<<坐上前往尖沙咀的天星小輪，迷失在維多利亞港>>: <<迷失五十八>>

我抱著小嬰兒，跟著阿華和阿康經梳士巴利道往海濱花園前進。
 
我們小心地往前行，除了途中偶然碰到一些沒有自我意識的觸手怪物外，沿路基本上沒有碰到其他危險。
 
徒步走了一會，很快便來到海濱花園面前。
 
「呢度......點會變成咁？」
 
我看著眼前本應是一條普通走道的位置，現在像變成了一個茂密的森林。
 




這森林好像無邊無界似的，不管往尖東方向還是維港方向看過去，眼前就森林向兩邊無限延伸著。
 
而本應是維多利亞海港的部份，只見海水被一棵又一棵的大樹硬生生截斷了。
 
「入面感覺，好危險。」阿華看著森林，希望窺視內裡的情況，但只能夠看到漆黑一片。
 
「我哋依家點好，等埋阿輝？定入咗去先？」阿康同樣嘗試窺探內裡的情況，當然也是甚麼都看不到。
 
「唔好等啦，我哋入去啦，愈早搵到離開嘅方法愈好。」阿華提議後看著我，等待我的決定。
 




「的確，與其齋喺度等，不如入去睇下究竟點樣離開呢度仲好。」
 
決定好後，我們整理了一下身上的東西，便準備進入眼前這個漆黑一片的森林。
 
「入面到底係點無人知，大家要小心。仲有阿森，如果搵到離開嘅方法，你自己判斷係咪離開先。」
 
「吓？我走咗咁你哋點？」
 
「雖然話跟你一齊嚟，係諗住可以一齊走，但如果我同阿康真係有危險過唔到嚟，你一定要走先。出到去之後再搵我嘅同伴，既然陳德昌話你就係關鍵，就算得你一個都好，都要逃離呢個鬼地方。」
 




「我都贊成阿華嘅講法，走得一個係一個，依家講明對大家都好，廢事你到時又猶豫唔知點好。」
 
「但係......」
 
「唔好但係啦，我同阿康都已經唔在意出唔出得返去，至於呢個BB，可能嘅你就帶住佢離開呢度啦。」
 
「雖然我哋係咁講，但係唔代表我哋放棄離開。只係如果情況唔容許，你自己走先啦。」
 
「好啦，唔好再講啦，我有唔好嘅感覺，快啲入去解決所有嘢之後走啦。」
 
阿華邊說邊踏入森林裡，但當他完全進入森林後，竟發現他在我們眼前消失不見。
 
「阿華！」我倆同時對著森林大喊，但都得不到回應。
 
我跟阿康在外面等了大約一分鐘，阿華沒有再出現在我們眼前。




 
「依家點算？」
 
難道我做錯決定了？應該聽阿華的建議去九龍公園才對？
 
「無辦法啦，照入去啦。」
 
「但係......」
 
「得返我哋兩個，無得返轉頭㗎啦，行啦阿森，我哋一齊行入去。」
 
阿康搭著我肩膀，示意一起進入森林。
 
正如阿康所說，的確也沒有其他選擇，於是深呼吸了一下後，我和阿康便一起踏入這森林裡。