在IG上重遇你: 40

第四十章

雖然我立定決心去問清楚Bobo，不過我究竟要點問呢？如果太直接，我又驚嚇親佢；如果太婉轉，又怕佢唔知我想點？

經過一輪掙扎後，我決定約佢出黎飲嘢。話晒飲著酒傾計，講錯嘢都可以話飲醉左，唔洗搞到咁尷尬。

當我想whatsapp問佢時，佢竟然顯示著「輸入中⋯⋯」

Bobo：「Sorry呀，個日我冇心甩底架」
我：「小事啦:joy::joy:」




Bobo：「你星期三有冇嘢做？」
我：「冇」
我：「做咩？」
Bobo：「咁我約你星期三出黎攞手信」
Bobo：「順便請你食飯賠罪」
我：「唔洗講到賠罪咁嚴重:sweat_smile::sweat_smile:」
Bobo：「今次我一定唔會甩底！」

我應該係食飯個日問清楚，定再約日子問呢？我望一望手機，原來我坐左係飯堂兩個幾鐘，我再唔返去整嘢就今晚都唔洗走，結果我徹底忘記左諗呢件事。





雖然暫時放底左個煩惱，不過屋企仲有個原子彈未拆，睇黎今次我唔破財都難。望住自己個銀包，我真係好後悔咁樣對呀妹，自作自受呀！

未入門口，我已經感受到一股怒氣由屋企飄出黎。一入去，見到呀妹個樣黑過包青天， 佢凌厲嘅眼神都唔知可以殺死我幾多次。呀爸搭住我膊頭，同我講左句「你好自為之啦」，就行開左。

我笑住咁行到呀妹隔離，將我手上嘅蛋糕放係佢面前，跟住低聲下氣講：「小公主，對唔住！個日呀哥心情唔好，先咁大聲喝你，你唔好再嬲啦！我買左你最鐘意食嘅蛋糕，你就原諒呀哥啦！」

見到呀妹冇再黑面，我就知佢下左啖氣，不過佢突然間話：「你唔好以為一件蛋糕可以搞掂我，呢啲只係利息。我要你陪我去行街買嘢，當然係你埋單。」

「冇問題，最緊要你唔好再嬲，唔係我真係跳樓都唔掂！」雖然我講得好輕鬆，但我個心不停滴血，睇黎又要去搵秘撈，幫補下我個乾旱嘅銀包。