親愛的，老師也有喜歡過你: 對不起，我們都冷落了對方

嗰日朝早完咗個meeting, 中午去咗睇infinity war, 記得K話過唔中意睇呢類電影, 話覺得好無聊,
其實講真, 如果唔係我前度對marvel咁有研究, 我都未必會睇. 今次我都係為咗陪我男朋友去先睇,
其實我男朋友都冇話特別中意marvel, 只不過人睇我地又睇咁. 同埋我去咗日本搞個event搞咗成個禮拜先返,
陪番佢睇吓戲都好應該姐. 況且, 我男朋友真係好細心又對我好好,我次次落機或者夜番屋企, 佢都特登揸架車出來接我.

睇完戲我就走去銀行過番條數比K, 望住個戶口咁就少咗幾千蚊, 有少少肉赤...
不過錢賺來都係用嚟洗㗎嘛, 我本身做parttime都係為咗去玩姐, 用咗咪遲吓再賺番.
我內心掙扎完之後, 就影低咗張收據, send咗比佢. 過完數之後, 男朋友就車我返歸, 之後佢先再返屋企.

大家睇到呢度, 發現我原來係有男朋友㗎, 哈哈, 係咪突然間覺得我都係情場上嘅仆街呢.


嗱嗱嗱, 大家唔好咁快道德_上身住, 諗住批評我, 大家記住, 你地其實係唔識我本人,
所以有好多嘢你地都係暫時唔知, 除非我寫多幾個故, 將所有來龍去脈都講清楚, 大家先再作結論.

不過事實上, 我自己都認我係一個幾仆街嘅道德_, 所以當我自己係有男朋友嘅情況下, 又對第二個男人產生感情,
我自己都覺得好慚愧. 不過情感呢家嘢, 好難控制. 如果我控制得到, 我成佛喇各位.
況且, 我同k嘅嘢已經過去, 講到尾, 我都只不過會係夜闌人靜嘅時候, 回憶下呢個舊人.

都8點幾啦, 咩工都放晒啦, K又係上線但唔覆. 今次唔同之前, 我啲無聊嘢你唔覆都情有可原,
但呢啲始終係錢銀嘢, 起碼比我知條數係咪真係過咗比你都好吖...我係我哋個對話打咗句「覆機啦, 黑人憎」,之後就call佢.



唔知大家知唔知whatsapp有個功能, 如果你打去嗰個人係另一個通話上面, whatsapp係會即刻cut線,
再同你講對方正在通話之類. 既然唔通, 我咪掉低個電話, 之後去沖涼, 等佢「得閒」先再覆我囉.

吹完個頭返房都九點幾, 我拎起個電話見到有個miss call, 當我正準備unlock部電話,
睇吓係邊個搵過我之際, 我個電話突然響起. 哇, 稀客. 竟然係K打電話嚟. 我施施然接咗個電話.

K: 打比我做咩？頭先做咩唔聽電話？
我: 沖緊涼點聽啊. 頭先好似係有人煲緊電話粥唔得閒聽我電話先.
K: 咩煲電話粥, 痴線, 同事嚟㗎咋.
我: 囡啊？你咁緊張做咩姐...


K: 男同事嚟咋, 邊有囡同我煲電話粥.
我: 最近好忙咩？
K: 唔係啊, 做咩咁問.
我: 仲好意思話唔忙, 唔忙又唔應機. 想死啊你？
K: 我好少用電話㗎...
我: 實係啦...
K: 喂, 咩唔覆機, 黑人憎啊
我: 咁你係黑人憎, Ok就兩隻字, 👌🏻就一個emoji, 咩都唔覆想點...睇吓洗死. 你不讀不回都唔係第一次, 唔好扮晒嘢.
K: 又嬲喇你, 哈哈哈.
我: 笑咩笑, 一啲都唔好笑. 見到條數就send個👌🏻比我, 咪諗住賴我冇找數.
K: 做咩姐你, 下次請你食飯補番數, 唔好嬲.
我: 得鬼閒嬲你, 係咁多, 唔阻你老人家瞓覺. Bye bye.

收線之後, 我又諗起當年我哋夜晚會傾吓電話嘅時光. 其實嗰段記憶都開始變得好矇矓,
但即使只係剩下幾塊碎片, 我依然好想將佢哋拼返做一個完整嘅畫面. 可惜, 啲嘢爛咗就係爛咗, 過去咗就係過去咗.


我關咗房燈, 躺在床上. 我伸手打開床頭嗰盞昏黃嘅小燈, 再拎起枱頭嗰張名信片.

Witty

你成日都話我唔睬你, 其實我唔係有心㗎, 撒哈拉沙漠呢度冇網絡, 想搵都搵唔到. 有機會, 你都要來撒哈拉沙漠一次. 呢度個星空真係無敵. 我諗你一定會俾佢壯麗嘅景色感動到. 不過呢度嘅夜晚真係好凍.

其實呢度有冇網絡, 可以遠離繁囂, 來一場與世隔絕嘅冒險, 一定會令你畢生難忙. 我依家都覺得死而無憾. 最大嘅遺憾係你唔喺度囉. 我哋香港再見.

16/8/2014

我抬頭望吓窗外嘅天空. 我見唔到月光, 亦見唔到星星. 夜空泛紅, 似乎想落雨.
唉, 難得聽日星期六, 又唔洗教課, 做咩好似想落雨咁喎... 我嘆了一口氣, 又再望吓張名信片背後張圖.
哇, 個夜景真係冇得彈, 可惜我最想去嘅地方係馬丘比丘, 唔係撒哈拉. 有錢都去咗想去嘅地方先啦, 邊似得K咁有錢可以亂fing.

我又望吓張卡, 根住發現個日期, 有冇搞錯啊, 做咩唔喺沙漠度幾過嚟喎. 定係嗰度根本冇郵局, 所以先寄唔到？
張嘢4年後先比我, 會唔會過份咗少少... 是但啦, 唔好再深究箇中原由, 再諗人都癲. 之後, 我好隨意咁將張名信片放咗喺床頭個書架.


由得呢張名信片隨意地留喺我封塵嘅日記下.