在IG上重遇你: 17

第十七章

時間：同Bobo去完海旁嘅晚上

個晚阿輝叫我去Jenny姐屋企打牌，因為成個月冇打牌，有啲手痕，就應承左去。Jenny姐住村屋，佢為左打牌，特登買左張電動麻雀枱，唔洗驚夜晚打麻雀比人投訴。阿輝話佢揸車入元朗，佢兜去旺角車埋我。入到元朗已經十點，我地諗住買埋宵夜，夜啲同Jenny姐佢地食。

等緊宵夜個時，阿輝突然間問我關於Bobo嘅事。

輝：「你同Bobo識左好耐？佢飲醉左都第一時間打比你」





我：「我好耐冇同佢聯絡，係上次小學聚會先見返面」

輝：「你知唔知佢有冇男朋友？」

我：「佢近排先分手，唔係佢都唔飲到咁醉。做咩問咁多，你唔會鐘意左佢？」

輝：「係呀，我鐘意左佢」

我：「你講真㗎！你鐘意左Bobo，你淨係見左佢一次」





輝：「呢個世界係有一見鐘情，我本來都唔信，不過依家………」

我有啲反應唔切，我見到外賣攞緊出黎，就即刻上前攞，跟住就叫阿輝開車走，因為我唔想比阿輝繼續講。我地去到Jenny姐嘅屋企，佢地已經準備好晒，等緊我地兩個。我不停諗住阿輝啱啱講嘅嘢，搞到我分左心，仲連續出沖。

Jenny：「阿威，搞咩不停出沖，平時你大殺四方，今日你好似遊緊魂？」

我：「冇嘢，近排唔夠訓先遊緊魂姐。唔好停，繼續打啦」

我諗只有阿輝知道我搞緊咩，因為打完牌之後，佢走過黎同我講嘢





輝：「阿威，你係咪因為我今日講嘅嘢，搞到你心不在焉。你唔會都鐘意Bobo呀？」

我：「唔…唔係，我只係冇諗過你會一見鐘情姐」

輝：「唔知點解，我第一眼望到佢，我就有種想保護佢嘅諗法。個日佢訓係梳發上，我望到入晒迷，唔好當我係變態，我只係……」

我：「只係太鐘意佢，先想望多佢幾眼，係咪呢？」

輝：「知我者，莫約『基友』也！不如你幫我追Bobo，我幫你溝Queenie，好唔好？」

我冇應佢，但係個刻我個心有啲痛，好似比人攞走左樣嘢。不過，連我自己都諗我真心想幫阿輝追Bobo？呢個問題困擾左我好耐，連我自己都唔知應該點做？

————————————————————————————————————

我同Bobo係畫展留左大約一個鐘就走，Bobo要返學校繼續執手尾，就去左搭地鐵。我冇同佢去搭地鐵，因為我唔想同佢走得太埋，我反而走左去灣仔碼頭搭船過尖沙咀。每次我一遇到啲難題，就會走去搭下船或者巴士，因為我好享受呢段屬於自己嘅時光，可以比自己放鬆下。但唔知係咪今次嘅難題太大，我完全放鬆唔到，仲令自己更煩。落左船之後，我諗住入誠品睇下書，點知我撞到一個好耐冇見嘅中學同學Anthony