波瀾: 第三話(一)

第三話
 
 
「IPhone5出咗咁大家都知啦，香港一向都係一個崇尚自由交易嘅發達城市。就算你無業啊，只要喺電腦面前捕住個網係咁禁，bid到嘅話一轉手就賺兩三千，好彩嘅多幾部抽中嘅話，難聽啲講句真係好搵過賣保險啦下話。」
 
台下的聽眾們立馬轉來一陣大笑的聲音，阿實擺出一個無奈的表情，待笑聲漸減下來後繼續著自己的表演。
 
「我老細呢，係一個非常非常要面嘅男人嚟。咁上兩個禮拜IPhone5發售……即係可以拎貨嘅第一日呢，我係要返工嘅，嗰日好多同事都係喺度呻話哎呀抽唔到啊，賺少幾千啦呢樣嗰樣。然後老細11點半鐘返到，咁我哋就見到佢隻手呢，就已經拎住部IPhone5啦，但其實佢平時呢，部電話永遠都係放喺褲袋好少拎出嚟嘅，咁啊……可能佢咁啱嗰日兩邊褲袋都穿窿啦。」
 
「然後我哋就圍埋一齊，話啊估唔到老細平時咁Q度縮，而家竟然一朝早就換部最新嘅IPhone返嚟喎。咁阿經理喺隔離聽到就笑咗一聲，同我哋講話唔好玩啦，你都識講老細啦，要出去見人傾生意架，當出面個個都拎住部IPhone5嗰陣你仲拎住IPhone4S點同人傾偈啊？『咦？嘩你睇下陳總，仲用緊4S，證明咩啊？生於亂世，出淤泥而不染，對潮流事物係充滿不屑啊。』」




 
信誠保險年度員工晚宴十隻金色大字赫然於舞臺的紅色背景牆上，阿實略顯尷尬地表演完以後便敬禮下台，從現場的聲音聽來反應還算不錯，但坐在一旁的Peter當然知道這次演出效果不算太好。這已是阿實出道以來的第六次酒會暖場，但顯然他依然不懂如何去掌控這場合的氣氛，其段子的質素只能算是差強人意。
 

甫步出半島酒店的門外，Peter便急不及待地點起了煙，阿實在其身後不發一言，有點羞愧地微微低下頭去。九月雖過去了但香港可一向沒有什麼秋天的氣息，縱使海風輕撫而過，天氣依然一片悶熱。
 
「你talk show份稿仲有幾多未寫？」Peter噴了口煙，突然轉過身去問道。
 
「呃……爭……兩三成左右。」阿實想了想，答道。「都差唔多架啦，好快可以搞掂。」
 




「唔係唔係，我唔係催你。」Peter否認著揮了揮手。「相反，你要真係對你寫嘅嗰段嘢有信心先好擺落去個表演度。你睇今晚……唔洗我講啦，你自己應該都明。」
 
「嗯……」阿實心虛地點了點頭。「Frankie有無講啲咩？」
 
「咁又無，佢呢啲人不嬲都唔會講啲得罪人嘅嘢……」Peter吐了口煙，笑道。「但掉返轉諗，佢無講啲乜嘢亦都係一個問題嚟，證明佢覺得你呢個表演無咩特別值得稱讚嘅地方。」
 
阿實慚愧地點了點頭並應了一聲，Peter也沒多說什麼，把煙頭扔到垃圾桶後便朝停車場走去。
 

紅哥兩個月前的個人演出大獲好評，現在打開電視見到他的頻率亦漸漸高了起來，據說很快就會在週末黃金時段的娛樂節目中作為嘉賓出席；另一邊阿歡也因為那次Talk show的精彩演出而聲名大噪，說上網看AV那一段的影片在社交網站上被瘋狂轉發，不過幾天的時間他便搖身一變成了網絡紅人，有時候阿實在巴士或是地鐵上也會聽到幾個人在模仿他那段子。




 
但只有阿實，彷彿還在原地踏步，絲毫看不到前方的大門裡有透出任何曙光。即使個人Talk show的評價不錯，但知名度跟銷量就是沒有什麼起色，這種彷彿地下棟篤笑藝人的無力感每次在看到兩位師兄時都會倍感強烈。
 
Peter的車上一直在播著電台節目，阿實剛好想起阿歡會出演今晚九點的電台招牌節目「湯艾力主場」。即使是電台早已沒落的今天，這節目在香港依然備受聽眾歡迎，那兩位主持Tom和Eric也是有名的全能藝人組合，能夠上這節目宣傳一下自己打響知名度對很多人來說都是非常值得高興的事情。
 
「喂九點鐘又係我哋『湯艾力主場』啦。大家好我係Tom。」「我係Eric。」「好啦今日嘅嘉賓呢就犀利囉，近排成個香港嘅後生一輩可以話係無人唔識佢啊。」「係啊就好似當年巴士阿叔一樣，周圍都聽到佢啲金句嘅！」「好咁有請我哋今日嘅嘉賓，正方形lin頭，阿歡！」
 
在他倆清脆的笑聲當中，阿歡開口向觀眾打了個招呼，聽起來有點羞澀，有點不好意思，相信外人也想像不到這樣的人居然會是一個專職創作黃色段子以及低俗笑話的棟篤笑藝人。
 
「你做咗棟篤笑幾耐啦？」
 
「都……成七年啦，之前一直都係同啲同門嘅……師兄弟夾埋一齊開show多，當然一啲小型嘅個人show都有，但你話一個正式嘅大型個人Talk show呢，咁最近呢次就真係第一次啫。」
 
「嘩咁都……算係捱過好長一段時間喎？」
 




「即係全香港嘅每一個人都知道丈哥余一丈，咁一講到棟篤笑第一時間就一定係諗到佢先架啦，所以掉返轉你哋呢班可能仲未上到一線……甚至可能再後啲，就會變到真係……無乜人識得你哋咁，事實係咪真係咁呢？」Eric補充道。
 
「呃……基本上都係咁，如果你話出到街呢，好偶爾好偶爾都會有人認到你嘅，可能離遠指住你口嗡嗡咁，又可能係突然擰轉頭望住你咁，亦都有試過俾人認出嚟話想一齊影張相啊嗰啲，咁呢啲都有嘅。」
 
「咦咁聽落都OK啊，起碼無平時啲人傳到咁……咩啊？」
 
「有係有嘅，但相比起其他領域嘅藝人嚟講我哋嘅知名度係確實低好多嘅。好似我師兄江漸紅咁，喺未上電視之前其實佢嘅棟篤笑無論係評價啊定係……即係賣得都唔錯嘅，但出到去又或者喺網上都係……係囉，無乜人講無乜人識，但其實佢喺棟篤笑界都已經算係一個唔錯嘅人物嚟。」
 
阿歡說的正是目前棟篤笑所面臨的窘境，余一丈獨攬整個香港的市場這自不必說，而事實上他演出的實力、內容以及質素都遠遠拋離著所有的後起之秀，所以這之間的斷層只會愈來愈大。
 
余一丈曾經在訪談中提起過這個情況，他也一直在發掘及提拔新人，以他的原話來說是：「我無當過棟篤笑係一盤生意，我熱愛佢，我唔會將一哥嘅位置拱手於人。但同樣亦因為我熱愛佢，所以我唔想望住佢慢慢咁消亡。有人問我話驚唔驚我提拔完啲人之後教識徒弟無師傅啊，搶我市場啊之類，我淨係一句嘅啫：你有實力，怕咩人搶？係咪？如果你自問對呢一樣嘢嘅理解、研究同深愛都係勝過呢個世界嘅所有人嘅，咁試問點會有人搶得走你手上嘅嘢？我最驚嘅只係過多十年、二十年，粵語棟篤笑呢樣嘢會喺香港消聲匿跡，甚至可能係講普通話嘅，講英文嘅，講韓文嘅，呢啲都係我最驚會發生嘅事情。」
 
後來他提拔過兩個人，都曾經成為過城中的熱門話題，但其中一個跟余一丈鬧翻了，當中的細節誰也說不清；而另外一個則是抵受不住壓力以及認為這行的前景不明朗，最後選擇了淡出這個圍子。自此之後他也不再扶持後輩成長之類的，只醉心創作著自己的段子。