親愛的，老師也有喜歡過你: 每個人，都會心癢

「你問我這結局是否演繹錯, 或者, 時限到了你我會心變.」

哇, 係我哋啲歌詞. 冇諗過自己啲詞都有被引用嘅一日. 咪住, 無理由, 佢冇可能知啲歌詞㗎, 五年前作嗰陣冇呢啲歌詞, 佢冇可能知, 除非...除非佢睇咗我係紙言寫嘅嘢...

「你唔好以為你改咗少少歌詞我就認唔出, 首歌係屬於我地, 化咗灰都認得.」

頂, 仆街喇, 咁佢咪乜都知道晒囉. 好心佢睇完就算啦, 唔好比我知吖嘛, 咁大個人都咁唔識做. (我知你依家實有追埋呢個系列, 睇吓我扭埋啲咩屎忽花, 但你比啲空間我寫嘢啦, 唔好係我面前踢爆我, 我都冇踢爆你寫封咁嘅信比我)

「我之前講過要等到你變棄婦, 我講吓㗎咋. 邊洗等到你變棄婦, 等到你地緣盡就得.」



我終於明白點解佢要單身咁耐, 佢個人諗親都冇好嘢, 其實佢咁樣都幾黑心...叻仔啊! 我抵佢賺到一世自由、無拘無束. 話咩等到「你地」緣盡？睇吓我同k緣盡先定同其他人啦. 佢啲咁嘅屎忽鬼, 係就係有中意我嘅, 到你單身嗰陣, 你咪洗旨意佢會同你一齊. 佢係恭喜你陪佢單身咋, 所以唔好諗多咗. 各位如果遇着呢啲人, 奉勸你一句, 唔好搭沉船.

「又或者, 等一世？或者, 唔洗再等？
等, 你得閒出來見個面.

5/5/2018」

頂, 都唔知噏乜, 1999... 我收起封信, 連埋其他大部分都未睇嘅postcard 放入去我床邊個箱仔度. 雖然佢叫我睇晒啲明信片, 但我真心冇咁多時間喺度扮情聖. 呢排忙到得閑死唔得閑病咁嘅狀態, 我邊度有咁多時間睇佢啲嘢... 有時間再睇, 睇完再上來寫個故, 大家幫我諗定個名都差唔多.

我部手機叮咗一聲, 我以為係男朋友whatsapp我, 所以即刻仆住去睇. 點知原來係k. 佢無啦啦send咗個問號比我. 心諗, 咩料. 講真, 望住個問號, 完全理解唔到佢想表達啲咩. 所以我就藍剔咗佢. 加上佢成日不讀不回, 今次仲唔輪到我已讀不回.



佢隔咗陣再whatsapp 我, 問我做咩screenshot佢, 我就咁send返個問號比佢就算. K見到我個message即刻上線, 之後藍剔咗.

我心裡面諗, 我傅蘊羚呢一世人中意得最耐嘅人就係你, 唔好做埋咁多嘢令我心癢癢啦成日, 知唔知咩叫非誠勿擾啊, 我憎死你啊高禮燊！我21歲人, 遇過咁多人渣, 最仆街都算係你. 雖然我中意佢但又冇得係埋一齊, 但知道其實都有搭沉船, 當堂爽晒, 起碼我知道唔係得我on99咁中意佢.

我行出村口個輕鐵站, 諗住搭車去屯市一個人行下, 難得星期六一個人, 心情又麻麻地, 去屯市Windows shopping 下應該有幫助.

呢個時候, 我聽到有人叫我個名, 即係阿羚. 我知有好多阿姐阿嬸都叫阿玲. 一個花盆跌落黎, 都唔知會宅死幾多個. 但我好肯定呢把熟悉嘅聲音, 係朝着我嘅方向, 叫緊我, 一定係叫緊我. 況且, 大部份後期識我嘅人, 都叫我Witty, 叫得我做阿羚嘅人, 冇乜邊幾個, 都係得個幾個好熟嘅人.

當我諗緊呢堆野嘅時候, 佢叫我全名, 「傅蘊羚！」.


依家好明顯係叫緊我. 雖然我認得把聲一定唔係我前度, 但係心諗, 唔好係俊林啊頂, 佢住兆康差咁多個站都唔順路啦, 唔好咁邪...

我一轉身, 企係我面前嘅竟然係K, 我就話, 「點啊你枝高麗蔘, 咁大聲響我朵, 全街都知我叫咩名啦.」咁啱有架751往友愛嘅車來到, 我地就一齊上車.

大家唔好意外, 為咗寫呢個劇情, 同埋我想寫多個系列, 我特登咁耐都唔講我地住得好近. 唔好以為我為寫而寫, 先寫我哋住得近. 其實呢件事千真萬確. 你哋唔覺得好奇怪嘅咩？ 你記唔記得有一part, K話佢會等埋我放學, 其實唔係順路, 佢又點會等埋我, 溝女唔洗本？佢呢種成日度埋啲縮數留埋嚟自己去旅行嘅人, 又點會做埋啲咁蝕底嘅嘢...其實我覺得我冇將我哋住得近呢一點無限放大已經好仁慈, 至少我冇累到你地睇埋啲娘爆劇情, 例如：噢, 我地點點點, 係村口個巴士站邂逅之類.

K: 唔叫你全名叫咩？
我: 叫契妹. 你以唔係好中意兄妹相稱咩?
K: 痴線, 唔叫. 去邊？
我: 出街囉. 見唔到？你又去邊？
K: 唔話你知.
我: 挑, 你估我好想知. 你來來去去咪又係一個人.
K: 或者我有約人你唔知.

聽到呢句, 我個心乸一乸.



我: 係就最好啦, 唔洗再搵我攝
K: 咩攝咁難聽.
我: 有街去咪好, 其實拖又冇得拍, 兵又冇得做都幾慘.
K: 衰到你把口.
我: 係你度學返黎.
K: 約咗邊個？
我: 男朋友囉, 咁八卦...(其實我冇約人)

或者我哋都會心癢, 但夢醒過後, 我地都各自回到我地自己嘅現實世界當中. 佢做返佢嘅老師, 我做返我嘅大學生、做返人地嘅女朋友. 或者我哋都會心癢, 但再見到對方之後, 我哋知道我哋會當咩事都冇發生過.

話咁快就到兆康站, K亦準備落車. 佢又突然開口.

K: 喂, 幾時同我去旅行



心諗, ptgf咩, 話陪就陪, 都傻傻地...

我: 搵次, 得閒再傾. (我又試耍走佢)

K用咗個曖昩嘅眼神望一望我, 話, 「車！又下次！」
我冇再應佢, 佢亦轉身行出車廂... 車門警號響起, 準備關上.

我大聲喂咗佢一吓, 再講, 「得閒搵我食飯！」
佢點頭示好, 我還佢一個微笑, 然後佢轉身離開.
我一直望住月台上那漸行漸遠嘅身影, 望到我無法係人群之中搵到佢嘅身影. 我希望當刻嘅佢, 都有一顆想回頭望我一眼嘅心

只要我哋一日會因為對方面心癢, 我哋一定會有下次.
信我, 會有下次.