在IG上重遇你: 37

第三十七章

我都唔知阿輝講呢番説話係咪想擾亂我，搞到我之後心不在焉，幾次打錯牌，仲要俾阿輝食糊。

Jenny問：「呀威，你係咪突登輸俾阿輝，等佢贏返晒啲錢？」

我望一望阿輝，然後笑住咁講：「頭先佢話俾你地贏哂，叫我放水俾佢，等佢唔洗輸到底褲都冇」

阿輝個樣好愕然，我諗佢估唔到我會咁講。我唔等佢回應，再加多句：「佢仲話贏左幾多就同我五五分賬，我先舖舖輸俾佢」





阿輝即刻擰晒頭：「你地覺得我會咁做，我似啲咁嘅人咩？」

我地三個不約而同咁點頭，阿輝都冇再辯駁。之後我地一直打到五點幾，Jenny同Crystal已經抵受唔到睡魔來襲，就停手唔打。佢地幾個出左客廳訓覺，而我同阿輝就坐係房裡面傾計。

輝：「話説你同Queenie講清楚未，你知你地之間嘅關係都好複雜！」

我：「琴日同佢講清楚，我同佢根本冇可能一齊，我淨係當佢係女神，從來冇諗過要成為情侶」

輝：「我以為你會拖好耐先講，估唔到今次咁快手。不過Queenie有咩反應？」





我又諗起嗰日Queenie失望嘅樣，跟住話：「其實我都唔知自己係咪太直接去拒絕，佢聽完我講之后就冇同我講過嘢」

輝：「有啲嘢，做啲知好過遲啲知。Queenie係聰明女，佢應該好快就冇事」

我見差唔多六點，就叫阿輝出去揸駕車入黎，而我就去叫醒Jessie同Crystal 。我見到Jessie已經醒左，但唔見Crystal嘅身影，就問：「你個好姊妹行左去邊」

Jessie：「佢去左廁所洗面。我地係咪走啦？」

我：「我叫左阿輝揸駕車入黎，你地執好啲嘢就行得。我同Jenny講聲我地走先」





我見Jenny訓到死左，就冇嘈醒佢。阿輝車左我返旺角，本來諗住叫佢地食埋早餐先走，不過佢地話太攰，想快啲返屋企姐，我就冇逼佢地啦。