿欣呢？」阿輝緊張地說。
「呢層......」阿華欲言又止，看來是出了甚麼意外。
「你快啲講啦，佢哋到底點呀？」阿輝不安地說。
「我哋都唔知。」阿康代阿華回答了這個問題，卻令我和阿輝更感疑惑。
「咩叫你哋都唔知呀？阿欣到底點呀？唔得，我要去搵佢！」阿輝話音剛落，便已跑向大門，幸好阿華出手阻止，要不然大門一開，我們很可能立刻被外面那些怪物淹沒。
「你冷靜啲！我只能夠同你講，我哋最後見佢哋嘅時，佢哋仲係無事！」阿華把阿輝放倒在地上。
「咩叫最後見到佢哋？你唔係同佢哋會合咗咩？點解會得返你兩個？」阿輝雖然被按在地上，掙扎同時仍不忘追問情況。
「等我講啦，其實我同阿華返到去嘅時候，明叔同阿強喺度嘈緊，而阿欣就喺側邊勸緊佢哋。當佢哋見到我同阿華，阿強就停咗無再出聲，但望住我哋嘅眼神就變得好唔尋常。原本我哋想同明叔了解下發生咩事，但係都未趕得切問，啲怪物就追到嚟。」阿康開始解釋。
「本來怪物只有一隻，我哋都仲應付到，但之後啲怪物愈嚟愈多，我哋就諗住逃走。點知阿強突然間捉住阿欣大嗌：『我一早知阿華你有古怪㗎啦！引晒啲怪物嚟想殺晒我哋！我唔會喺度等死！我警告你唔好追上嚟，如果唔係我對佢唔客氣！』之後阿強就拉住阿欣喺後門走咗去，但我同阿華因為唔近後門，無辨法追上去，明叔就提議由佢追阿強。都唔知係好彩定唔好彩，啲怪物無追出去，而係追住我同阿華。之後我哋就發現咗你哋，情況就變到依家咁。」
阿康一口氣把剛剛發生的事情告訴我們，雖然弄清了現狀，但這樣只是令阿輝更加激動。
「放開我！我要去追阿欣！放開我！」
「你唔好傻啦，你依家唔好話追阿欣，你衝出只會直接送死！到時唔好話去救阿欣，只會連你條命都保唔住！」阿華比剛才更加用力的壓著阿輝，深怕他掙脫逃掉。
「咁又點呀？出面有幾危險你又唔係唔知！仲有嗰個阿強，總之我一定要去追佢！」阿輝掙扎得更加厲害，要不是阿華訓練有素，知道如何有效壓制別人，否則阿輝已經奪門而去了。
「阿輝，我知道你嘅心情，但係你死咗就無人再去幫阿欣㗎啦！不如一齊諗下有咩方法離開呢度，一齊去救佢好過啦！」我明白失去重要的人的心情，但更明白衝動是不能解決問題的，所以亦幫忙勸導阿輝。
就在我們在爭論著時，突然有些聲音從廚房內側的門傳出來。
難道，又是那些怪物帶著人來進食？
這真的是前無去路，後有追兵，我們該不會就這樣命喪於此吧？