在IG上重遇你: 35

第三十五章

一入門口，我就見到呀妹嬲爆爆嘅樣，我都知今次兇多吉少，希望件泡芙可以令小公主唔洗咁嬲。

妹：「我仲以為啲人掛住去街，連自己個妹都可以唔記得添！」

我：「啱啱有嘢做，我先冇聽你電話，我唔係有心㗎！唔好嬲啦，我最好嘅妹妹」

跟住我係身後落左盒泡芙出黎，然後放係佢面前：「為左表示我嘅歉意，我特登去買你最鐘意嘅泡芙俾你食」





呀妹嗰樣即刻開心返晒，我都鬆左啖氣。呀媽同老豆已經準備好晒啲飯餸，我地終於可以一家人一齊食餐飯，而成餐飯嘅內容都係圍繞住呀妹呢幾年嘅外國生活。雖然呀妹講到好享受外國生活，不過我知道佢有好多心事收埋左，有時佢半夜三更打俾我，同我不停訴苦。望住佢咁辛苦，我唯一可以做就係做佢嘅安全屋，盡量滿足佢嘅需要，俾佢開心下！

食完飯，我坐左一陣，就收到阿輝嘅whatsapp

輝：「今晚係咪去大家姐到打牌？」
我：「Yes」
輝：「十點係朗豪坊等我」
我：「你有揸車？」
輝：「有」





大約九點九，我換返套衫，正準備出門口時，呀妹係間房行出黎，問：「你咁夜又走去邊到蒲？」

我：「我唔係去蒲，我去搵fd打牌姐。你嗰樣話我知，你好似有事相求！」

妹：「聽朝我想食茶記嘅早餐，唔知你可唔可以買返黎俾我食呢，哥哥？」

我俾佢句「哥哥」嚇到打冷震：「如果我返黎個時開左門，我咪買俾你食囉！」

妹：「你係最好嘅哥哥！唔阻你出去，拜拜」





終於退出佢嘅魔掌，我急步行去朗豪坊，離遠已經見到阿輝架車停在係路邊。我上車之後，先發現後座有兩個女仔，但我唔係好記得係邊個，所以打左招呼就冇理佢地。

輝：「我以為你要自己行去元朗，咁耐都唔見人」

我：「收皮啦！仲唔快點開車」

輝：「得啦！介紹埋佢地先，佢地係大家姐啲中學師妹，今年準備升Year 2，左邊係Jessie，右邊係Crystal」

我開玩笑咁講左句：「你地真係Jenny嘅師妹，點解佢同你地差咁遠？同一間學校都有唔同質素！」

Jessie忍住笑咁答我：「等間我要同Jenny講，睇下佢點對付你」

眨下眼，我地已經去到Jenny姐屋企。佢一見到我就問：「啱先有人whatsapp我，話我個樣好差，有冇啲咁嘅事，阿威？」

我吞左啖口水，冷靜回應：「邊有啲咁嘅事，一定係有人想挑撥離間我地！」





Jenny冷笑著：「我一定信你！」

我正準備入去之際，Bobo打電話俾我

我：「做咩打俾我，傻妹？」

Bobo：「本來諗住問你想唔想要手信，不過你咁叫我，你份手信就唔洗要啦！」

我：「又唔洗咁認真，我只不過叫你真名姐」

Bobo：「好囉，咁你份手信下世先收」

我：「唔玩啦！你竟然有買手信俾我，我以為你唔記得我添！」





Bobo：「我實記得，日日煩住我要買手信。你幾時得閒攞？」

我：「不如星期六，順便帶你去食好嘢」

Bobo：「好呀！咁星期六見」

我一轉身，就見到Jenny係我後面偷偷地笑：「閃死人咩？叫人地傻妹，幾時開始有女朋友㗎？」

我面都紅埋：「鬼有女朋友？係我朋友姐！」

Jenny：「明白晒，一定係『朋友』啦！」

我：「費事理你，我入去先」