<<坐上前往尖沙咀的天星小輪，迷失在維多利亞港>>: <<迷失五十>>

廚房裡，我們都停止了動作，伴隨著我們的停頓，整個空間突然變得異常安靜，安靜得令人耳朵生痛。
 
但靜默的時間並不長久，我們一行四人，都能夠清楚地聽到廚房暗門內的聲音。
 
「應該係啲怪物嚟緊。」阿華放鬆了手上的力道，阿輝襯機掙脫了束縛，準備跑向大門。
 
「阿輝，唔好呀！」我正想上前阻止阿輝，阿華卻伸手攔著我。
 
「由得佢！佢要衝動尋死，你救得佢一次，都救唔到佢第二次。我哋無咁嘅時間精神陪佢玩英雄救美嘅遊戲。」
 




「但......但係佢死咗都對我哋無好處，倒不如......」我始終不希望阿輝這種如同尋死的行動，希望能勸阿華和阿康阻止他。
 
「哼，佢衝出去起碼可以分散出面啲怪物嘅注意力，總好過留喺度拖累我哋。而且，假如佢真係咁好彩衝到出去搵佢條女，啲怪物跟晒佢出去，我哋仲安全。」
 
我不肯定阿華是真心這樣想，還是只是想恫嚇阿輝，令他不敢把怪物引到阿欣身旁。
 
不管目的如何，阿華的說話的確令阿輝停了下來。
 
「阿輝，我知道你依家嘅心情，但係阿華講得啱，衝動解決唔到問題。」阿康走到阿輝身旁。
 




「我知道......我明......」阿輝雙拳緊握，努力地控制著自己。
 
說話的同時，暗門內的聲音愈發靠近，感覺像隨時都會進來似的。
 
「阿華。」
 
我們都把阿目光投向阿華，畢竟，在知道了阿華的身份後，我們多多少少都產生了依賴阿華的想法。
 
「你哋知唔知，失敗品同成功轉化嘅怪物，最大分別係咩？」阿華沒頭沒腦地拋下了這個問題，我們一時間無法接上話。
 




「係智慧。失敗品失去控制之後，就只剩低攻擊嘅本能。」
 
「你嘅意思係，可以引啲失敗品同啲怪物戰鬥？」我恍然大悟地說。
 
「唔係，因為，無人可以肯定啲怪物手上仲有無其他控制器。而且，生物嘅本能，本來就係先對付弱者，所以，就算佢哋真係打起上嚟，都只會喺我哋死咗之後發生。」阿華搖了搖頭，然後在廚房內走動起來，像在尋找甚麼。
 
「既然係咁，我哋搵個地方匿埋，等佢哋自相殘殺咪得囉。再唔係，我哋搵人做餌，引啲怪物入嚟，果晒佢哋喺度。又或者......」雖然我一直在提出建議，但心裡卻是明白，要是真的有用，阿華早就行動了，根本用不著把廚房大門關上，阻擋那些失敗品。
 
「雖不中亦不遠矣。」阿華邊笑邊把廚房裡的面粉袋都搬到廚房中間，像在佈置著甚麼似的。
 
我們雖然不知道阿華在打甚麼主意，卻也跟隨著他把其他面粉都搬出來。
 
「你係咪諗到辨法？」阿康問。
 
「我頭先講過，失敗品同怪物最大分別，係智慧。而有智慧嘅生物，佢哋會變得謹慎。如果你哋知道一間房入面有你嘅敵人，而你手上有大量嘅槍，你哋會點做？」




 
「咁梗係咩都唔理，開門即刻見人就射啦。」我說。
 
「如果間房好黑，黑到咩都睇唔到，但你聽到房入面嘅人嘅聲音呢？」
 
「咁咪向發聲嘅地方亂槍射啦。」
 
「講得好，所以我有個計劃。」
 
阿華向我們簡單地解釋了整個計劃後，我們便各自四散開去。
 
我們用眼神溝通好後，廚房一瞬間變得漆黑一片，看來已順利關上了電源。
 
同一時間，廚房的大門緩緩地打開了。
 




外頭的失敗品被那清脆的開門吸引過來，在大門外聚集著。
 
到底，我們的計劃能否成功呢？