在IG上重遇你: 02
琴日訓得唔好，搞到我八點幾就醒左。睇到佢地訓到成隻死豬咁，我就唔嘈醒佢地，靜靜雞走左。我見時間咁早，就去M記食個醒晨早餐，跟住返屋企沖涼。
一入屋，就見到阿媽係廚房煮緊早餐，老豆坐係廳飲緊茶，睇緊新聞報道。
「阿仔，今日咁早返黎？
「係呀！琴晚通宵做project，又訓唔著，咪早啲返黎」我行去老豆個邊，攞起茶就飲。
「咁你今晚返唔返黎食飯？」
「今晚唔得，要去小學聚會。」阿媽示意佢知道，又走翻入廚房。
我沖完涼，老豆同阿媽都出晒門，得番我自己一個。我見依家先十點左右，於是開電腦玩左幾埸「食雞」。
「屌，又輸！太耐冇挽，真係退步左太多」我退出遊戲，諗住睇下電影去hea下時間。不過，我部電話響，我望一望，原來係Jenny搵我。
我：「點呀，Jenny姐？咁好死搵我，唔洗陪你條仔咩？」
Jenny：「唔係，佢依家係我隔離。佢叫我問你今晚有咩搞，冇嘢搞就過黎打牌。」
我：「今晚唔得，我小學同學搞聚會。下次先」
Jenny：「好啦，唔同你講住，個死佬又睇女仔，我要對付下佢，拜拜！」隔住個mon都聽到Jenny姐條仔嘅慘叫聲，我為佢默哀一分鐘。
我睇完一套電影之後，都差唔多五點半。因為今日去酒店，所以要著得整齊啲，唔好失禮人。為左避開放工嘅時間，我六點十五分左右就由旺角搭地鐵去尖沙嘴，結果六點九就到左。突然間，有個人拍我膊頭，我即刻擰轉頭，見到一男一女。
「你地係…潘子婷同…張俊杰，好耐冇見」我説。
「你都係姐，馬國威。好彩冇認錯人」潘子婷説。
「阿威同小學一樣，完全冇變過，真係好懷念」張俊杰感歎地説。
我同佢地一路行，一路講起以前小學嘅事。
我：「你地小學之後有聯絡咩？小學嗰時你地好似冇交流。」
婷：「唔係，我地係大學讀同一科，先熟左。後來，我地先知大家係小同。」
杰：「跟住我咪同佢拍拖囉！世事真係奇妙！」
講講下，我地行到間酒店，見到門口寫住二樓係《第五十五屆XX小學畢業生聚會》。我竟然有少少感觸，時間真係過得太快，唔經唔覺畢左業差唔多十年，大家都變晒大人。
「你地係唔係黎參加聚會架？」一個日系衣著的女生問我地。
我擰轉頭，望著佢，有啲熟悉的感覺，好似係一個識左好耐好耐嘅朋友。
我反問佢：「你係咪Bobo，羅穎妍？」
佢望住我，説：「你係呀威，馬國威？」