我上左的士返去,到左屋企,Bobby即刻WhatsApp 我問我情況點,於是我打返俾Bobby。
「兄弟,咁關心我。」
「同女神ex經常見喔,點啊?發展如何?」
「發夢就有,佢有鐘意既男仔啊。」
「下⋯佢鐘意其他人啊?咁約你做咩?」Bobby好驚訝咁講。
「約我,解答佢既疑問囉。」
「兄弟,你有無想追返佢?」
「有⋯有小小啦。」我如實回答。
「想追,就追返人地啦!」
「但May話,唔好接受返我。」


「兄弟,我當你係兄弟,我先同你講。」Bobby好嚴肅咁講。
「咩啊?有D咩同我講啊Bobby。」好少Bobby咁既語氣同我講嘢。
「你⋯唔好對May太認真⋯依句係我真心說話。」Bobby好平靜咁講。

我無回答Bobby,手機處於一平寂靜。

「信我啦兄弟,你越用心對待May,你到最後只會傷心,聽我講,真係唔好對May太過用心。」

「我知點樣做既啦,Bobby。」
「嗯,你知道就好,等你好消息。」


Bobby講完即刻收左線。

我依幾日都有唸過依樣嘢,May話個男仔經常已讀不回佢,而May依排對待我都係已讀不回⋯

於是我同自己講,如果May再約我,我要拒絕下佢,我對住塊鏡摸一摸自己塊面。

過左幾日,依幾日May無搵我,我見到佢instagram有約個男仔出街到處玩,唸住佢應該拍拖啦,所以無再搵我啦,點知到左夜晚10點半,我電話又再次響起。

「chris,今晚得唔得閒陪我啊?」



我內心掙扎左一陣,我好應該同佢講唔得閒,好應該講約左同事食宵夜,但掙扎完後,我始終都係想見May一下,而且May話得返我一個可以陪佢,於是心軟既我,答左佢。

「好啊,12點見。」然後我就收左線。

我同同事講今晚唔得閒去慶祝同事生日,同事們各個都講。
「chris肯定又約左前度食宵夜啦!」

我唔好意思咁摸下個頭,答應下次慶祝一定去。

今次May無係潮特門口等我,反而係我公司後巷等我出黎,(搞到好多同事都知道左佢咩樣)May一見到我就拉左我去囍囍美食,又買佢最愛既碗仔翅。

「喂,幫我食左D菇佢。」May一邊講一邊塞俾我食。
(佢真係無變喔,到依家都仲係唔食菇。)

坐係朗豪坊後面個公園凳仔,又聽佢講依幾日同個男仔既情況。


「我已經同佢拖手,又攬咁,但佢一D表示都無,我問佢我地係咩關係,佢又答唔出。」May好失望咁講。

「個選擇權係個男仔度,佢經常唔嗲唔吊,你都攞佢無辦法㗎。」我平靜咁講。

「如果佢最後都無選擇我⋯我點算啊⋯」
「如果佢唔要你,我要你囉。」
「拿!你講㗎,唔可以唔算數啊!」
「我講嘢似唔算數既人咩?」
「如果佢唔要我,我一定黎搵你。」May笑一笑咁講。

又再次送May返到佢屋企樓下,唸住攬一下就走,我突然唸起返D嘢,於是攬住May個陣問。
「係喔,之前你話你有個唔想俾咁多人知既祕密喔,可唔可以講俾我聽?」
「唔好啦⋯我好少講俾人知⋯怕俾人感覺似係扮可憐。」
「連我都唔講得?」我驚訝咁講。



May若有所思左一陣,然後坐係凳仔度講。
「其實依個祕密係⋯我係好細個個陣就俾人侵犯過⋯」
「下⋯」我聽完之後呆企左係度,身體不停咁震,我真係完全無唸過,May依個女仔,究竟一生經歷左幾多依D不愉快既事。