<<坐上前往尖沙咀的天星小輪，迷失在維多利亞港>>: <<迷失五十五>>

阿欣離開明叔後，便一直沿著星光大道往前跑，但不論跑了多久，卻始終未能到達海濱花園。
 
然而，絕望的不只是無盡的道路，還有在身後慢慢逼近的發光體。
 
阿欣雖然已經消耗了不少體力，但好歹也是用盡全力奔跑著，實在不明白背後那些看似慢悠悠的發光體仍然能一直拉近距離。
 
「終於見到你啦，放棄無謂嘅掙扎啦，重生係一件好開心嘅事。至少，可以幫你脫離現實帶嚟嘅絕望。」
 
鄧美玉悄然無聲地出現，阿欣頓時打了一個寒顫。
 




「你......明叔呢？你對佢做咗啲咩？」
 
「佢無事，佢已經重獲新生，依家仲調整緊，你擔心佢嘅話，我帶你去見佢啦。」
 
鄧美玉臉上露出笑容，卻能感受到巨大的壓逼感。
 
「你唔好過嚟！」阿欣邊注視著鄧美玉邊往後退。
 
「你唔好咁抗拒啦，反正你嘅人生都充滿絕望，依家有機會重生擺脫絕望，咁唔係仲好咩。」
 




「我無絕望，我無！」
 
「係咩？乜原來你唔在意你個BB咩？」
 
鄧美玉仍然維持著微笑，阿欣的表情卻變得複雜起來。
 
「你收聲！你又知道啲咩！」
 
「我梗係知啦，係喎，搞大你嗰個阿輝呢？點解無喺你身邊嘅？」
 




「收聲呀！唔好再講啦！」
 
「我都後生過，細個做錯嘢好少事啫。不過依家啲後生關係真係複雜，明明你哋唔係男女朋友，但又會發生關係。仲要有咗之後暪住對方落咗個BB 。」
 
「唔好講啦，唔係咁㗎。佢只係想保護我，我哋只係唔小心做咗一次，無諗過咁都會中。我有諗過生佢出嚟，但咁會連累好多人，我都唔想落咗佢！我......我......」
 
說著說著，大概是想起了自己那無法挽回的決定，阿欣無法抑制自己的淚水，頓時哭成了淚人。
 
「無論你講咩都好，都只不過係藉口。不過依家無事啦，跟我一齊重獲新生，無拘無束咁繼續生活落去。」
 
鄧美玉伸出右手，溫柔的表現令阿欣失去了自我，慢慢把右手伸向鄧美玉。
 
「阿欣！你喺邊呀？」
 
就在阿欣差點接觸到鄧美玉之際，不知從何處傳來阿輝的聲音，阿欣隨即清醒過來。




 
「阿輝！我係度呀！你喺邊呀？」
 
回應著阿輝的呼喚，卻只聞其聲，不見其人。
 
「阻頭阻勢！算啦，點都好，跟我走啦，唔好再嘥時間啦！」
 
鄧美玉欲伸手抓住阿欣，阿欣馬上退後了兩步。
 
「我唔會跟你走，我要見阿輝！」
 
阿欣轉身拔腿就跑，鄧美玉看著阿欣逃跑，卻沒有半點著急的感覺，只是呆在原地看著阿欣逃走。
 
「阿輝，我喺度呀！阿輝！」
 




「阿欣！你喺邊呀？我見你唔到呀。」
 
阿欣沿著聲音方向跑去，但完全看不到阿輝的蹤影。
 
兩人的聲音明明那麼靠近，可是偏偏找不到對方。
 
「放棄啦，你哋無可能離開呢度㗎啦。」
 
「阿輝，阿輝！」
 
阿欣沒有理會鄧美玉，繼續朝阿輝的聲音方向靠近。
 
「阿欣，你喺邊呀？明明應該喺附近，究竟去咗邊？」
 
阿輝一個人在星光大道上走著，發了慌地四處張望尋找阿欣，卻未見阿森等人的蹤影。




 
「可惡！我唔會放棄，阿欣，你快啲出嚟啦，我哋已經搵到方法離開呢度，阿森佢哋準備緊啦，快啲出嚟我哋一齊返去啦。」
 
聲音傳到阿欣的耳內，焦急的她卻只能一直喊著阿輝的名字，但始終未能找到阿輝。
 
而這一切當然亦傳到鄧美玉耳內，本來一點也不焦急的鄧美玉，突然變得焦燥起來。
 
「黃洛森！喺船度就應該一早殺咗你！無辦法啦，未夠絕望都唔緊要，你跟我走啦。」
 
鄧美玉突然發難，帶領著身旁的發光體逼近阿欣。
 
「走開呀，阿輝，救我呀！」
 
阿輝聽到阿欣求救的聲音，緊張地四處張望，但完全找不到阿欣的身影。
 




「阿欣，阿欣！」
 
阿欣求救的聲音愈來愈大，情急下的阿輝，拿出了一個玻璃瓶往聲音發出處扔過去。
 
玻璃瓶突然在半空中像是撞到甚麼似的，裡面的液體隨著玻璃瓶破裂而四散。
 
而本應空無一物的眼前，阿欣和鄧美玉憑空出現在阿輝眼前。
 
鄧美玉還沒有意識到發生了甚麼事情，阿輝已衝到阿欣身旁拉著她往海濱花園逃跑。
 
而阿輝在逃跑的同時，拿出另一個玻璃瓶向鄧美玉扔過去。
 
沒有確認有沒有命中的空閒，阿輝只能馬上帶著阿欣逃走。
 
而背後傳來鄧美玉的慘叫聲，阿輝便確信剛剛成功命中鄧美玉，為兩人逃跑爭取了一點時間。
 
「阿輝，點解得返你一個嘅，其他人呢？你唔係話阿森搵到方法離開呢度咩？」
 
阿欣看到阿輝雖然高興，但心裡仍有一大堆疑問。
 
「阿森佢哋兜另一條路去海濱花園，總之我哋先去海濱花園等佢哋，希望我哋可以捱到佢哋嚟啦。」